الحجاب

لفتره طويييله جدا كان بيمثل لي غطا على الراس جبرونا عليه في المدرسه في السعوديه وقلب بنقاب من اولى اعدادي !! وقمه الشيزوفرنيا اني اطلع من باب المدرسه اكشف وشي ولما اخرج مع اهلي ممكن اطلع قصه من تحت الطرحه , واني لما انزل مصر البس اللي على مزاجي بس وانا راجعه لازم البس العبايه في الطياره !!!

الشيء ده هو اللي المطوع ضربني في السوق وانا في رابعه ابتدائي عشان كاشفه وشي وهزق ابويا وقاله بالحرف " بنتك صارت مره ما يصير تكشف وجهها "

نزلنا مصر وفي المدرسه استمر الجنان ده باجبار البنات على لبسه وقتها المدرسه اللي دخلتها كانت من احسن المدارس فاهلي دخلوها لي وقالوا لي ابقي اقلعيه بره

وزاد كرهي ليه واللي زاد الطين بله زي ما بيقولوا زن بعض ناس قرايبنا في الرايحه والجايه عالحجاب !!! مع ان عمر ما اهلي جبروني عليه " في حدود المدرسه في مصر والسعوديه بس كنا مجبرين عليه"

اللي زود الحكايه بقه لما اختي الصغيره قررت تتحجب ودي بقه كانت الطامه الكبرى والزن والكلام زاد معرفش ليه ما كل واحد حر

الغريب ان عمري ما كنت من البنات اللي مزودينها في لبسهم وانا مش محجبه اللهم الا في بعض المناسبات القليله جدا وامتحانات الشفوي في الكليه لكن بصفه عامه كنت من المحترمات جدا حتى وانا مش محجبه

لا انكر ان دماغي كانت رايحه وجايه بتفكر فيه وربطات الايشاربات , وشكل دبابيس الطرح والوانها والتفاصيل النمنم اللي بعض زمايلي كانوا بيعملوها وكانت بتعجبني

ما تفهموش ايه اللي حصل يوم من ذات الايام قررت الصبح وانا نازله البسه وبدون اي مقدمات !!! لدرجه ان زمايلي كانوا لسه معايا في الجامعه الامريكيه لحد 10 بالليل من غير حجاب وسبعه الصبح تاني يوم لقيوني محجبه !!!! لاول وهله تخيلوا اني غسلت شعري وملحقتش الفه او انشفه !!!

ولبست الحجاب وانا معنديش غير حاجتين تلاته بكم وخدت ايشاربات من مامتي واختي وبعدين بدات اشتري هدوم !!! وكنا في بدايات الصيف يعني الموضوع كان صعب

بعدها باسبوع جالي ايشارب هديه فزميلتي بتقولي عايزه اجربه فسبتها تجربه وبعد ما قاسته قررت انها تلبسه وكنت الحمد لله سبب في حجاب واحده صاحبتي من غير تخطيط !!! صحيح قلعته بعدها بكام سنه بس اهي لبسته شويه

الفرض عشان يبقى فرض والواحد يعمله لازم يجي من جوه الواحد مش من براه لا من المجتمع ولا من المدرسه ولا من المطوع ولا من العيله ولا من اي حته غير نفس الواحد وبس والا حفك النقاب اول ما اطلع من باب المدرسه , واقلع الحجاب في مصر والبسه في السعوديه !!

والحمد لله عمري ما ندمت على لبس او تسريحه شوفت واحده مش محجبه عاملاه لاني انا اللي اخترته مش انجبرت عليه

عشان كده عمري ما انكرت على اي واحده عدم حجابها ولا حتى انها قلعته بعد ما لبسته في النهايه هيه حره لان اكتر ناس كانت بتضايقني كانوا اللي بيزنوا عليه فيه واكتر ناس شجعتني عليه الناس اللي عمرهم ما قالوا لي البسيه بس لبسهم وتصرفاتهم كانت شيك وبتدعوا ليه ببساطه وتلقائيه

ما تحكموش على الناس بمظاهرها ياما محجبات شمال وياما مش محجبات زي الالف وفي النهايه ربنا اللي بيحاسب مش البشر ولا المجتمع