في السيرك

سيرك مونت كارلو حبك لهم ينصبوا الخيمه بتاعتهم في طريق الشغل , رايحه جايه ابص عليها اقول عايزه اروحه عايزه اروحه

المهم في يوم وانا رايحه الصبح وقفت وخدت النمره واتصلت بالتليفون وعرفت المواعيد

تلات اربع ايام اروح بدري عشان اروحه يحصل حاجه , التذاكر تخلص , الحفله تكون سواريه اليوم ده وهكذا

انبارح اخيرا عرفت اروحه مع بابا , بس اكتشفت ان جوا كل واحد فينا طفل صغير بيتلكك عشان يطلع في اي مناسبه مهما كان عمره , بابايا مثلا راجع مبسوط جدا ووشه بيضحك من زمان ما شوفتوش كده , انا مثلا كنت قاعده اسقف معاهم واضحك واتخض , كنت خايفه جدا على مدرب الاسود وكل واحد من بتوع الاكروبات , وفضل البلياتشو كل ما يطلع ويصفر يضحكني , وكان نفسي يرمي لي الكوره والعب معاه , كنت مرعوبه على بتوع الموتسيكلات اللي بيجروا ورا وعكس بعض جوه كوره الحديد الصغيره , والبنت بتاعه الهولاهوب اسرتني باتسامتها وهيه مستمتعه بفقرتها . مع ان كل واحد فيهم عمل نمرته ميت الف مره الا اني كنت قلقانه على كل واحد فيهم وسالت نفسي ازاي كل ليله حاطين روحهم على ايديهم ده الغلطه هنا بفوره !!! وازاي بعد ما يخلصوا بيضحكوا قوي مع انهم ممكن يكونوا مهدودين من التعب او الخوف او حتى عندهم مشاكل في حياتهم

اكتشفت كمان ان حياتنا ما هيه الا سيرك كبير : المهرج اللذيذ اللي كل الناس بتحبه , الموهوب اللي بيعمل العجب اللي كل اناس بتسقفله , في كمان الراقاص اللي من هنا لهنا وممشي حاله وبيحشروه بين الفقرات وخلاص , في كمان اللي بيمشي عالحبل ويرقص عليه كمان, في الاسود اللي بنخاف منها وفي النسانيس اللي بنحبها , في التعبان الناعم وفي الفارس الجميل , فعلا حياتنا ما هيه الا سيرك كبير  

بحكي مع بابا ان دي تالت مره اروح السيرك واني عمري ما روحته معاه بس الغريب انه فكرني انها مش تالت مره و انها خامس مره وانه وداني قبل كده مرتين !!!. من ضمنهم في اللي في مصر وفي اللي بره بس اللي فعلا ما نسيتوش اول مره خالص روحت السيرك ايامها كنا اجازه في مصر وبابا كان سبقنا وسافر فعمي عزمنا عالسيرك القومي في العجوزه انا فاكره كنا واخدين بينوار قدام الحلبه مباشره وبعدها عزمنا عالعشا في نادي الظباط في الزمالك وقعدت حكيت عن اليوم ده لبابا وفوجئت بكميه تفاصيل كنت ناسياها واسترجعتها حبه حبه وابتسمت جدا وانا بافتكر اليوم ده  

واكتشفت ان اي ذكريات جميله بتحصلك وانت صغير مش ممكن تنساها عشان كده حاول دايما تكون الشخص ده مع اي طفل حواليك واعمل له ذكريات ما ينسهاش لانه دايما لما حيفتكرها حيضحك ويفتكرك ويمكن يدعيلك انك في يوم فرحته او اهديته ذكرى حلوه منك  سهله قوي بس مؤثره برضه قوي