حنان بنت مصريه عاديه خااالص اتولدت بنت
لحارس عقار بسيط قرر يعلم بناته وما يشغلهمش في البيوت
عندت مع زمانها وقررت ما تكتفيش بدبلوم بعد
الاعداديه ودخلت ثانوي عام وبعده الجامعه ومش اي كليه دخلت هندسه , ما اعرفش اي
تخصص بس دخولها الجامعه وكليه عمليه صعبه زي الهندسه شيء يستحق التقدير
حنان رفضت عرسان كتير لانها قررت انها ترتفع
بمستواها وتخرج بره دايره الفلاحين والبوابين (مع كامل احترامي ليهم)
من كام يوم عرفت انهم في الجامع بيدعوا لها
عشان عندها سرطان في المخ وبتتعالج , وعرفت انها ام لطفل رضيع ما عنديش تفاصيل
اشتغلت فين ولا اتجوزت مين لان اهلها سابوا العماره اللي جنبنا من فتره طويله
حنان طول عمرها بالنسبه لي مثال للعند
والاصرار والارتقاء بالنفس من اول التعليم , الشغل, الجواز واخيرا المرض
النهارده عرفت ان حنان ماتت
حنان ماتت زي كتير عاشوا وماتوا بيعافروا مع
الزمن ويعافر فيهم في اللي نفد وعمل اللي عايزه وفي اللي الزمن كسره
يمكن ما سابتش فلوس ولا اطيان ولا حتى علم بس
هيه سابت في نفوس اللي حواليها المثال اللي اكيد ابنها حيتعلم يبقى زيه وما يرضاش
باللي الظروف فرضته عليه ويمكن يكون في يوم من الايام حاجه كبيره او حتى صغيره بس
الاكيد انه مش حيكون ابن حارس عقار لان امه رفضت ده وقدرت برغم من ظروفها تغيره
ادعوا لحنان وابن حنان وادعوا لنا ربنا
يسامحنا في تقصيرنا مع اللي زي حنان
االله يرحمها ويحسن اليها
ردحذف