باي باي 2020

كل سنه اتعودنا نترجى الجديده تكون كويسه ويمكن نلوم ونعاتب السنه اللي ماشيه لاي حاجه زعلتنا 

السنه دي مكنتش سهله على كل الناس ، في ناس اتالمت جدا ، في ناس فقدت شغلها او احلامها او قرايب او صحاب 

كل واي حد فينا عدت عليه بحاجه مكنتش سهله 

كفايه قوي الحبسه والخوف والقلق من كل واي حاجه 

وكلنا صناديق مقفوله على اشكال والوان تعب وحزن مايعلم بيها الا اللي خالقها 

بس نحمده ونشكره على كل حال وانه ادانا اللي نستحمله 

دروس كتير قوي الحقيقه في اللي بنتشارك فيه وفيه اللي بنخبيه 

الدرس الاهم فيها بالنسبه لي ان في ناس بتيجي وتمشي ما نعرفش حكمه ربنا منهم وفي ناس بتعرفنا قيمه نفسنا وفعلا الناس معادن في ناس الماظ وناس ذهب وناس صفيح وفي ناس بترجع لاصلها التراب اللي ربنا بينثره في عينك عشان تدمع شويه مش عشان انت وحش ولا عايز يعذبك ولكن عشان يشيل غشاوه عن عينك ويجلي نظرك ويكشفلك طبيعه الاشياء والناس حواليك يمكن في يوم تعرف الدرس ويمكن تعيش وتموت ما تعرفوش 

سنه 2020 مكنتش أسوأ سنيني بالعكس تماما كانت سنه المكاشفه وال self reflection الاصعب للان واللي كان بالمناسبه مؤلم ومحزن نفسيا وجسديا لكنه كان ضروري واعتقد لحكمه من ربنا اكيد اكيد حيحصل بعدها حاجات كويسه وكويسه جدا 

شكرا على كل الدروس وشكرا لله على جميل ستره وفضله وثقه كل الثقه في عدله وحكمته 

يجعلها سنه بيضه عالكريم سوداء عاللئيم منيله بستين نيله عاللي ينكد عالحريم 

كل سنه واحنا طيبين وبستره وفضله عايشين 

حمام الدار

حمام الدار 

قصه غريبه حقيقي غريبه 

حاله مختلفه معقده لاقصى درجه وتصيب القاريء بالملل احيانا التشويق احيانا التفكير كثيرا 

هيه في حقيقتها 3 روايات لا تستطيع تميز علاقتهم ببعض 

غالبا هي روايه داخل روايه بماضي وحاضر وماضي ابعد 

الراوي او الكاتب هو الخاضر المقيم وحيدا مجترا ذكريات الطفوله ثم الطفوله الابعد 

واثناء صياغه القصه لا تكتمل فتبعث وتتجسد احدى الشخصيات لاستفزازه اما للانتحار أو استكمال ما بدا لتكتشف ان نفس الشخصيه كانت في القصه الابعد ماهي الا معزه في الدار!!! 

حمام الدار في الروايه الحاضره تسليته الوحيده في وحدته والتي عند طيرانها ذكرته بحمائمه الصغيره في القصه الابعد او القصه الاولى 

وبصيره الجده العجوز التي لقنته فكره ان حمام الدار لا يغيب وافعى الدار لا تخون 

لا ادري حقيقه القصه الاولى هي ماضي القصه الثانيه او مجرد هذيان شخص مكتئب مقبل على الانتحار 

حمائمه الصغيرات زينه ورحال ضاعوا في القصه الاولى 

وكانوا رمز لاخوته الاربعه بتركهم المنزل في القصه الثانيه  وفي القصه الاخيره اكتشفنا انهم توائم انجبهم وتوفوا غرقا في نهايه القصه وانهم سبب انهيار حياته ورغبته في الموت 

لتنتهي بفكره ان حمام الدار يغيب وافعى الدار تخون وان الفراق هو سنه الحياه رغم كل تشبثنا بافكار من نوعيه حمام الدار لا يغيب وافعى الدار لا تخون 

عميقه ، كئيبه، محيره ، مثيره لتساؤلات القصه الاولى ممله ، القصه الثانيه شيقه ، ليربط بينهم جميعا روايه الراوي او الكاتب لتظل محتار في ترتيب الاحداث هل مترابطه ام هذيان ام قصه داخل قصه ام مجرد حلم لتنتهي الروايه بانها لم تنتهي واصيب الكاتب بملل ورماها في الدرج السفلي برغم من محاولات الشخصيات استفزازه لاستكمالها !!! 

كفايه لانك فعلا كفايه

انت مش كفايه 

اسوا حاجه اخترعوها كوسيله للتحفيز فكره انت مش كفايه 

والشخص المنحوس ده يعيش عمره كله يثبت انه كفايه 

من اول طفل في بيت وسط اخواته سواءبقه لانه الكبير او الذكر او الاقوى ونفضل نحسسه انه مش كفايه وياعين امه يطلع دفاعي انهزامي وعنده احساس انه مش كفايه فيتسول القبول بانه يعمل دايما extra mile عشان يبقى كفايه ويفضل تعبان وبيجري عمره كله عشان ينول الرضا السامي ، يفضل يخدم اللي حواليه على حساب نفسه او راحته او اهتماماته وبرضو مش حيبقى كفايه عشان حيفضلوا يستنوا منه دايما الاكتر من الكفايه

يروح المدرسه ولانه طلع على الفكره دي يفضل مش كفايه ويفضل يراضي في اصحابه وزمايله ومدرسينه عشان يكون كفايه وبرضو مش حيطلع كفايه لانهم حيفهموا ده بشكل غير واعي ويفضلوا يسرقوه عشان يقبلوه والانكى من كده انه ممكن اصلا يتنمروا عليه ويبقى كمان تسليتهم وقلشهم 

في عالم الصحاب حيكون بيسترضي الكل ويجري مع كب واي حد ويوم ما يعوز حد معاه مش حيلاقي حد حواليه عشان هو مش كفايه او عارفين انه كالعاده حيتصرف ويخلص فيتعبوا ليه 

في شغله بقه حيفضل يدوحر ويتعلم ويبص هنا وهنا ويلقط من ده وده ويتحول لشخص perfectionist عشان يكون كفايه ولا حيعجب دول ولا دول وحيستخبى في شرنقه يبعد فيها عن كل المؤثرات السخيفه لانه فعلا تعب طول رحلته ويفضل يجلد نفسه انه مش كفايه على صعيد اخر حيتهم انه بعد ده كله مش اجتماعي او عنده مشاكل تواصل او مش كفايه !! في حين ان اهل الحنجله والشنكله والمنظره ما بيعملوش نص مجهوده ودايما بيتغذوا على حته انه مش كفايه ويشيلوه فوق طاقته ويتفرغوا للاجتماعيات حتكون النتيجه انه حيتعب وينضغط ويغضل مقصر وهمه يتلمعوا ويوصلوا ويفضل هو مش كفايه 

يجي يحب ولا يصاحب ولا يتجوز يتشم فيه الحته دي ويتعرف عليه ناس من هنا وهناك عشان هو مش كفايه او يكون فعلا بقه شخصيه متكامله جدا من كتر الجري فيتخاف منه ويتساب لوحده لانه كتير قوي على اي حد عادي اما بقه لو حظه كان كويس حيتم استغلاله بس عشان هو مش كفايه فيفضل الشخص اللي بيدي على حساب نفسه وبرضو مش حيكون كفايه 

الى اللي بيعمل كده في الاشخاص الغلابه دي كفايه بقه كفايه واتقوا ربنا كفايه 

صديقي من لعب بعقله انه مش كفايه انت اكبر من كل الناس المستغله دي ارحم نفسك من استغلالهم وكفايه بجد كفايه ، 

كفايه عشم في انك تكون كفايه لحد كده لانك فعلا كفايه

 

اليس في بلاد العجائب

بافتح التلفزيون لقيت فيلم اليس في بلاد العجائب 

استرجعت ذكريات الطفوله المشرده لما كنت باتفرج عليه كارتون تعبان مدبلج بالعربي وقعدت بتوقعات رهيبه اهو فيلم انتاج القرن الواحد والعشرين وانيمشن وجو خزعبلي 

إلا أنه بعد شويه اكتشفت أنه سكه أو توقعاتي هيه اللي كانت في السما 

بالتوازي بعت لبنت اختي اقولها تتفرج عليه ولقيت واو في الفويسنوت وانشكاح وان ده اصلا الجزء التاني يا جاهله !! 

لقيتني باقولها أنه عندي كتاب وكنا بنتفرج عليه كارتون انا ومامتها 

ردت كده اني اديتها الكتاب فعلا مره وأنه معجبهاش وكارتون ايه ؟ 

قعدت ادور على يوتيوب لقيت كام حلقه وكذا نوع حلقات لحد ما وصلت للي كنت باتفرج عليه زمان 

وكم السعاده والانشكاح اللي حصلي الا أنه طلع كان على قده قوي وحتى ما لفتش نظر بنت اختي 

اكتشفت أن المبهر ليه زمان معدش مبهر دلوقتي لا ليه ولا لجيل الالفينات 

واننا كنا غلابه ياخال واي حاجه كانت بتبهرنا وتثير خيالنا حتى لو كتاب الحدوته الأصلي أو اول كرتون انتج ليها 

وان السعاده اللي حصلتلي الصبح اول مالقيته كانت شويه نوستالجيا وراحوا لحالهم 

بس الفيلم بجد وحش ومش نوستالجيا ولا حاجه 

ورن في وداني اغنيه هشام عباس زمان لما كنت صغير !!! ومحدش يقولي مش فاكرها !!!

سحسيات 11 : ما بعد الخطوبه, البدايه !!! :

سحسيات 11 : ما بعد الخطوبه, البدايه !!! :

تنجرف ليلى في حياه بلا معنى تشغل نفسها بالدراسه والجهاز كانها دابه في ساقيه بيمشيها اللي حواليها بدون انطباعات بدون فرحه بدون اي اختيار

يتجوز محمود سناء صاحبتها من غير موافقه الاهل ويستقروا في بورسعيد وتنزل سناء مصر لاداء الامتحانات فتكون على اتصال مكثف بليلى وتفتح ليلى ليها قلبها انها مش بتحب رمزي ومش طايقاه

تتخرج ليلى وتختار تعينها في بورسعيد بحيله عملتها من ورا الاهل وتقنعهم انها لازم تنفذ التعيين لحد ما يعرفوا ينقلوها وهناك تعيش مع اخوها ومراته وتشترك في التطوع

تشتد الامور في بورسعيد ويقرر محمود ينزلها مصر مع سناء وفي يوم رجوعهم تقوم غاره شديده وتشوف الموت بعنيها وتسترجع حياتها وابوها وامها والتقاليد ورمزي وحسين وكل ذكرياتها وهنا بس تحس قد ايه الحياه اهم واقوى من اي قيود وهميه عاشت فيها وتقرر ما ترجعش مصر وتشترك مع المقاومه والتمريض

تقابل حسين ويشوف المره دي توهج ونضاره ما كنتش موجوده قبل كده

ينتهي العدوان الثلاثي وتتحرر بورسعيد وينهدم تمثال دليسبس وليلى وحسين يقرروا ان دي بس البدايه 

في الفيلم اختصروا القصه دي كلللها وخلوهم يسافروا الصعيد هروبا من الغارات وهمه في محطه القطرليلى تقابل حسين مسافر بورسعيد وتطلع القطر معاه من وراهم 

اعتقد نهايه القصه اوقع لانها ماكانتش نهايه انفعاليه ولكن نهايه قرار ومعايشه واختيار حر بس السينما عايزه النهايه الحلوه السهله  الرومانسيه لما القطر طلع وليلى واقفه على المحطه ومتردده تبص لحسين وهو ماشي واهلها وهمه واقفين وهيه في النص , اعتقد كان فيه اسقاط من المخرج على المستقبل والماضي وفي الاخر تجري وتلحقه ويشدوها تطلع القطر وهو بيسيب رصيف المحطه في اخر لحظه وتنزل كلمه البداي  

قانون مخالفات البناء ٢٠٢٠

قانون المخالفات الجديد ، من سمعي لكل القصص الكوميديه من قرايبي واصحابي واللي حواليه مفيش فيكي يا مصر شقه ولا عماره مفيهاش مخالفه قبلي بحري قاهري ، زراعي !!!

الظريف أنه طلب من الناس تروح طواعية تپلغ عن نفسها عشان تتصالح وعاملها بالمتر والموقع والا قضيه وهدم عشان كسلان ينزل الناس تعاين وتحرر مخالفات 

الانكت من كده أن القانون بيقول بعد ٢٠٠٨ ومع ذلك في التطبيق مطبق بأثر رجعي حاجه هبل فعلا 

بيقولك صاحب العماره هو المتحمل منطقي ، بس أصحاب العمارات مدخلين السكان وخناقات وفصال وكله يقول التاني وانا مالي !!

تروح الأحياء مفيش حاجه متسجله بس يقولك برضو حيجيلكم مخالفات وفي ناس رفعت قواضي من سنين طويله وكسبتها يقولك ملناش فيه حتدفع أو نهد !!

طب يا سيدنا المسجل حاجه وارض الواقع حاجه يقولك الكمبيوتر مش متحدث طب لازمه ام الكمبيوتر ايه بروح اهلكم 

طب يعني اللي بيجي يشتري عربيه بياخد شهاده مخالفات طب اعمل حاجه كده في الشقق عشان إبراء ذمه وتأمين ضد جنان الاحياء ، مفيش ، ارجع النقطه اللي فاتت يمكن الكمبيوتر مش متحدث ، احيه بجد .

طب انا افهم الاراضي الزراعيه واوؤيد بشده هدمه اي تعديات عليها لكن السكني انت جاي النهارده تصلح فساد عشرات السنين ومدي مهله شهر ، الشهر ده دخول مدارس ووقف حال بسبب الكورونا وخوف من عدوى وزحام رهيب 

نجي بقه لفكره التصالح عاملها بالقسط كتر الف خيرك بس كمان كميه الاوراق والرسومات المطلوبه تحس ان من ضمن المطلوبات ورك نمله يتيمه كانت عائشه في بطن حوت احول !!!

وسبوبه للمحامين والمهندسين وموظفين الاحياء 

أخشى ما أخشاه انها قد تكون سبوبه أو عصفوره معموله لالهاء الشعب لخازوق مغري جاري تحميله للشعب كله يا بيه 

او لو فرضنا أن الناس قالتلك ضربوا الاعور على عينه قال خسرانه خسرانه هدوا اللي عايزينه وساعتها حضرتك حتهد مباني ومحلات وشقق مصر كلها ؟ اشك الصراحه 

انت عامل قانون شديد جدا في إجراءاته وطلباته وتبعاته يا بيه مش حتعرف تطبقه واللي حيستلوح بس ويعرض قفاه هو بس اللي حيعدي واللي حيخاف ويمشي جوه الحيطه هو بس اللي حيغرم ويتفرم وحيتعمل على قفاه احلى سبوبه ورشاوي الاحياء حتستمر وتزيد بسببه اساسا 

لو فرضنا القانون اتنفذ وجمعت كل الفلوس دي من أكبر لأصغر راس فيكي يابلد يابيه سعادتك حتلم فلوس يامه ياترى حيتعمل بيها ايه ولا حتروح الحفره الاداريه الجديده ويتبني بيها قصور وحاجات الشعب المطحون ما يستجراش يعدي من جنبها 

اللي حيبقى شبه كده برضو قانون المرور الجديد ابو ٣٥٠٠ مخالفه حزام ولا بق ميه وانت سائق 

بلاش يا اطخه يا اكسر مخه اللي ماشيين بيه ده نعمل قانون معقول له حدود زمنيه مش حاروح ادور على حاجات بقالها عشرات السنين وتحاسب عليها حتى لو مش منصوص عليها وتسأل يقولك هو كده وان كان عاجبك 

وعجبي !!!

نصيحه كل واحد يروح يدور على حاجته لأن في مفاجآت فشيخه لكل الشعب بكل طبقاته وأشكاله ومحافظاته

كيرلي

في عياده امبارح بنت جميله بتاعه ٥ سنين مثلا جايه مع مامتها 

شعرها كيرلي وقاعده مزويه كده 

بانكشها اسمك ايه سنه كام ما بتردش ، قررت انكشها بطريقه مختلفه هيه شعرها مجعد ويجنن بصراحه فباقولها انت عارفه أن شعرك جميل جددددا ال curles بتاعته حلوووه جدددا  ، بدأت تهتم ، مين اللي عمله ماردتش ، مامي ولا الكوافير ، لا هو كده وهيه زعلانه 

قلتلها يا بخخختك انت عارفه أن دي حاجه جامده جددددا 

ضحكت كده وبدأت تتجاوب 

الام كانت ناقصه تاخدني بالحضن واضح أن القصه دي مضايقاهم واكيد سمعت كلام بايخ كتير 

اهي كلمه ملهاش اي لازمه أثرت في ثقه عيله عنده ٥ سنين ونكشه بسيطه فرحتها هيه مامتها

انتو بتعملوا في الناس كده ليه ؟ ارحمو من في الارض يرحمكم من في السماء 

صباحكم سكر 

سحسيات 10 خطوبه ليلى :

مشاهد سريعه للجو العام:

جمود رمزي ووجهه الخالي من الانطباعات

سعاده ليلى المصطنعه واستجداؤها لاي كلمه حلوه من رمزي

المعازيم اللي مبسوطين بالجو والعوالم والاكل

ليلى ومراقبتها لاخوها وصاحبتها واكتشافها انهم بيحبوا بعض وتحفظ رمزي ان ده لعب عيال وشرعنه لشهوه بينهم !!

عصام ومغازلته لعروسه " لقطه " بيرسم عليها

جميله ومشاغلتها لرمزي عيني عينك وتحرشه بيها بنظراته برضو عيني عينك

كلها مشاهد لا يخلو منها أي فرح او خطوبه ليومنا هذا !!! وكان الافراح هيه وسيله يستخدمها العريس والعروسه لاثبات انهم فرحانين للناس حتى لو كان ده تمثيل في تمثيل ولتسجيل لحظات وهميه لايهام نفسهم والناس انهم عاشوها والسلام بغض النظر حصلت ولا لاه

فعلا افراحنا كلها تمثيل في تمثيل ومن اكتر من 50 سنه !!!

حتى الفستان : "تعرفي يا ليلي ان فستانك زي فستاني تمام بس فستانك مقفول وفستاني مفتوح "وتسرح ليلى وتفتكر فستان جميله وتقارن بين الفستانين فستان ليلى وجميله واحد ولكن فستان ليلى مقفول وفستان جميله مفتوح, اتصور في رايي المتواضع انه اسقاط على حياه البنتين جوه مجتمع لا يعترف الا بالاصول " اللي يمشي عالاصول ما يتوهش" زي ما والده ليلى قالت لها

نرجع للفرح ليلى تتخنق فتتروح تغسل وشها وتكتشف الوجه الاخر لبنت خالتها وعلاقه غير شرعيه تعيشها لتعوض بها تعاستها الزوجيه بعد رفض اهلها الطلاق عشان مش عايزين فضايح !!! ا 

ومشهد المواجهه اللي تالقت فيه جميله او شويكار في الفيلم واللي في اعتقادي كان اسطوري لانها في دفاعها عن نفسها قدام ليلى مثال الشرف والمباديء , عرت فيه المجتمع وافكاره وازدواجيه معايره , أتفرجوا عليه اللينك في الاخر

لتستفيق ليلى بخطا اختيارها وانها كانت فعلا بتهرب لرمزي من حسين , مكتوبالك يا سحس !!!!

https://www.youtube.com/watch?v=jBx18XAnOyI 

قرات لكم : اكتشاف مقبره توت عنخ امون لهوارد كارتر

               

احد درر المركز القومي للترجمه واحد اكبر الكتب المشتراه والذي اخافني من كبره لكن على العكس تماما من اكثر الكتب تشويق وجمال واسرعها قراءه !!!

الكتاب تاليف  هيوارد كارتر شخصيا اللي الحقيقه بعد ما خلصته مش عارفه كتبه امتى وفين وازاي

بدا بمقدمه طويييله عن حياه الشخصيتين الاهم في هذا الاكتشاف : هيوارد كارتر ( المكتشف العنيد) والللورد كارنرفو ( ممول التنقيب)

وازاي الشخصيتين دول على اختلافاتهم وتناقضهم قدروا بحلم مشترك يحققوا الاكتشاف العظيم ده

بدا بقصه كارتر وانه طفل لاب غير متعلم كل موهبه الاب والابن الرسم وانه ترشح للسفر لمصر لتحبير صور الاثار المكتشفه وهناك شرب الصنعه وحب المهنه وامتهنها ولانه شخص عنيد جدا ومحب للاثار جدا اختلف مع مجموعه من الفرنسين خالفوا التعليمات فاترفد من هيئه الاثار في مصر, ثم اشترك في الجيش الانجليزي في الحرب واترفد لاسباب مشابهه ورجع مصر واشتغل مرشد سياحي ورسام !!!  وهناك ماسبيرو رشحه للورد كارنرفو للاشتراك في اعمال تنقيبه عالاثار في الصعيد

اللورد كارنرفو الابن الاكبر لاحد لوردات الانجليز الاثرياء واللي مولود بمعلقه ذهب من يومه وحكى صولاته وجولاته في السفر والتجوال وقياده السيارات والصيد والابحار وحياه العز وحادثه شهيره كادت تودي بحياته واصابته بمشاكل بسببها في التنفس جعلته يقضي معظم العام في مصر والصعيد تحديدا لجفاف الجو وهناك يحب الاثار ويشتغل مع كارتر وكان القدر اراد جمعهم في هذه المهمه التاريخيه

ثم نبذه تاريخيه عن توت عنخ اتون المسمى لاحقا بتوت عنخ امون, ابن اخناتون ونفرتيتي بالتبني وزوج بنته عنخس ان با اتون او المسماه لاحقا ب عنخس ان با امون وصراع الاديان وسيطره الكهنه ضد التوحيد ايام اخناتون ورجوعهم لعباده امون وتغيير اسم الملك والملكه وحتى طمس الاسم القديم وكتابه الجديد في كل الاثار المكتشفه في المقبره وحتى الوفاه المفاجاه له بالملاريا وصراع الحكم وبحثها عن نجده في احلافهم العراقيين وارسالها في طلب زوج منهم حتى لا يضيع العرش وتاخرهم عليها وضياع سيرتها ومصيرها الغير معروف تاريخيا بعدها !!!

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                    

ثم قصص عن مقابر وادي الملوك وكم التمويه الذي قام به الملوك والكهنه لاخفاء المقابر وتاريخ عبث اللصوص بالمقابر من ايام الفراعنه وحكايا غايه في الظرف عنها وكم الفساد من ايامهم مما ادى بالكهنه بعمل خبيئات كثيره ونقل رفات كثير من الملوك وقصه اكتشافه لخبيئه الدير البحري ومقبره حتشبسوت بالصدفه في يوم مطره لما حصانه اتكعبل في مدخل مقبره حتشبسوت !!!مما اثار فيه مزيد من البحث املا في الوصول لتوت عنخ امون بالرغم من ياس معظم المنقبين واعتقادهم ان الدير البحري لايوجد به مزيد من الاكتشافات وعنده بالبحث سته مواسم متصله بدون نتيجه !!! الا من بعض اكتشافات بسيطه متبعثره لما وصلها ببعضها وصل لمكان تقريبي للبحث

كانت المشكله في كم الردم الموجود من التنقيبات السابقه له التي ازالها جميعها وكل ما وجده بعض مقابر عمال البناء التي كانت فوق قبر توت عنخ امون كنوع من التمويه وهنا قرر الاستمرار في البحث والتنقيب واللي عرفت بعد كده من افلام تسجيليه ان ردم الزلالزل والمطر والسيول الاف السنين اتكوم فوقها لمزيد من الحفظ للقبر الوحيد الذي لم يسرق طول 3000 سنه !!!

ثم يحكي عن يوم اكتشاف اول سلمه في المقبره وكم السعاده والخوف والترقب لحد ما وصل لاختام المقبره فوجدها اختام فوق اختام مما يعني انها عبث بها اللصوص وان الكهنه قفلوها وختموها مره اخرى مما قلل من حماسه لانها قد تكون فارغه الا انه استمر لحد ما تاكد انها لتوت عنخ امون قفل وسافر القاهره للتجهيز للحدث العظيم وشراء ادوات الترميم والنقل وكميات مهوله من الكراتين والخيش واللباد سيحتاجها لاحقا لحين وصول اللورد كارنرفو لحضور فتح المقبره

الحقيقه لفت نظري صبره وتانيه بعد كل هذه السنين شيئ يستحق التقدير والاحترام, حد تاني كان كمل من فرط السعاده وقله الصبر

وده حنشوفه كتير جدا قدام وصبره وتانيه في كل مراحل الكشف اللي استمرت 11 سنه !!! لانه كان بينتقل من غرفه لغرفه بعد تفريغها وترميم اثارها ونقلها للقاهره كمان !!!

وصف دقيق للمنظر العام لكل حجره وتصويرها على حالتها وترقيم الاكتشافات وتسجيلها ثم تصوير كل على حده ثم تصويرها على مقياس رسم

ثم وصف مفصل لبعض القطع المكتشفه وصورها وكيفيه التعامل معها داخل المقبره حتى لا تدمر والتعامل مع الزجاج والذهب والجلود والخشب  بل وتخيل بعض القطع من بعض اجزاؤها ولضم الخرزات في مكانها للحفاظ على الاثواب والعقود كل حسب طبيعته في المكان اولا ثم في المخزن المؤقت ( مقبره سيتي الاول بالقرب منها ) ثم تجهيزها لنقلها للمتحف المصري بالقاهره عمل دقيق وغايه في الصبر والتاني وتوثيق كل تفاصيل مرحله مرحله للحفاظ على كل تفصيله قد يحتاجها لاحقا

ونخاله التراب وادق الاجزاء المنفرطه واعادتها لبعض الاجزاء المكتشفه كم عمل وتركيز عجيب او حتى رفع مقاستها وعمل نماذج حديثه للاجزاء الباليه وترصيعها بالذهب والخرز المنفرط لاعاده بناء القطع مره اخرى

وفريق العمل المكون من مصورين وكيميائين من كل بلاد العالم وبعثات منافسه علمت بقيمه الكشف واشتركت فيه بغض النظر عن كونه من فريق منافس لا لشيء الا لحفظ التراث الانساني للاجيال القادمه

حكايات عن الاهتمام العالمي والصحفيين والسياح للاكتشاف وكم التعطيل الذي حدث ثم نقلها بسكه حديد بدائيه قاموا بنقل قضبانها كل ما مشوا عليها الى الوصول للنيل ثم شحنها للقاهره

وقصص اللصوص السابق ذكرهم وكيف تخيل ماحدث من شكل بعثره المقتنيات داخل الغرفه الاولى وكيف ان الكهنه لما وصلوا قاموا بجمع المقتنيات بغير نظام مما حطم بعضها وتخيله للسيناريو وكانه يطل من اله للزمن من واقع شكل الغرفه ومقتنياتها كم شغف وحب منقطع النظير !!!

ثم اكتشاف الغرف الداخليه والصناديق الذهبيه (داخل بعض) وفجأه انتهى الكتاب بدون مقدمات ولم يذكر مثلا كيف استخرجوها دون تحطيم المقبره مما استفزني للبحث عن افلام تسجيليه لاستكمال المتعه ورؤيتها مصوره اللينكات لاحقا

الكتاب سرد مصور رائع مليء بالصور والقصص والشغف والحب في كل كلمه مكتوبه عن شخص عنيد مثابر قرر فوصل كان ينقصه استكمال قصه باقي الاعمال ولكن اعتقد انه قد يكون توفي مثلا قبل نهايته او انشغل في الترميم ولم يستكمله الله اعلم

 

القصه استفزتني وبدات البحث طول اسبوعين بعدها على وثائقيات ولقيت فيديوهات ناشيونال جيوجرافيك اللي الحقيقه اثرت المعلومات اللي الكتاب فرشها لها وتحقيقات عن المقبره اللي طلعت بتاعه وزيره اللي سرق مقبرته واداله مقبرته ودفنه على عجل وحصل غلطه في التحنيط تسببت في تفحم المومياء

تحقيقات عن الكسور اللي عنده وقلبه اللي مش موجود وان الادله اثببت انه مات في معركه وعربيه حربيه هشمت جانبه الايسر بما فيه القلب والرئه عشان كده دي المومياء الوحيده اللي من غير قلب ولها شق في الجنب

الصربعه في الدفن وان بعض من القرابين والتماثيل مش بتاعته اصلا ومستلفينها من مقابر تانيه !!! حتى قناعه في كلام انه بتاع نفرتيتي واتظبط عليه في اخر لحظه لان لا يمكن في سبعين يوم يتعمل القناع المعجز ده بكل الاتقان ده

فيديوهات غايه في المتعه والثراء الحقيقه

 https://www.youtube.com/watch?v=5J9Ak1Hk9h4&feature=youtu.be&fbclid=IwAR1xAoiSiufLYdmELOcDArLaqPvydU1a8HkNEgDmuGRveF8L2fYWMxJKbKc

 

https://www.youtube.com/watch?v=buZ5EApEKxo

 

https://www.youtube.com/watch?v=iai43X5R-3Q&feature=share&fbclid=IwAR3dCVKCto30-msN_fWHfPflQjC_0i7Qcr6wt3dktZRRphDHTvvov3IFgYc

 

https://www.youtube.com/watch?v=BFUiE2MWR_8

امتحان الثانويه العامه

حلم متكرر بشكل مستفز الحقيقه هو حلم امتحان الثانويه العامه , جبر بقه, فيزياء وكتير جدا العربي تحلم انك ناسي الماده او مش لاحق تخلص او مش لاقي اللجنه او جوه الامتحان مش عارف تحل اشكال كتير جدا

ومع اختلاف وتكرار الحلم تبدا تسال هو فيه ايه وتكتشف من بوست عالفيسبوك ان الحلم ده وان كل جيلك تقريبا حلم نفس الحلم

سالت السؤال ده اتقالي من صديقي اللي دارس علم نفس قد الدنيا " عشان الصندوق بتاعها ماتقفلش صح تروما حصلت ولسه مفتوحة..

والعقل الباطن طالما حاجة مفتوحة هيفضل يلفت النظر ليها"

طب نقفل صندوقها ازاي , قررت اكتب عنها وبما ان معظم الاحلام كانت عن العربي فساحدثكم عن امتحان العربي يمكن نقفل ام التروما دي ونخلص : ليله الامتحان تقريبا لقيتني ناسيه كل المنهج , كلمت خالي ومدرسي قالي اقري المنهج قرايه جرايد انت مذاكره كويس ما تقلقيش قريت المنهج قرايه جرايد واكتشفت بعيدا عن تفاصيله قد ايه هو منهج تثقيفي وبشده كمان بلاغه وادب ونحو ونصوص وقصه انواع الشعر والقصص والروايات والمدارس الشعريه حقيقي كان منهج تثقيفي جدا جدا

العربي طول عمري انا وخالي بنقرا شعر ونفنده سوا وننقده سوا حتى من قبل الثانويه العامه حتى قبله جدي رحمه الله عليه ومذاكرته ليه طول اجازات الصيف وكنت شاطره جدا في النحو والبلاغه وكنا بتعرب القران ونطلع بلاغه اي بيت شعر في اي عصر وكنت بابقى مستمتعه بيه بشده فعلا

لدرجه ان مثلا في الثانويه العامه كان مقرر علينا في القصه قصه احمد شوقي وكلها شعر له , لما لقيت  حجم الكتاب المهول اتفقت مع خالي اني مش حاضيع وقت فيها وحتعامل معاها كشعر وبلاغه وحاعرف احلها وكل ماهنالك خدت فكره عنها من حصص المدرسه والبرامج التعليميه ونماذج الامتحانات وبس

كمان كان في مسرحيه طويله جدا عن كليوباترا حاجه وتلاتين  بيت شعر اتفقنا برضو حنعمل معاها كده وبلاش تضييع وقت

ويوم الامتحان وكما اتفقنا بدات بالنحو عشان اركز فيه واقفله لاني شاطره جدا فيه وقد كان وكملت كل الامتحان زي الفل وروحت غايه في السعاده , باراجع الورقه مع خالي اذ بي اكتشف ان في سؤال كامل نسيته ليه بقه؟ لانه كان في اخر ورقه اللي هيه ورقه النحو اللي بدات بيها وما رجعتلهاش فنسيت سؤال كامل من بابه !!!

تطلع النتيجه والاقيني ناقصه 16 درجه , اقل واجب لوحده سابت فرع كامل في الامتحان على غلطه هنا وغلطه هناك مع ان اجمالي الدرجات اللي نقصتها في المواد كلها 30 درجه منهم 16 درجه في العربي !!! وكانت درجه العربي زي الانجليزي بس واحد من 60 وواحد  من 50 الغريب اني سرحت كده لو كنت حليت السؤال ده كنت حابقى فين دلوقتي او مستقبلي كان حيتغير ازاي ؟ يمكن دخلت طب اللي فرق معايا نص نمره او رحت جامعه تانيه او اي حاجه؟ واكتشفت اني مكنتش حابقى سعيده باي حاجه من دول واني وبجد فرحانه بكليتي وجامعتي وشغلي وتخصصي ومكنتش حاختر اي حاجه تانيه خاااالص ومكنتش حاقلبل اصحابي وزمايلي ولا كنت حابقى مبسوطه لو اي حاجه حصلت اتغيرت

افتكرت كلمه مدرس الرياضيات بتاعي ربنا يديله الصحه لو عايش ويرحمه لو متوفي: ربنا كاتبلك كليه مش حتخشي غيرها مهما حصل احنا بس اسباب ومذاكرتك جزء من الاسباب عشان كل مستقبلك مكتوب وموعود من قبل حتى ما تتولدي وقد ايه كلامه كان بيطمن الواحد ويشجعه

ادي حكايه امتحان العربي وادي ال closure  اللي صديقي قالي عليه

يارب نخلص من الحلم الكئيب ده بقه 

لن اعيش في جلباب ابي

 

مين فينا ما اتفرجش على المسلسل 5 او 6 مرات ومين ما اتفرجش على فرح سنيه كفقره كوميديه اي وقت يكون متضايق؟

المره دي شديت الروايه من مكتبتي في حجم الجيب في 150 صفحه فونت متوسط يعني تخلص في قعده !!

الروايه الحقيقه كانت مفاجاه ليه لانها غير المسلسل خالص ولم تسلط الاضواء على عبد الغفور البرعي ولا عبد الوهاب ولا فاطمه ولا المعلم سردينه

الروايه على لسان حسين كراوي وصديق لعبد الوهاب في خطوبه عبد الوهاب على روزالين وتعرفه على نظيره واعجابهم المتبادل

وتستكمل سجالا بين حسين ونظيره كرواه للاحداث

طلع لن اعيش في جلباب ابي المقصود بيه نظيره اللي رفضت سجن اخواتها وفشلهم في جوازاتهم وحياتهم لانهم سجنوا في جلباب عبد الغفور

ونمو قصه الحب بينها وبين حسين ورفضها الجواز منه طول ما هيه ملهاش شخصيه وكيان بعيد عن اموال الحج عبد الغفور وعلى الهامش روايتها لاحداث القصه المطابقه تماما للمسلسل لكن الحدث اللي اتفرد له حلقات في المسلسل طلع سطر ونص في القصه

مش عارفه ده ابداع السيناريو في المسلسل ولا قدره احسان الهايله على الاختصار والتركيز اصلا على تيمه القصه وهي نظيره ولا الحقيقه الاتنين اصلا مبدعين

نهايه القصه بجواز نظيره وحسين بدون مساعده عبد الغفور بدون شقه ولا مهر ولا شبكه ولا مساعده عشان همه مش عايزين اي حاجه منه ولا نظيره عايزه حسين يحس انه قليل جنب فلوس ابوها فترفعت عن كل حاجه وتاسيس شركه مقاولات وبناء اللي كبرت جدا لكن المفاجاه كانت اصلا في اخر سطر اللي قريته كتير جدا لانه عملي aha moment  الحقيقه على لسان حسين " لا يثير الحساسيه بيننا الا عندما نتحدث احيانا وفي فترات متباعده عن الميراث , ميراثها من ابيها الحاج عبد الغفور. ان نظيره سترث ارثا هائلا يكفي لتغطيه مشروعات ضخمه ولكننا كلما تعرضنا لهذا الموضوع ننهيه بنكنه ونضحك. وتذوب ضحكتي وانا افكر في المشاريع الضخمه التي يمكن ان نحققها بعد ان ترث زوجتي نظيره اباها الحج عبد الغفور !!" مفيش فايده وكانها مطابقه لنهايه المسلسل لما عبد الوهاب فعلا عاش في جلباب ابيه !!!

سحسيات 9 رمزي :

 استاذها الجامعي اللي جسده بجداره في الفيلم محمود مرسي واللي خلانا كلنا وبجد نكرهه ونقرف منه شخص متسلط : الصح هو وجهه نظره وبس , يتابعها من بعيد لبعيد ويبدا يضيق عليها الخناق لحد ما يسجنها في افكاره وتبطل تفكر عشان تتخلص من غلاسته ففجاه تكون اسيره له وتفكر زيه تمام وتقتنع انه بيحبها وانها هيه كمان بتحبه !!!

يتقدم لها ويكون من وجهه نظر المجتمع العريس اللقطه اللي ما يترفضش , شخص متجمد الاحاسيس والانطباعات والملامح حتى ليله خطوبتهم كانت بتستجدي منه كلمه حلوه !!!

ولما سالته اخترتني ليه قالها عشان مطيعه وهاديه وبتسمعي الكلام , زي ما بيقولوا مؤدبه ومتربيه ومالكيش تجارب, هبله او ساذجه يعني !!!

لم يترفع عن النظر بشهوانيه لبنت خالتها يوم خطوبتهم واللي قالها بحزن كده انت مش زي جميله ( انت بس تنفعي زوجه مطيعه انما هيه حاجه تانيه وعشان كده اختار ليلى) , ولم يتحرج عند حديثه مع اخوها عن حبيبته انه مش ضروري يعني يتجوزها ويتصرف وخلاص بس الجواز لاه لان الاهل مش موافقين وان الحب ده مجرد غلاف لشرعنه الشهوه لا اكثر ولا اقل !!!

شخص  بيمثل الازدواجيه في المعايير اللي ماليه المجتمع وتفكير الناس واللي هربت ليها ليلى و"استسهلت " الخطوبه منه زي كتير من بناتنا للتخلص من ضغط الاهل او المجتمع او مجرد الهروب من قصه حب خايفه تكمل فيها لاي سبب من الاسباب

ياما بنات فرحوا بعريس مطابق لمواصفات المجتمع او حتى ظنوا انه انسان كويس بس دايما بيبقى في حاجه من جوه حديث نفس كده بينغص عليها تفكيرها ويقولها في حاجه غلط , ارجعي , مش هو لحد ما ستر ربنا يتم عليها وتكتشف وتتراجع وتتعلم ان الحديث الداخلي ده بيكون بواقي فطره او صله كويسه بربنا وهيه بس اللي حتحوش عنها مصيبه كانت حتقع فيها أو حتى تلبس في الحيطه وتكتشف الحقيقه بس المره دي بيكون فات الاوان

وكم من رمزي في حياه كل واحد فينا وكم من مرات وقع او حيقع فيه ناس كتير مننا

سحسيات 8 : الجواب 2 :

كل واحده سواء وهيه بتقرا الروايه او تشوف الفيلم في لحظه ما سرحت ان حسين بيكتبه لها !!!!  واحد واثق في نفسه وفي حبيبته, واحد فاهم المجتمع وانغلاقه واصوله وتقاليده الفارغه , واحد فاهم حبيبته اكتر من نفسها ومتفهم اللي هيه فيه

واحد بيطلب من حبيبته الانطلاق وواثق فيها وفي نفسه " فانطلقي يا حبيبتي، افتحى الباب عريضًا على مصراعيه، واتركيه مفتوحًا..
وفى الطريق المفتوح ستجدينني يا حبيبتي، أنتظرك، لأنى أثق بك، وأثق في قدرتك على الانطلاق، ولأنى لا أملك سوى الانتظار ..انتظارك.”

واحد صابر عليها قوي وبيحاول من وقت للتاني يتسرسب لها ويخليها تفك عن نفسها القيود اللي حطتها بنفسها لنفسها

واحد بقولها " وأنا أحبكِ وأريد منكِ أن تحبيني، ولكنّي لا أريد منكِ أن تفني كيانك فى كيانى ولا فى كيان أي إنسان. ولا أريد لك أن تستمدى ثقتك فى نفسك وفى الحياة مني أو من أي أنسان. أريد لك كيانك الخاص المستقل، والثقة التى تنبعث من النفس لا من الآخرين" مش من اول قعده اقعدي في البيت ومفيش شغل وانسي حياتك واهلك وناسك وافني نفسك في واحد تعرفيه من اول انبارح زي شباب الايام دي ما بيطلبوا

 

واحد من تاني بلد بيبعت جوابات ويحاول يلم الشمل ويصبر ويحاول الف مره  ,  هو صحيح هيه ليه الرجاله بطلت تكتب جوابات ؟ من بتاعه البوسطجي دي مش واتساب ولا ايميل ولافيسبوك مسج ليه ما بيغمروش البنت بنشوه وفرحه انه بيحاول عشانها ولو حد شافه تبقى وقعتهم سودا ؟ مجرد احساس الخطر ده منه ومنها بيسعدها ويحسسها انها تستاهل  ؟ جوابات من بتاعه فيروز وفاتن حمامه تستخبى في كشكول ولا تندس وقت السلام  ؟ هو ليه حسين بطل يبعت جوابات ؟ كسل ولا سرعه الحياه ولا غلاسه ؟  ليه بالرغم من قرب وسهوله الاتصالات الناس بتبعد لحد ما تتوه أو زحمه الحياه او كتر الصحاب او حتى اتاحه ستات وبنات كتير ممكن حتى يعرفهم من وراء بعض ويبقى واد برم ما جابنوش ولاده وده كل فكرته عن الرجوله !!! خايب وعبيط كمان . وتلاقي الستات في جروبات المشاكل بتشتكي الخيانه أو الاهمال والظلم وشويه وتنشف وتقف على رجلها وتفوق لنفسها واولادها أو حتى حياتها لو مفيش اولاد اوحتى ما اتجوزتش 

فين رجاله زمان فين مثال ابويا واعمامي ؟ فين الراجل الواثق من نفسه ومهندم في شكله وبيحب بيته ولاده ومخلص ليهم وبس مش اشباه الرجال دلوقتي وكل فكرته عن الرجوله في الامر والنهي والشخط والنطر والتحكم او حتى تعدد العلاقات او الزوجات حتى !!! في رجاله وفي ذكور بس في البطاقه !!! حد حيقولي ما الباب المفتوح كان فيه عصام وكان فيه حسين , اه كان في النموذجين يعني باسوا الفروض كان 50: 50  انما دلوقتي يمكن ما يوصلوش نموذج الراجل الحقيقي 10% حتى والباقي ذكور بالميلاد والتعداد السكاني ولما نقول الستات دلوقتي بقت الرجاله اللي كان نفسهم يتجوزوهم يقولك مسترجلين وبقوا مش ستات !!

في رايي الست انعكاس للراجل اللي معاها حتكون ليلى لو كنت لها حسين وحتبقى واحد صاحبك لو قلبت واحده صاحبتها !!!

مستنيه رايكم 

انذار

 سنين طويله عربيه جارنا مزعجه ولها انذار ليل نهار يصحيني
الحارسه النشيطه المزعجه العنيده من ٦ الصبح نغسلها وتصحيني
تعبت كلام معاها ومحايله فيها تأخرها شويه مفيش فايده كلمت صاحب العربيه مره خلاها تبطل ورجعت تاني ريما لعادتها القديمه .كان الحل اني انام تحت المخده مش فوقها عشان اعرف انام لأن نومي خفيف جدا ( انا لو خشب الدولاب ريح باصحى من النوم)
مؤخرا وبسبب مشكله ضهري ورقبتي مبقاش ينفع انام تحت المخده وبسبب آلامهم ونومي الخفيف مبقاش في نوم اصلا
قررت امبارح ابعت لجارنا عالواتساب الوضع كاملا
فوجئت برساله طويله كلها اعتذار وأنه حيوطي صوته وحساسيته ويخلي الست نغسلها بعد ٨.٣٠
لاول مره من سنين انام واصحى لوحدي مش بانذار العربيه
احنا ليه مش بنتكلم عن الحاجات اللي بتضايقنا بسهوله وليه بنجاهد لوحدنا وليه اللي بيضايقك ما بتقولوش انك متضايق وايه اللي ضايقك
بتاخد وقت طويييل معاناه والموضوع بسيط والله

سحسيات 7 : الجواب 1 :

عزيزتى ليلى

لم أكن أريد أن أستعمل كلمة "عزيزتى" بل أردتُ أن أستعمل كلمة أخرى، كلمة أقرب إلى الحقيقة وإلى شعورى نحوكِ ولكنّي خفتُ أن أخيفكِ وأنا أعرف أن من السهل إخافتك. من السهل بشكل مؤلم، مؤلم لي على الأقل.

وهذا أيضًا هو سبب ترددي فى الكتابة إليكِ ولكن حنيني الجارف إلى الوطن لم يترك لى الاختيار فقد أصبحتِ أنتِ رمزًا لكل ما أحبه في وطني وعندما أفكر فى مصر أفكر فيك وعندما أحن إلى مصر أحن إليكِ وبصراحة أنا لا أنقطع عن الحنين إلى مصر.

أكاد أراك تبتسمين، فأنت لا تصدقينى. أليس كذلك؟ أنتِ لا تثقين بي. أنت تقيمين بيني وبينك الحواجز، أنت لا تريدين أن تنطلقي وأن تتركي نفسكِ على سجيتها، لأنك تخشين أن تتعلقي بي، أن تفني كيانك في كياني، أن تستمدي ثقتك فى نفسك وفي الحياة مني، ثم تكتشفي كيانك مدلوقًا -كالقهوة- فى غرفتي.

وأنا أحبكِ وأريد منكِ أن تحبيني، ولكنّي لا أريد منكِ أن تفني كيانك فى كيانى ولا فى كيان أي إنسان. ولا أريد لك أن تستمدى ثقتك فى نفسك وفى الحياة مني أو من أي أنسان. أريد لك كيانك الخاص المستقل، والثقة التى تنبعث من النفس لا من الآخرين.
وإذ ذاك –عندما يتحقق لكِ هذا- لن يستطيع أحد أن يحطمك، لا أنا ولا أي مخلوق. إذ ذاك فقط، تستطيعين أن تلطمي من يلطمك وتستأنفى المسير. وإذ ذاك فقط تستطيعين أن تربطي كيانك بكيان الآخرين، فيزدهر كيانك وينمو ويتجدد، وإذ ذاك فقط تحققين السعادة فأنتِ تعيسة يا حبيبتي، وقد حاولتِ، ولم تستطيعي، أن تخفى عنى تعاستك.

لقد انحبست فى الدائرة التى ينحبس فيها أغلب أفراد طبقتنا، دائرة الأنا، دائرة التوجس والركود، دائرة الأصول، نفس الأصول التى جعلت عصام يخونك، وجعلت محمود يشعر بالعزلة فى معركة القناة. وجعلت طبقتنا، كطبقة، تقف طويلا موقف المتفرج من الحركة الوطنية، نفس الأصول التى تكرهينها وأكرها، ويكرها كل من يتطلع الى مستقبل أفضل لشعبنا ووطننا.

وفى دائرة الأنا، عشت تعيسة، لأنك فى أعماقك تؤمنين بالتحرر، بالانطلاق، بالفناء فى المجموع، بالحب، بالحياة الخصبة المتجددة.

عشت تعيسة لأن تيار الحياة فيك لم يمت بل بقى حيًا يصارع من أجل الانطلاق.
فلا تنحبسى فى الدائرة الضيقة، إنها ستضيق عليك حتى تخنقك أو تحولك إلى مخلوقة بليدة معدومة الحس والتفكير.
انطلقي يا حبيبتي، صِلِي كيانك بالآخرين، بالملايين من الآخرين، بالأرض الطيبة أرضنا، بالشعب الطيب شعبنا.

وستجدين حبًا، أكبر منِّى ومنكِ، حبًا كبيرًا، حبًا جميلًا، حبًا لا يستطيع أحد أن يسلبك إياه، حبًا تجدين دائمًا صداه يتردد فى الأذن، وينعكس فى القلب، ويكبر به الإنسان ويشتد: حب الوطن وحب الشعب.

فانطلقي يا حبيبتي، افتحى الباب عريضًا على مصراعيه، واتركيه مفتوحًا..
وفى الطريق المفتوح ستجدينني يا حبيبتي، أنتظرك، لأنى أثق بك، وأثق في قدرتك على الانطلاق، ولأنى لا أملك سوى الانتظار ..انتظارك.”

قريتو الجواب او حتى حللتوا المشهد ازاي؟ مستنيه رايكم وتعليقكم