أجدع صحاب

يمكن البوست ده شخصي حبتين ويمكن مش كل الناس تحبه بس بما انها مدونتي بتاعتي يعني ما يضرش نوجب شويه مع اجدع صحاب

شله من  بنات غايه في الاختلاف والتناقض في بعض الاحيان !! ويمكن ده اللي خلانا نكمل مع بعض لاننا فعلا بنكمل بعض (في الجنان أو في بعض الاوقات في العقل, ما علينا)

م.ع : اللذوذه الفرفوشه النعنوشه اللي في اي وقت تعوزها تلاقيها في التواليت بتسرح شعرها !!! واللي في الرحلات كلنا كنا بناكل اكلها , واللي دخلت الشمسيه جامعه حلوان !!! واللي بتقف في سكاشن صيدله سبع ساعات باعلى كعب في الدنيا , ليها مشيه مميزه بالشمسيه تعرفها من اول الجامعه !!! واللي دايما لما نحب نندل مع حد تقول " لا الا دي مش اصول ابدا" عمرها ما خلصت ماده لاخرها بتاخد من المواد اللي يكفيها , واللي دخلت الترنتال جدول المذاكره عشان تعرف تطبق اخر تلات ايام قبل الامتحان واللي دايما مجمعانا في بيتها واللي عمري ما برتاح غير في بيتها , اروح واقعد بالساعات ولا كاني في بيتي افك الايشارب وامشي حافيه كمان (مع اني في العادي مش بامشي حافيه !!! بس هيه الاريحيه في بيتها منقطعه النظير) واللي يا ما مامتها رحمه الله عليها استقبلتنا واكلتنا احلى اكل عندها. م.ع دي طول عمرها نفسها تشتغل مدرسه وفعلا عملت كده طب كان لزوم وجع القلب في صيدله ايه يا امي؟ الظاهر عشان تصاحبنا .  ذات الهدايا العمليه بطريقه غريييبه يعني ممكن تشتري لحد فينا في عيد ميلاده دسته شرابات مثلا  (عملتها مع حد فينا)او اقلام وكراريس كده يعني . استاذه في المرواح لحلوان عشان ناخد المترو عشان نقعد سوا وفي الاخر برضه ما بنقعدش سوا !!!  يوم ما ماتها توفت اتصلت بيها من غير سبب "حسيت بيها معرفش ازاي وجريت ادور على ايشارب ساده عشان اروح لها اصل اليوم ده الايشارب الحمر الملعلع كان حابك معايا!!!
لما روحت عمره انا واهلي (كانت لسه في المدينه ) استقبلتنا هيه وزوجها وقضوا لنا مشاورينا والله لو اختي يمكن ما تكونش حاتعمل كده معايا وللنهارده ابويا وامي مش ناسينها الحركه الشيك دي , افتكرت كمان حاجتين : حدفتلي الجرب يوم فرحها بس طلع اونطه !!! طلبت مني افرش لها اوضتها قبل ما تتجوز في تقليد بناتي بين الصاحبات ما عملتوش غير معاها وبعدين اختي
 

 غ.اس. المعيده المنتظره اللي دايما كانت بتتقمص دور المعيده المستقبليه واللي كانت بتقعد في المحاضرات تشوف احلى حاجه عند كل دكتور عشان تعملها واوحش حاجات عشان تتجنبها , عمرها ما ردت على حد في التيلفون ليله الامتحان " نداله !!!" بس جدعه وفرفوشه وتدخل قلبك من اول وهله , تسافر وتيجي وتتصل وتلمنا واللي عمر ما كان حلمها السفر بره مصر وكانت اول واحده تسافر !!! وقت الجد ولد بقفشات لذيذه جدا , معرفش كان ايه حكايه النظاره الصفرا عندها واللي لما غيرتها بقت بمبي . اي وقت تنزل وسط البلد لازم تجيب ايشارب , وكانت بتناطح المعيدين وتغلس عليهم معرفش ليه . طول عمرها نفسها تتعين في الجامعه وفعلا عملت كده . انا وهيه كنا مسجلين خطر في كنتاكي التحرير !!! حيث يوجد الكاتشاب والبطاطس تلاقينا !!! ونستهلك كميات غييير طبيعيه سوا
أنا و غ.اس يا ما فطسنا ضفادع في سكاشن الفارماكولجي وياما لعبنا في الBioassya بلاش اقولكم بايه عشان ما تقرفوش !!! وا TS في الpharmacognosy تشهد علينا !!!

 

 

 و.م من ساكني حلوان جنب الجامعه على طول واخر واحده توصل المحاضره !!! دي بقه اللذاذاه كما يجب ان تكون كل لما اشوف علا غانم افتكرها , سماره قماره , صاحب جدع وابن بلد , اول واحده عندنا تفتح صيدليه واول واحده تقفلها !!! مش لانها فشلت لا سمح الله بس سافرت بعد كده . يوم ما بابها مات اتصلت بينا ولما رحنا لها قلبت القعده تهريج من كتر ما صدقت تلاقينا وتحكيلنا على حزنها ومن كتر ما ارتاحت في قعدتنا قلبتها تهريج . جدعه اوفرسيز يوم ما عزنا حاجه لحد من صحباتي هيه ما تعرفهاش قامت بالواجب وزياده , ام العيال المحتاسه بس برضه لسه زي ماهيه فرفوشه ونعنوشه

 

 

س.ع اغرب انسان ممكن تشوفه في حياتك الجدعنه والقوه والرقه والقسوه احيانا في نفس ذات الوقت , عاقبت نفسها ترم كامل ما روحتش معانا عشان ما جابتش التقدير اللي هيه عايزاه واللي لما ما اتعينتش ما استسلمتش فضلت وراه لحد ما حققته و في يوم من الايام حكتلي عن مصيبه عملتها وانا اللي اتخضيت ووقعت من طولي مش هيه !!! بس عندها ثبات انفعالي منقطع النظير ولا فرق معاها وعدت الحكايه الحمد لله

العبد الفقير لله انتوا بقه قولوا لي مين انا!!!


أنا , و م.ع , و و.م بينا كلمه سر اسمها صيدناوي دي بقه اللي لما بنقولها بنفطس من الضحك اصل ليها حكايه همه بس اللي عارفينها من رحله اسكندريه زمان . ان الله حليم ستار بقه !!! مره تانيه روحنا ل و.م في المستشفى اللي كانت شغاله فيها وسابت النبطشيه وخدتنا وروحنا اوضه النبطشي واديناها رغي لاخر الشفت  كان يوم مش متخطط بس راااائع !!!



أما بقه و.م , و غ.اس اتجوزوا في نفس التوقيت تقريبا فجبتلهم نفس الهديه تقريبا , هديه انا نفسي ما كنتش اتخيل اني افكر في هذا التفكير والغريب واللي مش حانساه النظره اللي على وش كل واحده منهم (تقريبا نفس رد الفعل ) لما اديتها لها !!! همه بس اللي فاهمين !!!! 

 

 

الغريب في الشله دي الناقض في كل حاجه , وكمان ماشاء الله كل واحده فينا اشتغلت ووصلت للي هيه عايزاه وبس وزي ما كانت بتفكر في الكليه .

 

الأغرب في الشله دي اننا نبعد نبعد بالسنين ويوم ما نتقابل كاننا كنا سايبين بعض انبارح نفس الكلام والضحك والروقان , ما تخدش راحتك الا معاهم ولا تتكلم من قلبك الا معاهم ولا تشتاق لحد الا ليهم كانهم انت وانت هم !!! اخر مره اتقابلنا كان يناير اللي فات والله ما كنا عايزين نمشي وكانت عزومه فطار من اجمل ما يكون (سلطانيه القهوه اللارج في كوستا تشهد !!! )

حاليا عاملين جروب على فايبر مسمينه فعلا اجدع صحاب ويوماتي ننكش بعض من مصر عالكويت على كندا !!! الغريب بقه اننا انا و م.ع في مصر واخر كسل ما بنتقابلش غير لما حد يجي منهم ونتقابل مع انها في اخر الشارع من شغلي !!! تلاهي الدنيا ووحشه عالاخر

الحواديت ملهاش اخر بس ان الله حليم ستار بقه !!!!

بس فعلا لما باسمع اغنيه اعز اصحاب بافتكرهم !!! اسمعوها معايا ودمعوا معايا !!! بحبكم كلكم وربنا ما يحرمنا من بعض
انا نشرت البوست من ساعتين وكل شويه ادخل ازود حاجه ومستمتعه بيه لابعد الحدود