أمل وجورج النسخه المصري أم الأجنبي(4):

خلصنا الخطوبه عالجهاز عالفرح وشهر العسل وراحت السكره وفضلت الغدره زي المثل ما بيقول

جورج عايز يفطر فول بالزيت الحار وامل عايزه باتيه وكرواسان أو عيش سن وجبنه قريش لزوم الدايت

جورج متعود في العيد عالفته بالخل والتوم وامل اساسا ما تعرفش بتتعمل ازاي

جورج كل ما يروح لمامته يقولها وحشني اكلك فمامته تزغر لها وهيه تكتم في نفسها

امل نسيت تغسل الفراخ وتنضفها فالشربه والاكل كله طلع زفر فجورج ساب لها الاكل وقعد يبرطم على انه جعان وتعبان وكان نفسه في لقمه كويسه

أمل ما بتعرفش تكوي فهدومه طلعت مكسره

أمل غسلت الالوان مع الابيض ففستانها الاحمر بوظ قمصانه البيضا

امل حامل وبتتوحم ومش طايقه الاكل ولا ريحته وجورج زهق خلاص , امل نفسها في البطيخ في الشتا !! جورج زهق من الدلع

أم جورج جت زارتهم ومعجبهاش التراب اللي على الكونسول اصل امل عندها شغل كتير ومش فاضيه تاخد اجازه عشان الست تيجي تنضف ,جورج يقرر انه كفايه شغل كده وبلاش بهدله ,أمل تقوله احنا متفقين اني اكمل شغل بعد الجواز و انت مش بتحترم كاريري اللي تعبت فيه ولا ايه ولا هيه طنط سخنتك , الكلام ماعجبش جورج وسابلها البيت تلات ايام

أمل دبت خناقه مع جورج عشان ما خرجهاش من تلات اسابيع فجورج سالها هيه مامتك جت وانا بره ولا ايه فامل معجبهاش الكلام وقعدت تعيط وجورج ما صالحهاش, واحده بواحده  من الخناقه اللي فاتت !!  

الفلوس خلصت وقسط الشقه ما اتدفعش  

جورج نفسه أمل تكون زي مامته , أمل بتقول لجورج دادي ما كنش بيعمل كده معايا
جورج وأمل نسيوا ان باباها ومامته كنوا زيهم بالظبط من 30 أو 40 سنه
جورج وأمل بس نفسهم قصير وصبرهم قليل

فاقوا من كل الاحلام والعصافير اللي بتصوصو وصحيوا على ديون واقساط الفشخره اللي عملوها عشان يرضوا الناس والمظاهر

فاقوا على انهم يمكن ما يكونوش عرفوا بعض كويس

فاقوا على ان لو فعلا مفيش بينهم الحد الادنى من التفاهم ممكن الدنيا تتقلب عشان ملح زياده ولا قميص مش مكوي كويس

فاقوا انك لو بجد ما اخترتش صح ممكن ما تستحملش الي قدامك لان مزاجك مختلف عن مزاجه , الموضوع محتاج انك تكون عايز تستحمل عشان اللي قدامك يستاهل مش لانك مضطر تستحمل

اصل الحكايه صعبه واحد بيحب ينام في الضلمه والتاني عايز سهرايه

واحد بيحب الملح زياده والتاني اكله دلع

واحد اتعود يصحى بدري والتاني عايز يسهر

امزجه واذواق مختلفه في الاكل والشرب والتلفزيون والخروج فلو الحد الادنى من التفاهم مش موجود الخناقات حتكتر من اقل مشكله وعلى اتفه سبب

أمل وجورج في محكمه الاسره وافلام الشقه من حق الزوجه أو اريد خلعا , او اريد حلا  شغاله قدامه !!!!

جورج يفوق قبل ما يتقدم لامل فتساله كنت عايز ايه ؟ قالها حلو البارفان بتاعك اسمه ايه اصلي عايز اجيب زيه لنينه !!! أمل مش مصدقاه  أصل الرادار الانثوي لقطه من بدري نديله فرصه تانيه بكره ينطق , ومصيره ينطق  بس لما يضمن ان امل حتعمل undo  لكل الحاجات اللي خايف منها في سرحته الطويله قدامها !!!  اصل جورج ما يستغناش عن امل وامل ما تستغناش عن جورج !!!