في السيرك

سيرك مونت كارلو حبك لهم ينصبوا الخيمه بتاعتهم في طريق الشغل , رايحه جايه ابص عليها اقول عايزه اروحه عايزه اروحه

المهم في يوم وانا رايحه الصبح وقفت وخدت النمره واتصلت بالتليفون وعرفت المواعيد

تلات اربع ايام اروح بدري عشان اروحه يحصل حاجه , التذاكر تخلص , الحفله تكون سواريه اليوم ده وهكذا

انبارح اخيرا عرفت اروحه مع بابا , بس اكتشفت ان جوا كل واحد فينا طفل صغير بيتلكك عشان يطلع في اي مناسبه مهما كان عمره , بابايا مثلا راجع مبسوط جدا ووشه بيضحك من زمان ما شوفتوش كده , انا مثلا كنت قاعده اسقف معاهم واضحك واتخض , كنت خايفه جدا على مدرب الاسود وكل واحد من بتوع الاكروبات , وفضل البلياتشو كل ما يطلع ويصفر يضحكني , وكان نفسي يرمي لي الكوره والعب معاه , كنت مرعوبه على بتوع الموتسيكلات اللي بيجروا ورا وعكس بعض جوه كوره الحديد الصغيره , والبنت بتاعه الهولاهوب اسرتني باتسامتها وهيه مستمتعه بفقرتها . مع ان كل واحد فيهم عمل نمرته ميت الف مره الا اني كنت قلقانه على كل واحد فيهم وسالت نفسي ازاي كل ليله حاطين روحهم على ايديهم ده الغلطه هنا بفوره !!! وازاي بعد ما يخلصوا بيضحكوا قوي مع انهم ممكن يكونوا مهدودين من التعب او الخوف او حتى عندهم مشاكل في حياتهم

اكتشفت كمان ان حياتنا ما هيه الا سيرك كبير : المهرج اللذيذ اللي كل الناس بتحبه , الموهوب اللي بيعمل العجب اللي كل اناس بتسقفله , في كمان الراقاص اللي من هنا لهنا وممشي حاله وبيحشروه بين الفقرات وخلاص , في كمان اللي بيمشي عالحبل ويرقص عليه كمان, في الاسود اللي بنخاف منها وفي النسانيس اللي بنحبها , في التعبان الناعم وفي الفارس الجميل , فعلا حياتنا ما هيه الا سيرك كبير  

بحكي مع بابا ان دي تالت مره اروح السيرك واني عمري ما روحته معاه بس الغريب انه فكرني انها مش تالت مره و انها خامس مره وانه وداني قبل كده مرتين !!!. من ضمنهم في اللي في مصر وفي اللي بره بس اللي فعلا ما نسيتوش اول مره خالص روحت السيرك ايامها كنا اجازه في مصر وبابا كان سبقنا وسافر فعمي عزمنا عالسيرك القومي في العجوزه انا فاكره كنا واخدين بينوار قدام الحلبه مباشره وبعدها عزمنا عالعشا في نادي الظباط في الزمالك وقعدت حكيت عن اليوم ده لبابا وفوجئت بكميه تفاصيل كنت ناسياها واسترجعتها حبه حبه وابتسمت جدا وانا بافتكر اليوم ده  

واكتشفت ان اي ذكريات جميله بتحصلك وانت صغير مش ممكن تنساها عشان كده حاول دايما تكون الشخص ده مع اي طفل حواليك واعمل له ذكريات ما ينسهاش لانه دايما لما حيفتكرها حيضحك ويفتكرك ويمكن يدعيلك انك في يوم فرحته او اهديته ذكرى حلوه منك  سهله قوي بس مؤثره برضه قوي

 

The modern version of sense and sensibility chapter 29

If you did not read the novel this chapter is about Marianne and Willoughby, when she moved to London on vacation, wrote him a letter telling him that she is in town, followed by another letter asking why he did not pay her a visit and ignored her in a dancing party, followed by the last one asking for explanation then asking him to resend her letters and part of her hair he used to keep !!!!

His reply was that he is not into her and that he loves someone else. Then all the grief and recall of all moments took place at Marianne’s end

I laughed a lot reading this chapter imagining the modernized version of it: she would text him on watsapp, Viber and FB that she is in town, and she would also see the “seen message “ at his end !! she may see him “writing “ on the other side and he cancels the sending option which would ignite her anger at him !!

Then she would invite him to FB “event “, he joins the event but does not comment her “mentions”. She receives notifications of his activities on FB “liking” “sharing” “commenting” on others but not her !!!   

Then she would “unfriend him” , “untag her pictures” or even blocks him !!! then the greifing stage starts recalling his comments, shares, pokes,  and how sweet his mentions were!!!

Then the detective stage starts: she searches his wall for other females’ comments, likes then searches the suspected female for his presence on her wall as likes, comments, tags, and in 90% of cases she would find out “whom she is”

How fast and silly our lives and relations on FB are !!! and how it turned into silly spying tool

All the longings and expectations in the original script would be turned into digital signals on laptop or a smart phone

I believe that Jane Austin would commit suicide if she reads my post!!! “If she understands the modern terms and the franco arab texts on FB” !!!

The original script is in 15 pages where the modern version would be 2 or 3 messages on FB or watsapp followed by few blocks, untags, and unlikes on FB

Lucky you are Jane Austin that you died before seeing these non-sense tasteless relations on social media  

طلبه صيدله

همه من متفوقي الثانويه العامه اللي ما قدروش يدخلوا طب لسبب او لاخر زي المجموع أو زي انه مش عايز(ه) تقضي عمره(ا) مذاكره ودراسات عليا , او حد عارف هو عايز ايه بالظبط وقرر يدخل صيدله زي انه يمسك صيدليه الوالد(ه) او يسافر يشتغل دعايه في الدول العربيه وعاده دول بيكونوا money oriented  قوي

جوه الكليه بقه حتلاقيهم مجموعات محدده:

-        الاوائل ودول راشقين في الصف الاول في المحاضرات والسكاشن واول ناس تدخل واخر ناس تخرج من السكشن ومصاحبين الدكاتره والمعيدين باعتبارهم زمايل المستقبل باعتبار ما سيكون , ممكن تلاقيهم في المكتبه بيذاكروا وبين المحاضرات وفي المترو بيذاكروا عشان الوقت كالسيف ان لم تقطعه قطعك ويا دوب عشان يلحقوا يذاكروا المنهج تلات اربع مرات قبل الامتحان !!!

-        النقيض: اللي ناوي يشتغل في صيدليه : ده بينزل فعلا صيدليات من تانيه او تالته كليه بالكتير ودول بيحضروا السكاشن بالعافيه عشان عندهم شغل ومش فاضيين للهري ده

-        اللي ناوي يشتغل في الدعايه : ده الشاب اللذوذ اللي مصاحب الكل واللي بيطلع رحلات ويلم فلوس الكتب للدكاتره واللي بيعمل شغل من هنا وهناك ما هو people oriented  جدا ومن الحكايه دي بيعمله سبوبه مش بطاله برضه

-        اللي منشنين على شركات الدواء : دول ندره قليلقه جدا لان الطلبه عارفه كويس جدا ان المصانع مش كتير ودخولها مش بالساهل خصوصا الشركات المالتناشونال ولان الشركات المصري حالها ما يسرش فعاده ما تلاقيش ناس كتير منشنه على الشركات : دول بقه حتلاقيهم في رحلات المصانع ومصاحبه الدكاتره اللي شغاله مستاشارين لشركات ما هو من جاور السعيد يسعد , حتلاقيهم ملعلعين في سكاشن الصيدلانيات والكيميا

-        اسره النور والتيار الاسلامي: يكتبوا المحاضرات كويس جدا ويصوروها ويبيعوها للطلبه باسعار رخيصه كمان, ويملوها ايات واحاديث منها ثواب ومنها يضمنوا ان الورق ما يترميش , حتلاقي قصادهم بالظبط بعض الاسر المسيحيه باجزاء من الانجيل ما هو محدش احسن من حد والطلبه هيه اللي كسبانه !!!

-        محترفي الدروس : دول يجوا السكاشن تقضيه واجب ما هو المعيد اللي بيديله الدرس حيلخص الليله في الاخر فبلاش تضييع وقت وباقي الوقت في الكافيتريا او عند الكوافير !!

-        الباقي: في حاله توهان بين الدكاتره والسكاشن والنظري والعملي ونظري العملي والشيت بتاع كل اسبوع والشفوي في اخر السنه

-        القاسم المشترك بين الكل: قله النوم ايام الامتحانات , الدهوله ايام النظري ومنتهى الشياكه والقيافه ايام الشفوي وكانك بتشوف نااس ما تعرفهاش البنات تروح الكوافير وتيجي على سنجه عشره والولاد اخيرا يحلقوا ويبلسوا البدل ويكون عرض في الشياكه والاناقه يوم الامتحان الشفوي . كمان حتلاقي طلبه صيدله شايلين البلاطي والميكروسكبات رايح جاي وعلبه كده استحدثوها اواخر ايامنا ودلوقتي منتشره جدا لادوات المعمل عشان اللي ما عندوش لوكر في الكليه ياخد فيها حاجته

لو انت صيدلي او صيدلانيه كنت بقه انهي نوع؟

https://www.facebook.com/#!/562451227215431/photos/a.562476710546216.1073741828.562451227215431/598868003573753/?type=1&theater

ذكريات من زمن فات

هو مش من زمن قوي بس يعني بس يعني افتكرت الايام دي من كام يوم لما شفت وانا مروحه من كام يوم شباب شكلهم كده في صيدله وحتقولي عرفتيهم منين حاقولك الدم بيحن , البالطو الابيض , السحاحه , الغلب عالوشوش , المعاد المتاخر .... الخ الخ الخ

سكاشن صيدله : كنت وما زلت باسميها العذاب الجميل احلى والطف كليه ممكن تدخلوها , تتميز بتنوعها بشده من كوجنزي لسيوتكس ممرورا بالفارماكولوجي وعدي على الكيميات بكل اشكالها والوانها اللي تتخيلها او لا تتخيلها

مش حاتكلم عن اعدادي الي كانت ينطبق عليها يا مربي في غير ولدك يا باني في غير ملكك وهيه دي بالظبط نظريه ومباديء دكاتره علوم بالنسبه لطلبه صيدله

 

ندخل على الفارماكوجنزي أو العراقيل" العقاقير"  والنباتات الطبيه : سكشن كده تحس انه قالب على خضر العطار شويه اعشاب على طباشير على شربات نايلون (اه والله لما كانوا بيخلونا نتفرج على انواع الانسجه تحت الميكروسكوب كان في في العينات شربات حريمي نايلون !!! )  وبعدين التي اسات T.section  في كل واي سمسمايه او حتى قرفه خشابي  وتجيب ميكروسكوب في البيت وتركب بيه المترو رايح جاي كمان , من اغرب المواد اللي ممكن تعدي عليكم , ولما شيكوه بقت phytochemisry  وهو كائن كده شبه البغل ناتج عن تزاوج الكيميا بالعقاقير !!!

 عندك كمان الصيدلانيات pharmaceutics كل اشكال المستحضرات الطبيه من اول اللبوس مرورا بالروج (في نفس السكشن بنفس الmold   !!! ) عدي على الإملشن والgranules اللي بتفكرني بغربال الكسكسي بتاع جدتي اللي عمري ما شفته بس عرفته بالوصف لما دخلت السكشن الغريب ده  

خد عندك كمان سكاشن الفارماكولوجي بدايه من الضفدعه والفار ثم الgenia pigs  ثم الbioassay  وما ادراك ما bioassay   كل اشكال والوان اجزاء الحيوانات اللي تخطر وما تخطرش على بالك مسكناها بايدينا واشتغلنا بيها مش عارفه ازاي !!! كمان عادي جدا انك كطالب في صيدله ممكن جدا تركب المترو بشنطه كلها ضفادع لزوم التشريح وتجيب جردل تملاه ضفادع وطين عشان لما يدخلوا البيات الشتوي مش حتلاقيهم فيبقى عندك ستوك لزوم الايام الساقعه , أوتربي في بيتك فيران تجارب عشان يبقوا واكلين ومتغذيين قبل الامتحان فيدوك نتيجه ال sialagogue لو كان ال unknown billocarpin  اه والله !!! وكنت بحطلهم الاكل في طبق سابوا الاكل وكلوا الطبق !!!! يعني كده اي طالب في اي كليه ممكن يكون عنده في البيت قطه , كلب عصافير.... اما سيادتك حيكون عندك ضفادع وفيران تجارب ويا سلام بقه لو الفار شعشع منك في السكشن فخفت منه وحبسته في الميزان يركب عالكفه ويتمرجح جواها منظر عمري في حياتي ما حانساه !!! وبدل ما تتصور مع الفنانين تتصور وانت ماسك الفار وحاطط له في رقبه بابيون كمان صوره خدتها وصاحبتي للنارده ما ادتهانيش افتكرتها دلوقتي وانا باكتب البوست (فين الصوره يا ايات ؟)

 اما بالنسبه لسكاشن الميكرو بقه حدث ولا حرج من اول الgram stain  لحد الدوده الشريطيه مرورا بعينات سل حقيقيه ولما تغلط وتمسك السلايد بايدك فالمعيده تشخط فيك وتقولك قوم اغسل ايدك وعقمها تعرف بالصدفه في الامتحان ان العينه positive  !!!

سكشن الكلينيكال بقه اللي وهمونا وودونا المستشفى بقه ولبسنا البالطو وتخيلنا انا حنكشف عالعيانين وعقده الطب للي كان نفسه في الطب اتعقدت زياده ما فكتش ,  ده بقه الخدعه الكبرى اللي قلبت بعد كده على case studies  في المدرج , ومحاضرات دعايه على تسويق معرفش ليه

 

سكاشن الكيماء : تحليليه على عضويه على غير عضويه على صيدليه على سبكترو .... القاسم المشترك هو البنطلونات والشرابات المخرمه بعد السكشن وكم الهدوم الغاليه اللي اترمت بعد السكاشن دي لدرجه ان بعد شويه بقه في بنطلون جينز وبالطوا مخصصين للكيمياء موجودين في دولابك تلبسهم وانت داخل السكشن ده .

بس والله ايام جميله جدا

الحلقه الجايه طلبه وطالبات صيدله وحتعرفوا بقه ازاي عرفت الناس دي وهمه ماشيين في الشارع !!! 

https://www.facebook.com/pages/%D9%82%D8%B9%D8%AF%D9%87-%D8%B4%D8%A7%D9%8A-%D8%A8%D8%A7%D9%84%D9%86%D8%B9%D9%86%D8%A7%D8%B9/562451227215431#!/562451227215431/photos/pb.562451227215431.-2207520000.1413835603./596990683761485/?type=1&theater

نوستالجيا كمان وكمان

انا من الشخصيات اللي ليها مزاج مخصوص قوي في المزيكا او الاغاني اللي باسمعها عشان كده من النادر انك تلاقيني مشغله الراديو في العربيه

ماليه الفلاش ميموري اغاني ام كلثوم وعبد الحليم وورده  على شويه حفلات موسيقى عربيه على مزيكا كلاسيك

النهارده مكنتش فلاشتي معايا فاضريت افتح الراديو القاقيلكم ايه بقى اغاني تسعيناتي ايام ثانويه عامه على الجامعه

مش متخيلين المود عمل ازاي وقتها وكل اغنيه تشتغل تفتكر تصويرها ايام ما كانت الفيديو كليب لسه عجبه وحلقات اماني واغاني ونايل دي جي ونايل هيتس اللي كنا بنستناها بفارغ الصبر يمكن يعرضوا اغنيه كاظم الجديده ولا راغب علامه

اللطيف اني اكتشفت اني لسه فاكره الكلمات والالحان وكالعاده قفلت الشباك وعليت الصوت عالاخر وقعدت اغني معاهم قمه الاستمتاع وانت بتفتكر الاغنيه دي في رحله الاسماعيليه ولا الفيوم , والاغنيه دي ايام راغب علامه لما كان بشنب , واغنيه ايمان البحر درويش اللي غناها في عجيبه في مطروح واللي خلت ناس كتير ايامها يزوروا مطروح لاول مره والاحلى والاهم انك تحس انك شلت حبه عفره وصدا جم على روحك من زحمه الحياه ورجعت ولو لنص ساعه لايام جميله

اقولكم على حاجه انا اتلكعت في السكه لحد مالاغنيه خلصت !!!

https://www.facebook.com/#!/562451227215431/photos/a.562476710546216.1073741828.562451227215431/596042957189591/?type=1&theater

 

نفتح الشباك ولا نقفله؟

في ساعه روقان مع صاحباتي جت سيره الجو المصري في الخطوبه والجواز وجو المقدم والمؤخر والشبكه والقايمه والحاجات دي , اختلفت الاراء بين:

-        ان ده العرف واننا لازم نمشي عليه والسلام !! بس هو مين قال ان العرف فرض يعني

-        ان الحاجات دي صوره مودرن للمهر الشرعي وان ده حق الزوجه , طب لو هيه متنازله يعني يبقى ايه اللي لزمه ؟ وليه الاب هو اللي بيتشرط يعني ما يسالها ما يمكن مش عايزه حاجه

-        ان easy come , easy go  وان العريس لو اهل العروسه ما عملوش كده حيشك فيها انه لا سمح الله فيها ان !!!

-        حد تاني قال: مالك مغليها , قلت دافع دم قلبي فيها !!! هيه يا عم بيعه وشروه !!!

-        حد تاني قالت ان كنت مستعده ابيع عمري عشان فلان ولا كنت عايزه منه لا مهر ولا شبكه ولا شقه ولا اي حاجه بس هو اللي حمار !! عزمني على فرحه !!! فبعدها بقى الموضوع ان كل العرسان زي بعض ما بتفرقش فاللي حيديني حياه اسهل واضمن حاتجوزه وكانها بتنتقم من فلان ده وكان ضمان العيشه في المهر والمؤخر ما هو ممكن يقرفك لحد ما تتنازلي عن كل حاجه

-        واحده تانيه قالت لي بصي بقه هيه تفرق لو هو مقتدر ومش عايز يدفع يبقى بخيل وساعتها يروح بالسلامه اما لو فعلا ظروفه وحشه بس بني ادم كويس يبقى نستحمله والامر لله حد لاقي !!!

-        واحده تانيه قالتلي في الصالونات مفيش مشاعر يبقى الاهم الماديات ما كلهم زي بعض

-        واحده تانيه قالتلي انا اتدفع لي مهر ققققققد كده وشبكه قددددد كده وفي الاخر بعد ما مات اهله بهدلوني عشان الورث ولان بابايا كان شايف الحاجات دي بلدي ما دقش في الشقه والقايمه فالنتيجه انه للنهارده مش عارفه اجيب حقي وحق ابني منهم , وجهه نظر حزييينه جدا بس فعلا في الحاله دي بالذات ظهر قيمه التفاصيل دي

ويبقى السؤال الناس تتساهل بس محدش ضامن الموت مالحياه ولا يدققوا في التفاصيل فتقلب ببيعه وشروه ؟ نفتح الشباك ولا نقفله ؟ انتوا شايفين ايه؟

 

انا كمان وحشتني !!!

واحده من صاحباتي الانتيم اختفت فجاه فبعت لها " وحشتيني" فين بعد ميت سنه ظهرت وردت عالماسج " وانا كمان وحشتني" كلمتها اخيرا ردت واكتشفت انها في دوامه الحياه والاولاد والدوشه ولقيتها بتقولها كده بتريقه على حبه مراره " وانا كمان وحشتني"

المعنى والطريقه اللي اتقال بيها اثار في نفسي تساؤلات كتيره قوي

ازاي نفسي اللي معايا في ال24 ساعه في ال24 ساعه وتنام وتقوم معايا وتروح وتيجي معايا توحشني

وازاي الواحد يسيبها لما تتوه منه كده وتوحشه؟ وازاي يقدر يرجعها ويحافظ عليها لا توحشه؟

اعتقد بانه يعرف معدنها الحقيقي ويصقله كل شويه عشان ما يتربش ويصدي يعني اللي مثلا معدنه في الخير يخلي له نصيب ولو قليل من الخير

اللي معدنه العيله والصحاب يديهم شويه من وقته انشالله يوم في الاسبوع او مكالمه تيلفون

اللي معدنه في الرياضه يحافظ على اقل القليل منها ان شالله ينط الحبل

اللي معدنه في المزيكا يسمع شويه مزيكا وهكذا في البيت في المكتب في الشارع في اي حته

ممكن تلاقي نفسك في غدوه بره في فيلم سينما , في قعده لوحدك حتى , في كتاب حلو , في كوبايه زبادي في الخلاط, في البوم صور, في دفتر مذكرات في اياتوها حاجه تبسطك انت وبس

او اي ميكس من كل الحاجات دي ومعاها رشه من الطفوله على تدليع النفس حتلاقيها على طول

وكلها حاجات صغيره بس لازم نركز ونعملها

هو الواحد عنده حاجه اغلى منه؟

بخرف ولا بهيس ؟ مش عارفه !!!

طب رايكم انتم ايه ؟

زلزال 92

 

معرفش ايه اللي فكرني باليوم ده ؟ يوم 12 اكتوبر 1992 يوم جيلي لا يمكن تنساه

الساعه 3.09 اللي كان نايم واللي كان بيستحمى واللي كان بيتغدى زي حالاتي والقاسم المشترك بيننا كلنا هو فكره ان البيت بيقع هيه بس اللي جت في بالنا كلنا

لاننا كمصريين قبل اليوم ده عمرنا ما عرفنا يعني ايه زلزال غير من كتب العلوم والجغرافيا

عن نفسي كنت لسه راجعه من المدرسه وبنتغدى وفجاه لقينا فازه فيبر جلاس فوق التلاجه في المطبخ بتقع وبعدين ماما قالت الحقوا البيت بيقع , فاكره كويس اننا انا واخواتي اتسمرنا في مكانا وماما مدت ايديها حوالينا كانها بتحضننا , بابا جري على البلكونه يشوف ايه اللي حاصل وسمعت الجيران عالسلم نازلين جري

اطول تلاتين ثانيه في الوجود ومن اعنف زلازل مصر 5.8 ريختر , فضلنا قاعدين في مكاننا لحد ما خلص وبعدين ماما لبست ونزلنا نشوف ايه اللي حصل لقينا الجيران كلهم في الشارع بهدوم البيت ستات ورجاله بكل االاشكال اللي ممكن تتخيلوها

بعد كده افتكر التيلفونات باظت وماكنش فيه موبايلات فنزلنا على جدتي عشان نطمن عليها , جيران جدتي بالصدفه كانوا مخرجين عفش في الشارع باين بيعزلوا ولا ايه معرفش المهم واحنا داخلين الشارع ماما صرخت وقالت البيت وقع !!! برضه !! ولما قربنا اكتشفنا الخدعه الكبيره وان كل حاجه تمام , اخويا كان عنده 3 سنين وقال لجدتي بيت البلد وقع , الغريب انها اهتمت باللي قاله وقعدت تساله عن تفاصيل قالها لها وطلعت صح !!! وانا قعدت اتريق قالتلي خدوا فالكم من عيالكم , بعده بيومين تلاته بيت البلد فعلا وقع !!!

اليوم ده بين ايه هيه اهتمامات كل واحد اللي جري عالفلوس واللي جري ينجو بنفسه واللي ساب ولاده ونزل مالبيت واللي فضل ساتر نفسه ومانزلش واللي زي حالاتي كان لسه شاري كتب خارجيه في كيس وكان حياخدها معاه وهو نازل !!!

كل وحد جري باغلى حاجه عنده !!!

بعدها بيوت ومدارس كتير وقعت وكلها في رايي المتواضع كانت اولى علامات انهيار البلد من جوه تعليم ومدارس وبيوت وناس وشخصيات مخوخه من جوه وفي نفس الوقت اللي اتبرع بفلوسه واللي اتبرع بدمه واللي استضاف ناس عنده وفي اللي عاش في فوبيا من اي رجه للبيت حتى من ترله معديه هو فعلا زلزلنا من جوه قووي

زلزال 92 علامه فارقه في شخصيه جيل السبعينات والتمانينات واللي عمره ما نسيه , حد يصدق ان اليوم ده كان من 22 سنه !!!! انا عديتهم على ايدي من كتر ما كنت مش مصدقه !!! 
 ها انتم بقه ايه ذكرياتكم عن اليوم ده ؟

 



أمل وجورج النسخه المصري أم الأجنبي(4):

خلصنا الخطوبه عالجهاز عالفرح وشهر العسل وراحت السكره وفضلت الغدره زي المثل ما بيقول

جورج عايز يفطر فول بالزيت الحار وامل عايزه باتيه وكرواسان أو عيش سن وجبنه قريش لزوم الدايت

جورج متعود في العيد عالفته بالخل والتوم وامل اساسا ما تعرفش بتتعمل ازاي

جورج كل ما يروح لمامته يقولها وحشني اكلك فمامته تزغر لها وهيه تكتم في نفسها

امل نسيت تغسل الفراخ وتنضفها فالشربه والاكل كله طلع زفر فجورج ساب لها الاكل وقعد يبرطم على انه جعان وتعبان وكان نفسه في لقمه كويسه

أمل ما بتعرفش تكوي فهدومه طلعت مكسره

أمل غسلت الالوان مع الابيض ففستانها الاحمر بوظ قمصانه البيضا

امل حامل وبتتوحم ومش طايقه الاكل ولا ريحته وجورج زهق خلاص , امل نفسها في البطيخ في الشتا !! جورج زهق من الدلع

أم جورج جت زارتهم ومعجبهاش التراب اللي على الكونسول اصل امل عندها شغل كتير ومش فاضيه تاخد اجازه عشان الست تيجي تنضف ,جورج يقرر انه كفايه شغل كده وبلاش بهدله ,أمل تقوله احنا متفقين اني اكمل شغل بعد الجواز و انت مش بتحترم كاريري اللي تعبت فيه ولا ايه ولا هيه طنط سخنتك , الكلام ماعجبش جورج وسابلها البيت تلات ايام

أمل دبت خناقه مع جورج عشان ما خرجهاش من تلات اسابيع فجورج سالها هيه مامتك جت وانا بره ولا ايه فامل معجبهاش الكلام وقعدت تعيط وجورج ما صالحهاش, واحده بواحده  من الخناقه اللي فاتت !!  

الفلوس خلصت وقسط الشقه ما اتدفعش  

جورج نفسه أمل تكون زي مامته , أمل بتقول لجورج دادي ما كنش بيعمل كده معايا
جورج وأمل نسيوا ان باباها ومامته كنوا زيهم بالظبط من 30 أو 40 سنه
جورج وأمل بس نفسهم قصير وصبرهم قليل

فاقوا من كل الاحلام والعصافير اللي بتصوصو وصحيوا على ديون واقساط الفشخره اللي عملوها عشان يرضوا الناس والمظاهر

فاقوا على انهم يمكن ما يكونوش عرفوا بعض كويس

فاقوا على ان لو فعلا مفيش بينهم الحد الادنى من التفاهم ممكن الدنيا تتقلب عشان ملح زياده ولا قميص مش مكوي كويس

فاقوا انك لو بجد ما اخترتش صح ممكن ما تستحملش الي قدامك لان مزاجك مختلف عن مزاجه , الموضوع محتاج انك تكون عايز تستحمل عشان اللي قدامك يستاهل مش لانك مضطر تستحمل

اصل الحكايه صعبه واحد بيحب ينام في الضلمه والتاني عايز سهرايه

واحد بيحب الملح زياده والتاني اكله دلع

واحد اتعود يصحى بدري والتاني عايز يسهر

امزجه واذواق مختلفه في الاكل والشرب والتلفزيون والخروج فلو الحد الادنى من التفاهم مش موجود الخناقات حتكتر من اقل مشكله وعلى اتفه سبب

أمل وجورج في محكمه الاسره وافلام الشقه من حق الزوجه أو اريد خلعا , او اريد حلا  شغاله قدامه !!!!

جورج يفوق قبل ما يتقدم لامل فتساله كنت عايز ايه ؟ قالها حلو البارفان بتاعك اسمه ايه اصلي عايز اجيب زيه لنينه !!! أمل مش مصدقاه  أصل الرادار الانثوي لقطه من بدري نديله فرصه تانيه بكره ينطق , ومصيره ينطق  بس لما يضمن ان امل حتعمل undo  لكل الحاجات اللي خايف منها في سرحته الطويله قدامها !!!  اصل جورج ما يستغناش عن امل وامل ما تستغناش عن جورج !!!

امل وجورج النسخه المصري أم الاجنبي (3)

تبدا بخناقه على تمن الكوافير والفستان اصل جورج يا عيني جيوبه اتنفضت ومش ناقصه المزين بتاع امل اللي عايزله يجي 5000 جنيه عشان يمكيجها ويلبسها الطرحه بس الناحيه التانيه أمل شايفه ان منظرها وطلتها اهم حاجه في الدنيا ماهو الكوافير والفستان لازم يكونوا عالعريس امال هيه لابساهم لمين المهم تعيط شويه فجورج ما يستحملش دموعها ويسبل لها شويه بغمازاته الفظيعه ويدفع الفلوس وهيه تزقطط وتنتهي المشكله . ده دون الدخول في تفاصيل الفستان وثمنه !!!!

يوم الفرح لازم امل وجورج يدخلوا القاعه على انغام اسماء الله الحسنى بتاعه هشام عباس ويبدا اذاعه الاعاده رقم 33339866 لنفس بروجرام كل افراح المصريين

وزفه الشربات , وزفه الشبكه, واصحاب امل اللي الديجي حيخليهم يعملوا دايره حواليها واصحاب جورج اللي حيرموه في الهوا ويبهدلوا القيافه

وبعدين يبدا الديجي باذاعه اغاني حكيم على اوكا واروتيجا على عمرو دياب الجديد على عمرو دياب القديم على الزين والزينه بتاعه علي الحجار ثم الفستان الابيض ثم فقره الفيلم القصير للعريس وزيه للعروسه ونقفل بسهر الليالي , اه ونسيت فقره الدبكه من صفين ولاد قصاد بنات وكل واحد من المعازيم في الفقره دي يحاول يظبط البنت اللي عجبته تيجي قدامه في الدبكه " فراغ والله"

ويقعد جورج وامل يرقصوا يجي 24 ساعه في الفرح لحد ما يقعوا من طولهم

ثم تيجي زفه التورته ثم فقره الجيرب ثم البوفيه ثم شويه رقص ثم شويه رقص تانيين ثم يروح العريس والعروسه وهمه مش شايفين قدامهم

ثم لازم العيله كلها تروح معاهم وياخدوا لهم صور وكان الصور اللي اتاخدت مش كفايه ثم اخيرا ام الفرح خلص وتسمع أمل شخير جورج من تاني شارع .

في الصوره : تفتكروا هيه بتزقه ولا ماسكاه لا يجري بعد كل اللي حصل في التلات حلقات اللي فاتوا ؟!!
الحلقه الجايه : أمل وجورج بعد الجواز !!!
https://www.facebook.com/#!/562451227215431/photos/a.562476710546216.1073741828.562451227215431/588673921259828/?type=1&theater

أمل وكلوني النسخه المصري أم الاجنبي (2)

فعالم تخيلي امل علم الدين وجورج كلوني حبوا بعض واتقابلوا في مصر ودي الحلقه التانيه من امل وجورج النسخه المصريه:

 

تبدا رحله تجهيز عش الزوجيه واللف على محلات العفش الولاد عايزين مودرن بس الامهات عايزين ستيل , هو ايه اللي مودرن بلاش فرفره المهم الخشب الزان اللي يعيش بلاش قله عقل وتحصل هنا سيطره راس المال امال ايه مش همه اللي دافعين يبقى لازم العفش يجي ستيل من دمياط كمان !!!

نخش بقه على الرفايع : طقم صيني للضيوف وطقم اركوبال للضيوف القريبين وطقم تالت للاستخدام اليومي !!! يعني كده امل تدخل بيجي 1000 طبق وكوبايه , ونفس الشيء في الكوبايات والكااسات والمعالق والشوك والفضيه وفناجين الشاي والقهوه  وطقم الخشاف اهم حاجه طقم الخشاف اللي امل ممكن تعيش وتموت وما تستخدموش !!! ويبقى النيش اهم واكبر مشكله في حياه امل وجورج اصل من غير النيش الجوازه ما تمشيش

خش بقه عالفرش عشارتاشر ملايه ومفرش وفوط وبشاكير وبرانس وجو خزعبلي ملهوش نهايه , بالنسبه للبس امل لازم ترمي كل هدومها القديمه حتى لو لسه جديده ونجيب يجي مليون فستان وبلوزه وجيبه وكله مستورد عشان القيامه

يوم الشبكه تنزل امل وجورج وباباها ومامتها وباباه ومامته والعيله كلها ينزلوا ينقوا الشبكه مش بقه اتنين عايزين حاجه معينه تلمس معاهم ويفضلوا فاكرينها العمر كله , لاه بحسابات الحموات الفاتنات بتكون المنظره والفشخره لما الشبكه تطلع عالمونيتور في الفرح والناس تتفرج عليها ولازم تكون شبكه ما حصلتش ولا حتحصل في تاريخ العيله كلها

بعد البيت ما يتفرش ويتجهز وتتم الطقوس العفركوشيه من بخور والذي منه يقعد ابو امل مع جورج في موقعه القايمه اللي مكتوب فيها منديل الكيلنكس اللي حيعطس فيه جورج لما يجيله برد ويمضي سيادته على اللي جابه واللي ما جابوش والكاسات والصيني اللي أمل ذات نفسها حتكسرها لما تشوف صرصار في ارض المطبخ ويقوله معلش يا ابني انا بامن مستقبل البنت انا مش حاعيش لها العمر كله مش واخد باله ان اللي يامن مستقبلها مش شويه صيني وقزاز يمضي عليهم جورج وبعد ده كله يقوله احنا برضه بنشتري راجل , امال لو كنت بتفرطوا فيه كنتم عملتم ايه !!!

 

لو امل قرفت من جورج حترمي الجمل بما حمل ولو جورج قرف من امل حيزهق اللي خلفوها عشان تتنازل عن محتويات القايمه

الفكره في القايمه والمؤخر هيه عمليه تعقيد الخروج من العلاقه exit barriers زي ما بتوع البزنس بيقولوا بس في النهايه مش هيه اللي حتحافظ عالجوازه باللعكس قد تزيد المشاكل بين أمل وجورج

ارحموهم وسيبوهم يختاروا مستقبلهم وعفشهم وشبكتهم وشكل حياتهم بسيطه بقه ثريه همه حرين بلاش مناخيركم انتم والمجتمع تدخل في تفاصيل تفاصيلهم

الحلقه الجايه الفرح J وعقبال عندكم