قاعدين في النادي فلقينا الجارسون جاي بطلبات
ما طلبنهاش فسالناه لمين قال ليكم, سالناه مين اللي طلب قال البنوته الصغيره سالنا
البنوته الصغيره طلبتي دول لمين قالت ليكم , ليه يا ماما , قالت قلت لما ادلع نفسي وبالمره ادلعكوا
دي كانت روايه صاحبتي عن تصرف بنتها ذات الست
سنوات بمنتهى البساطه والتلقائيه البنت قررت تدلع نفسها
ضحكت قوي وهيه بتحكي لي وقلتلها فعلا لو
مكنتش ادلعني مين حيدلعني
ردت هيه كمان بتنهيده قالتلي صحيح فعلا!!!
دي من عاداتي السيئه اني بافسحني واخرجني
وادلعني بس فعلا اكتشفت ان حتى اصحابي المتجوزين او المخطوبين همه كمان محدش
بيدلعهم
اصل الدلع ده لازم يكون حاجه intrinsic وملهاش دعوه حد في حياتك ولا لاه , ملهاش دعوه
كبيره ولا صغيره , حتى ملهاش دعوه اذا كنت (ي) راجل ولا ست
ودلع النفس والله مش محتاج امكانيات ماديه
ولا وقتيه ولا اي حاجه يعني مثلا ممكن تدلعيكي بكوبايه شاي مظبوطه, بقرايه كتاب
حلو , بتمشيه وقت العصاري , تروحي تقصقصي طروف شعرك , تصبغي , تحني (مرواح
الكوافير احد اكثر الاشياء فرحا عند البنات )
ممكن تلبسي وتسرحي شعرك وتحطي مكياج لنفسك ,
ممكن تنزلي تشتري اي حاجه ان شالله اسدال صلاه والله حيغير مودك
كلمي حد من صاحباتك واتكلم في الولا حاجه ,
العبي جيمس هيفي وهيسي مودك حيتغير والله
اقلك على حاجه اعمله بوله فشار وانتخي قدام
التلفزيون او مزمزي في شوكلاتايه مستورده حلوه كده ومتكلفه او حتى كورونا ام ورقه
زرقا !!!
روحي سينما وانت مزه وجميله حتى ولو رايحه
لوحدك , اعملي اي حاجه غير انك تقعدي تهزي الغم وتغربيليه
اصل لو مكنتش انا حدلعني مين حيدلعني , وكله
يدلع نفسه
والله معاكي حق
ردحذف