د. أسامه

بدات الحكايه summer training  في شركه ادويه , كان المسئول عن المجموعه اللي بتتدرب , كانت اوضه التدريب في اخر المصنع متطرفه وكنت بروح بدري في الباص

في يوم لقيت نفسي لوحدي مع حد من زمايلنا والمنظر معجبنيش فخدت بعضي ورحت له في مكتبه في المصنع وقعدت معاه الظاهر ما كانش فاضي فسالني انت ليه جايه تقعدي معايا ومش قاعده هناك فقولتله ان المنظر مش صح واني مش مبسوطه من القعده دي بدري هناك لقيته فجاه قام من مكانه وقام وانحنى بشياكه قوي وقالي اسمحي لي اشكر بابا على تربيته ليكي وقالي كل يوم تعالي الصبح اقعدي معايا لما الباقيين يجوا

من ساعتها بدا يوريني حاجات في الشغل غير للي بيوريها للمجموعه ولقيته اب حنون جدا اصله مكنش عنده بنات لدرجه انه قالي في مره لو كان عندي بنت مكنتش اتمنى تكون احسن منك

خلص التدريب ورحت اسلم عليه واستاذنته افضل معاه على اتصال وفعلا فضلت معاه على اتصال

في مره كان عايز نباتات نادره من بابايا في وزاره الزراعه وبابا عرف يجيبهاله فكلمته عشان اوصلهاله قالي كلمه ما نسيتهاش " صاحب الحاجه يسعى اليها " وجه بيتنا واتعرف على اهلي وقعد يشكرلهم فيه ساعه

صادف ان اليوم ده كان تاني يوم نتيجه تعيين اوائل الدفعه وكنت الثامنه واتعين 6 وكنت في قمه حزني وهو عندنا اتفتحت السيره دي ولقتني باتفتح في العياط قدامه

تعاطف معايا جدا وبالتيلفون عيني في المصل واللقاح بعقد مؤقت لحد ما التكليف يجي لي ومن بعدها كان بيتابعني من بعيد لبعيد

افتكرت مره وانا في الشركه عنده لما سالني انت عايزه تتعيني ليه قلتله دي الحاجه اللي مش عايزه  واسطه وانا معنديش وسايط قالي انت واسطتك كبيره وانت مش عارفه اتاريه نوى يساعدني ايامها

بعد كده كان بيجي الهيئه عندنا يدربنا على الشغل في المناطق العقيمه كل يوم سبت وبصراحه لو انا اتعلمت حاجه من حد في الموضوع ده يكون منه استمر معانا شهور طويله واسس الواحد بجد زي مالكتاب بيقول لدرجه ان الحكايه عجبتني وسجلت فيها ماجستير وعملت احلى واول رساله فيكي يا مصر عن الموضوع ده والفضل بعد ربنا يرجعله فيها

بعد كده الموضوع بتاع الرساله نقلني من شركه لشركه والحمد لله بقيت انا بادي التدريب ده وللنهارده هو موضوعي المفضل , وكل مره باديه بافتكره كويس واقرا له الفاتحه

فضل متابعني وكل ما اضايق الاقيه يتصل بيه !!! كل ما اجي على باله او يعوزني الاقيني باتصل بيه , كانت علاقه شفافه وغريبه ومن نوع خاص عمري ما كنت زعلانه واتصلت بيه الا وروقت

اب بكل ما تحمله الكلمه من معاني , ينفذ لروحك بسلاسه غريبه وما ازعلش منه لو قرص عليه لو حاجه عملتها ما عجبتوش لاني كنت عارفه انه كان بيعملها من منطلق ابوي حنون ومحب

عمري ما خطيت خطوه الا وسالته وعمره ما بخل عليه بالنصيحه, ساعدني في الوقت اللي فيه ناس قرايبي ما ساعدونيش وكانوا يقدروا يساعدوني , وقف جنبي , نصحني, علمني كتير

في يوم كلمته ما ردش وكنا في العيد قعدت اكلمه كتير ما وصلتلوش وتاني يوم الصبح صحيت عل مكالمه منه بس على ما صحيت كان قفل بعد ما فقت واتصلت عرفت انه مات وان اهله كلمه اللي كلموه اخر كام يوم عشان يقولوا لهم يحضروا الجنازه واني لو رديت كنت لحقته وحضرت الجنازه. عمري ما سامحت نفسي على الموضوع ده وكل ما افتكره ادعيله واقرا له الفاتحه

في مره شفت فيديو معناه انك لما تقول لحد انت قد ايه مديون له بالفضل سعادتك بتتضاعف  بس انا للاسف ملحقتش اقوله له ده عشان كده كتبت البوست ده عشان اقوله ساعدتني كتير وعلمتني كتير وملحقتش اقدم لك اي حاجه بس وعد مني ليك عندي ليك عمره اول مره حاروح فيها مكه الله يرحمك ويحسن اليك يا ابويا الروحي الغالي

افتكرت النهارده لاني لسه مديه التدريب ده النهارده في شركتي افتكرت طريقتك في التدريب ده وتهريجك وظرفك وانت بتديه الله يرحمك ويجعله صدقه جاريه ليك بعد وفاتك