كحك بسكر

بيتنا في اخر كام يوم في رمضان مشهور بريحه الخبيز وحواج الكحك والقراقيش وبهجه الصاجات ورصها ودفا المطبخ وجماله بالذات لو رمضان كان في الشتا

بهجه ليس لها مثيل تبدا على يوم 10 رمضان من شرا الدقيق والسمن والعجوه والملبن والعسل الابيض لو حنعمله بالعجميه

ثم تنقيه الشمر والينسون للقراقيش

ثم المربى لزوم تلزيق البيتيفور واللانكشير

 

 

ثم تبدا طقوس الكحك من قدح السمن وريحه الكحك ذات الخلطه السريه بتاعه الحاجه ثم نقشه واحده واحده وكل واحده فينا ليها نقشتها الخااااصه جدا واللي بتكون علامه لنوعيه الحشوه جوه الكحكايه , بنعمله في اوضتي في التكييف قدام التلفزيون باستخدام الفرن الكهربا نقش وخبز عالهادي والرايييق قوووي وتتملي ريحه البيت بريحه الخبيز ونقعد نستنى الفطار بفارغ الصبر عشان ندوق الكحك ونبدا نرشه وناكله بالسكر

السنه دي عمتي العزيزه توفاها الله قبل رمضان بكام شهر فتبع الاصول مفيش كحك ولا خبز ماشي الاصول كده

لا اخفيكم سرا ان الكحك جزء اساسي من بهجه العيد بس مش مشكله وبالرغم من ان الشغل اهدانا علبه كحك لكل موظف لكن لا تغني عن بهجه الكحك,  اصل الكحك مش اكل وبس ده كل اللي فات وزياده يعني توزيعه على العيله والجيران والقرايب والصحاب وعلبه الكحك التمام اللي لازم تروح للاخت المتجوزه عشان دي الاصول ثم مقارنه كحكنا بكحك اللي حيهادينا بكحكه هو كمان !!! فراغ يمكن , بهجه اكيييييد

وعدى العيد والعيد اللي وراه وخلاص نسينا الحكايه دي

النهارده داخله البيت لقيت علبه في الصالون تخيلت انها بيتيفور ولا بسكوت ولا حتى قراقيش اصل مامتي بتعمل الحاجات دي طول السنه , ما لم اتخيله انها عملت شويه كحك صغنين لزوم التفاريح وقال ايه بمناسبه عيد ميلادي " اللي لسه بعد اسبوع" على سبيل التغيير ولا تتخيلوا البهجه والشهيه اللي اكلته بيها مين قال ان بعد العيد ما ينفتلش كحك؟  ومين قال ان الحاجه بره اوانها ملهاش طعم ؟ لا ليها طعم وريحه ولون ومختلف كمان تخيلوا اكلت كحك بسكر من غير مناسبه !!! في شهر محرم !!!  بس يا حاجه حنعمل تورته برضه في عيد ميلادي مش حتضحكي عليه !!!

https://www.facebook.com/#!/562451227215431/photos/a.562476710546216.1073741828.562451227215431/608224092638144/?type=1&theater