جت الحزينه تفرح

في نقلتي من صلاح سالم الاوتوستراد بنعدي جوه مقابر بس عادي الناس رايحه جايه وعادي 

فجأه كده من بعيد زحمه ولمه ودوشه في حته مفترق طرق قلت يمكن جنازه وواقفين يجمعوا بعض عشان الدنيا ليل وكده 

لما قربت اكتشفت انها عربيه نص نقل خبطت عربيه ملاكي والبنت لوحدها والناس ملمومه 

صعبت عليه بس حقيقي خفت اقف ولا اعمل حاجه وكملت طريقي ولا يكلف الله نفسا إلا وسعها 

شويه واكتشفت زحمه عربيات بس ما طلعتش بقه جنازه طلعت زفه عفش عروسه وكميه عربيات نقل سائله جهاز البنت وكميه عربيات ملاكي وكلهم واقفين 

اتاري ايه بقه العربيه النقل بتاعه الحادثه طلعت من ضمن عربيات الجهاز بتاع الغلبانه اللي حظها خلاهم يعدوا بجهازها وسط الترب وسواق غبي عمل حادثه بيه 

البنت صعبت عليه لأنها اكيد حتتشائم ، وممكن جدا عريسها يفضل العمر كله يحكي القصه دي حتى من بابا النكش أو التندر اوحتى الجهاز في وسط الزيطه يتقلب من الناس الملمومه دي 

ونسيت اصلا الغلبانه اللي عملت الحادثه 

اكيد المولد حينفض والعربيه حتتصلح وجهاز العروسه خيتفرش بس حيفضل نغزه كده تتنغز بمناسبه أو من غير كل فتره عشان سواق غبي أو حتى واحد قرر يختصر الطريق ويخش بعفش عروسه وسط الترب 

اييييييه دننننننيا

جت الحزينه تفرح ما لقتلهاش مطرح

قصه الحضاره

بقرأ في قصه الحضاره قد ايه الطبيعه والموارد زمان كانت متجدده وكل الناس عايشه رايقه ومش محتاسه وبتجري عالفلوس 

اه كان في طبقات مطحونه بس بلغه الايام دي برضو مرتاحين 

يمكن لان الناس كانت قليله والأرض لسه جديده والناس رايقه وبتبني حضارات وآثار روقان 

يا ترى لو اكتشفوا كوكب جديد وقررورا ينقلوا الارضينن له حيختاروا مين يروح ؟ حنروح بفكر الأرض الاناني برضو ونكرر الماساه ولا حيفرمتوا دماغ اللي خيسفروهم ونعيد قصه الحضاره 

ولا انا دماغي لسعت ولا رافضك يا زماني يا مكاني يا اواني انا بس عايز اعيش في كوكب تاني ؟! 

اي كلام

يوم تلات

فتحت الراديو على عمرو دياب بيغني ليوم التلات بس الحقيقه على "واحده واحد عليه بتميل " بس انا سمعتها بتنيل !!! قلت ماشي بدايه ظريفه ليوم تلات ذو المشوار الاسبوعي من كل اسبوع من اقصى القاهره لاقصاها

بس الحقيقه فرحه الهضبه بيوم التلات ما ساعدتنيش خالص في كم العبث والكوميدياء في الشوارع واللي بيعكس كم العشوائيه والانانيه للشعب المصري وكل واحد متخيل نفسه ووقت اولويه وطظ في الباقي

المشي عكس الاتجاه, البوز بيز , التكاتك اللي ماشيه في كل اتجاه, ناس ماشه حرفيا في نص الشارع , ناس نايمه وشبه بتحلم كمان , عامل فرن بلدي شايل طاوله عيش سخن مفقع وماشي يترقص ما تعرفش مبسوط ولا سكران بس عايز تنتش منه رغيف سخن تاكله حاف

موتوسيكلات وعجل وعربيات مشهد سريالي عبثي الحقيقه مع كثير من البلاليع المفتحه والشوارع المدغدغه واللي موجوده في كل حته وفي كل طريق واللي ما فرقش معاها خالص انك نازل من 7 الصبح عشان تخلص وتوصل شغلك في ميعاده ولا فرقت

سيبوكوا بقه من كل ده ويكتمل العبث بشخص ظريف جدا او مجنون جدا قرر يتبول في نص الشارع حرفيا وقدام معهد ناصر في قارعه الطريق ومش بس كده حضرته بيرش يمين وشمال ومستمتع الى اقصى درجه

هو الحقيقه ضحكني جدا بالرغم من صدمه المنظر بس برضو عمل اللي كلنا نفسنا نعمل على شوارعنا العبثيه بالناس اللي فيها اللي وبجد ينقصها موسيقى السيرك ليكتمل المشهد !!!  قالك يوم تلات قاااال

 



انسانيه المولد

ماشيين في الشارع لقينا اللي بيوقفنا بابتسامه ، تخيلت أنه افتتاح فبقوله ايه ده قالي كل سنه وانتم طيبين مولد النبي 

وأصر يدي لكل اللي في العربيه

ودي كانت احلى انسانيه ( مسمى لعائلتنا الكريمه عن المفاجئات الساره ) اتعملت

مقلتلوش غير اللللللله كل سنه وانت طيب 

شربات ورد متقطع فيه موز وطعمه كان فريش ومسكر وجميل 

لسه فيها حاجه حلوه 

مزززيكا

حد من أصحابنا بره حط بوست أن في فرح اجانب عايزين اغاني مصري على سبيل التغيير 

اللي دخل قاله مهرجانات عمري ما سمعت عنها وحاجات غريبه 

العبد لله قاله شويه اغاني قديمه على جديده حاجات هادئه وظريفه من وجهه نظري المتواضعة، بعدين قلتله بلاش مهرجانات 

وعينكم ما تشوف الا النور واحد دخل فيه تهزيق ليه مهرجانات ولا عشان بتاعه الناس الفقراء !!!! ايه العلاقه مش فاهمه ، انا مش بنت نجيب ساويرس حررتك عادي كلنا ولاد تسعه !!! 

قلتله ده ذوقي ووجهه نظري وان المهرجانات فيها اسفاف ودوشه ومفيهاش قيمه 

دخل اداني محاضره في قد ايه اني متعاليه وشايفه أن ذوقي متعالي  

سبحان الله والله ده اللي المفروض بقه شكله فنان بقه وعايش بره دخل فيه تهزيق وشتيمه في الاغاني الشرقيه والربع تون .....

هو ايه القيمه اللي المهرجانات بتقدمها لما يقول أنا شارب سجاره بني وحاسس أن دماغي بتاكلني !!! 

ولا التاني ده اللي بيقول هاتي بوسه يا بت 

انا حي الله قلتله شغل : دقوا المزاهر ، زغروته حلوه رنت في بيتنا ، عارفه ، لما النسيم ، الزين والزينه وحاولت اخد من كل فيلم وذوق اغنيه العادي، القديم، اللي بيرقص وخلاص هو حر بقه يشغل ايه 

الحقيقه انا اشتريت دماغي خالص وتركت المنافسه وعملت turn off notification واشتريت دماغي توفيرا بحرقه الدم وإخراج صاحب البوست اللي ماردش على حد من باب اننا الاتنين أصحابه

وسحبت نفسي ان شاله ما سمعوا حاجه ولا محتاجه بلا هرشه نفوخ !!! 

ادي بوست تافه خد هلك وطاقه بدون اي مناسبه !!! ابببببه يا جدعان بس !!!!

وعجبي

النادي عندنا فجاه اكتشف أن القانون يحتم انتخاب وليس تعيين مجلس اداره 

قوم عشان يتحايل عالقانون يطلع كل من هو ليس في هيئه الطرق والكباري ويسميهم أعضاء زائرين عشان ما يخشوش الانتخابات وعشان شويه شويه يبقوا ضيوف في النادي اللي اصلا قائم على اشتراكاتهم لان التانين عايشين اصلا سفلقه علينا 

قوم الأعضاء يرفعوا عليهم قضايا ويبهدلوا بعض ويكسبوا القضايا بس اللي ما رفعش القضيه وكان قاعد يتفرج عالكنبه يتقاله روح ارفع انت كمان قضيه. 

مع أن ايام ما بدا وعملنا العضويه من ٤٠ سنه مكنش في غيره في الحي اللي متسمي اصلا على اسمه ولا كان في ذكر للطرق والكباري اللي فجاه بقه اسمه نادي م نصر للطرق والكباري 

في يوم من الايام كان بسعر الاهلي م نصر ٧٠٠ جندي بحالهم 

النهارده عرفت أن عضويه الاهلي من السنه الجديده حتبقى بمليون بلبل 

اه والله زمبؤلك كدهووون 

وعجبي 

بوست مش سياسي خااالص والله 😆😆😆

ان الله يحب اذا عمل احدكم عمل ان يتقفنه مش ينجزه

مشكله بلدنا مش في اللامسؤلين ، لا ابسولوتلي خالص

ولا المطبلاتيه ولا المبرراتيه ولا حتى العملاء ولا الاخوان ولا العلمانين خااالص

مشكلتنا أن جيناتنا حتى في حياتنا نظريه السهل السريع اللي هو خلص من عالوش وانجز وخلص

مذاكره ننشن على المهم

شغل من عالوش

حتى الشارع تلاقي اللي ماشي عالقواعد مركون في الصف والبلطجي الحلنجي هو اللي لف من أقصى اليمين ودخل اليوترن وعدى ووقف الشارع وهو برضو اللي حيوصل الاول والتانيين لسه في الصف

ويتقال على الاشكال دي مخلصه ومدقدقه وتعرف توصل

أما التانيين يتقال عليهم معقدين، نمكيين، محبكين ، مزودين
وهمه اللي بيفضلوا في اخر الطابور وهمه همه اللي بيتقال عليهم ثورجيه أو مزعجين او مش ممشين حالهم وهمه اللي في الاخر بينجننوا من كل الأشكال السابق ذكرها

وهو هو اللي بعد يومين حترجع فيه ريما لعادتها القديمه

المجتمع هو اللي شجع الثقافه دي وهو هو اللي امبارح ياعيني اتفاجيء أن الدنيا بظرميت في حته صغنونه قااااد كده هيه الطرق والكباري اللي فلقوا دماغنا بانجازاتها في احياء اصلا مصنفه أنها راقيه !!!!

مستغربين أن الطريق الدائري الجديد اسفلته هبط وقفلوه النهارده ده لو امي عامله كيكه اسفنجيه حتبقى ماسكه نفسها يومين ولا حاجه !!! كام مليار اتهلبوا في كل الانجازات دي

احنا البلد اللي اكتر آثارها عمرها بآلاف السنين واخر إنجازاتها اتهدت في غمضه عين لو بتسموها انجازات

احنا البلد اللي احلى لقطه في استقبال أو وداع سائح هي perfection leads to eternity وحاطينها على صور آثارها وللأسف هيه هيه البلد اللي نفس ذات المطار غرق امبارح !!!

ربوا عيالكم ابوس ايدكم وان مكنش عندكم خلق للتربيه الهي يعمر بينكم بلاش تتنيلوا تخلفوا كفايه عاهات

علموهم أن الله يحب إذا عمل أحدكم عمل أن يتقنه مش أن ينجزه !!!

اللي احنا فيه ده قله ضمير ، قله ضمير ناتجه عن قله التربيه

يارب القيامه تقوم ونخلص بقه

وعند الله تجتمع الخصوم

حفله بليغ

اللي يعرفوني كويس يعرفوا عشقي للاوبرا وبالذات حفلات الموسيقى العربيه وبالاخص حفله بليغ 

ولجل الصدفه اصلا حفله بليغ كانت أول حفله موسيقى عربيه احضرها ،ومش بس كده بالصدفه كمان 

كان في عزومه مؤجله لعيد ميلاد اختي في الاوبرا ونظرا للخبطه مواعيدنا لم تتفق من مايو إلى أن حصلت بالصدفه في سبتمبر 

كلمت جوزها اساله جايين الجمعه ؟ في حفله حلوه عايزه اعزمها ، معرفش ظروفهم وقالي خليها بظروفها واتفقنا أنه لو جم مايفسدش المفاجاه 

كنت متصوره اني حاروح اشتري التذكره يوم الحفله ببساطه ، اول مره بقى موسيقى عربيه 

يجوا جايين وتلبس جينز عادي ، يقولها لا غيري ، البسي احلى ، وهيه مش فاهمه ، انا رايحه لماما يعني مش راحه فرح ، ولانها ستوته المطيعه تنفذ من غير ما تعرف السبب .

يوصلوا يلاقوني لابسه اخطفها وانزل وهيه مش مقتنعه بالجنان ده 

نوصل الاوبرا مأ نلاقيش تذاكر واكتئب وهيه تتظاهر أنه مش فارق ، المشكله ان طول الطريق باقولها حفله واو وتخيلي بليغ وبدايعه ولما قالوا لي كومبليه اتخنقت

افتح سايت الاوبرا ادو اشوف ايه النهارده في مسرح الجمهوريه أو الموسيقى العربيه ما الاقيش 

طب سينما اكتشف أننا اتاخرنا ومش حنلحق 

قلتلها والله لنحضرها وهيه بتبصلي باستعجاب ايه المجنونه دي ، يالا نروح ،العيال ، ماما اي كلام عشان ما تضتيقنيش 

اروح لموظف الاستقبال ، عندكم اي حد رجع تذاكر يسألني ليه احكيله اللي حصل سكت كده وقالي خليكي واقفه شويه بتحصل 

اقف ومحدش يجي ، الاقيه كل شويه يشاورلي اصبري تقريبا قرى يتصرف في الكراسي الاحتياطي ولا ايه معرفش 

المهم متابعته لينا كل شويه اكدت لي اننا حنحضرها 

وهوووووب الالقي جروب كبير جاي ومعاهم تذكره زياده صاحبها ما قدرش يجي يقوم يبعتهم ليه واشتريها 

سحر بقه بتقولي حنعمل ايه بتذكره واحده ، قلتلها لو مجتش التانيه حاقعد اشرب حاجه في اي حته واجي اخدك بالليل وهيه قال خايفه على فلوسي وتقولي بلاش جنان ما تشتريهاش 

شويه وهوووووب اتنين جايين علينا بتقولي احنا ضيعنا تذكره يا تبيعي لنا بتاعتك يا تشتري بتاعتنا ، قلتلها دي عيد ميلاد اختي ، بصتلي وقالت لي والله ما تغلى عليكي 

واشتري التذكره التانيه وندخل المسرح صحيح مش جنب بعض بس مش مشكله 

شويه وفي الاستراحه نتصرف ونقعد جنب بعض ونندمج ونغني معاهم وكمان نتصور مع سميره احمد ونخلص الحفله 

واحنا مروحين اعزمها على ايسكريم ونروح منتعشين الصراحه 

احلى حفله حضرتها للان لأنها مكنتش مترتبه وكلها صدف وضحك 

واتلوث بحفله بليغ ولازم احضرها كل سنه وافتكر اليوم ده واضحك كتير كل مره 

مش بس لأنه متنوع ومجنون وموسيقاه مجنونه إلا أن حضور حفلاته بالمناسبه كل سنه بيجي صدفه أو بسهوله معرفش ليه 

تجليات الغيطاني

ملحمه ذاتيه وقصه حياه الاب والام والابن كل على حده ثم مجتمعين ثم متفرقين 

تخيل الغيطاني انسلاخه عن جسده ورؤيه ما كان وما سيكون من خارج جسده وكأنه يشاهد حياه الأجداد ثم الآباء ثم نفسه ثم تفوق على نفسه في خيال لحياوات تمناها لنفسه أو قد تمناها في وصف وتشريح لصراعه النفسي بين نفسه وبين أصله ذلك الصراع المنتهي بصدمه نهايه الكتاب بوفاه الام وعودته للواقع 

مزيج من الدروشه والواقعيه لدرجه انه في بعض اوقات لم يستوعب القاريء الزمان أو المكان من شده الصنعه والإتقان في الكتابه 

لم يخجل من تفاصيل حياه الأجداد والاباء البسيطه أو تمنياته لحياوات تمناها ولم يعشها 

هو حاله متفرده لا اعتقد قدره ايا من كان على محاكاتها 

حقيقي من أصعب ومن اجمل ما قرات 

رحله استمرت في ٨٣٥ صفحه قسمتها على ٣ اشهر وامتعتني بشده وودعت الكتاب بكثير من الدموع ، سامحك ورحمك الله

عاشوراء

عاشوراء 

زي كل مناسباتنا الدينيه وغير الدينيه مرتبطه بالاكل 

العيد الصغير الكحك ، الترمس والبلح قال ايه عشان نسند قلبنا بعد الصيام ونهضم بالترمس والبلح 

العيد الكبير لحمه عشان دابحين ورقاق مناسب بدسم اللحمه 

شم النسيم البيض والترمس والملانه والفسيخ والرنجة وحواديت البعث والحياه بتاعه الفراعنه 

مولد النبي وحلوياته وعروسته وحصانه وتراثه الطويل 

راس السنه الهجريه والرز باللبن والفطير أو اي مخبوزات عشان تبقى سنه بيضاء كلها خير 

الغيطاس والقلقاس ومص القصب 

الكريسماس والحلبه المنبته جوه ابريق يترمي مع بدايه السنه عشان تبقى خضراء

اكل اكل اكل 

بس ما استوقفني وبشده هو عاشوراء اكله رايقه كده وبنت ناس وصوتها واطي وعمري ماعرفت حدوتها 

بحثت كتير قوي واختلفت فيها الأقاويل 

مصادر قالت احتفل بيها يزيد بن معاويه بمقتل الحسين عشان كده ليس من الادب ذكرها قدام الشيعه لحساسيه الموقف 

مصادر تانيه قالت إن صلاح الدين الأيوبي دخلها مصر لما جه عشان يحل محل بعض اكلات الفاطمين الحزينه في هذه المناسبه ولأن المصريين شعب مفرفش سمعوا الكلام وكلوها وكملوا بيها ونسيوا الاكلات الفاطميه 

مصادر تانيه قالت بقه أنه لما ربنا نجى سيدنا نوح من الطوفان كان الاكل بيخلص فطبخ بواقي السفينه وطلعت العاشوراء بس الاتراك بيحطوا عليها فاصوليا وحمص ورمان وبرتقان والحكومه توزعها في الشوارع والجيران بركه وتراث

ايا كانت الحدوته أو المناسبه : نجاه نوح أو موسى أو مذبحه كربلاء إلا أنه يوم عظيم وصيامه سنه واحد سننه المهجوره هو التوسعه على الأهل عشان ربنا يوسع رزقك باقي السنه ، قد يكون ده كان سلو بلدهم في التوسعه وطلعت العاشوراء الله اعلم 

بس اللي اكيد اننا شعب ظريف وصاحب مزاج وبيحب الاكل كجزء من حب الحياه وكل اكله لها مناسبه وكل مناسبه لها اكله 

كلتوا عاشوراء ؟ 

كل سنه وانتم طيبين يا حلوين 

اليشم السائل : قصه الشاي من الشرق الى الغرب

كشخص محب وبشده للشاي في كل الاوقات , الايام, المناسبات خرج لي الكتاب من ارفف المركز القومي للترجمه في معرض الكتاب الماضي

وكاعدتي عندما اشعر ان الكتاب مختلف ومميز لا افضل قراءته الا في هواده في اجازه طويله بعيدا عن زحام القراءه في الايام العاديه

وقد كان لم ابدؤه الا منذ اسبوعين في اجازه عيد الاضحى  !!!

الكتاب رحله شيقه عن قصه الشاي من قرون طويله قبل الميلاد وحتى يومنا هذا

في عام 2732 قبل الميلاد الامبراطور شين نونج وهو العشاب الفضولي وفي احدى رحلاته واثناء غلي الماء ليكون صالح للشرب هبت رياح من التلال المحيطه واندفعت بعض الاوراق من شجيرات قريبه لتسقط في الماء المغلي , ودفعه الفضول لتذوقها واعجب بتأثيرها المنعش ليعلن عن اول كوب شاي في التاريخ

بعدها اقتصر استخدامه على الملوك ورجال الدين فقط باعتباره مشروب روحي يعلو بالروح والوجدان , وقصص جمع الشاي بفتيات عذارى وحمله في صناديق مخصوصه وبطرق مخصوصه حتى لا يؤثر على روحانيات المشروب

لاحقا استخدم كعمله للمقايضه بالخيول والتجهيزات الحربيه واصبح احد العملات المتداوله

ثم ظهرت الطقوس الاوللى لشرب الشاي وكونه رحله روحيه اقيمت لها الطقوس والاماكن الخاصه والتي مازلت موجوده في الثقافه اليابانيه ومنها لانجلترا في صوره اكثر تمدنا وهي حفلات الشاي وكانت كلها بدايه لمهنه ذواقه الشاي المستمره حتى اليوم في كبريات شركات الشاي لاختيار التوليفات الأكثر تميز

ثم ينتقل لرحله الشاي الى الغرب من الشرق وتقسيم الارض بين اسبانيا والبرتغال ووقوع دول الشرق في قرعه البرتغال وبدايه حملاتهم لكنوز الشرق ولكن في شكل التجاره والتبادل التجاري من توابل وحرائر وتلك السلعه الغريبه التي استخدمتها والده احدى البحاره وبعد سلق الاوراق تخلصت من الماء واكلت وضيوفها الاوراق الغريبه الغير مستساغه وعندما سالها عن الماء قالت ولما احتفظ به والورقه نفسها مره !!! تعد هذه اولى القصص الغربيه الغريبه عن الشاي واول تأريخ له في الغرب

لم يتحمل تكاليفه في الغرب الا ملكه انجلترا وافراد الطبقه الراقيه واقييمت له حفلات الشاي بعد الظهر ثم اخترعت له الاواني البورسلينيه في الصين ثم نافستها بعض الدول الاوربيه

ومع ازدياد الواردات اتسعت دائره الشاي وفرضت الضرائب ثم حرم شربه ثم قانت ثورات اصحاب الكيف والغي الحظر , ثم ثارت سيدات المجتمع الراقي وذلك بسبب قضاء الرجال اوقات طويله في المقاهي خارج منازلهم وكذا لماذا لا يسمح لهن بارتياج المقاهي مثل الرجال في نفس الوقت الذي فرضت عليه ضرائب كثيره فبدا تهريبه , ولانه سلعه غاليه عاليه الضرائب بدا غش الشاي ومن هنا ظهر الشاي الاسود تهربا من غش الشاي الاخضر ولان عمره اطول

ثم تحكي الكاتبه قصه ان المياه وقتها لم تكن جيده وكان الأأمن هو شرب البيره ومع دخول الشاي تراجعت البيره لمصلحه الشاي ومع المجتمع العامل الجديد اضيف له قطع الخبز مع الزبد , لاحقا البسكوت في شاي الخامسه كوجبه خفيفه في المساء  

ثم قصه السكر مع الشاي : لم يكن يمتلك السكر الا الملكه اليزابيث الاولى لدرجه تسوس اسنانها والرهبان في الاديره استخدموا العسل , ثم بدات واردات السكر من العرب وتجار البندقيه ثم اتسع استخدام السكر واستيراده من الشرق ليضاف لصناعه الشاي, البورسلين, السكر والكبرى حرب الافيون المستمره لسنوات طويله مع الصين بسبب الشاي حيث قايضت انجلترا الشاي بالافيون وزاد استخدامه في الصين واعتماد الشعب عليه مع حظر استخدامه بالرغم من عدم تجريم مقايضته !! واحتراف تهريب الافيون للصين في مقابل الشاي !!! وحرب الافيون التي استمرت لسنوات طويله اضعف فيها الاقتصاد الصيني , كل ذلك من أجل الشاي !!!

أظهرت حرب الافيون الاحتياج لنقل زراعه الشاي واسرارها من الصين لمناطق بديله في الهند وسيلان واسام وجواسيس الشاي وقصص من امتع ما يكون لنقل شتلات وبذور واسرار زراعه الشاي خارج الصين لتتاسس مناطق جديده للشاي ستحل محل الصين وحتى يومنا هذا

ثم ظهورالحاجه لسفن عملاقه لنقل الشاي للغرب ثم ظهور سفن اصغر واسرع لنقله وبدايه قناه السويس كلها عوامل اسرعت في انتقاله من الشرق للغرب من 6 شهور لاقل من شهرين لاحقا

ثم فصل في الشاي باللبن وفلسفه كل فريق في وضع الشاي اولا ام اللبن اولا !! ونوع الكوب وتاثيره على متعه الشاي وكون اللون جزء من متعه الشاي ليتطرق للفروق بين الشاي الابيض, الاخضر ثم الاسود ومراحل تصنيع كل نوع واختلافاتهم

ثم قصص اختراع الشاي المعبا في الاكياس ,الشاي المثلج , توليفات الشاي ومهنه الذواقه بتفاصيلها الممتعه المقتربه بشده من فلسفه الصين واليابان الاولى في شرب الشاي كمشروب يسمو بالروح والوجدان

ثم عرض للوقت الحالي واوضاع مزارعي وقاطفي الشاي المتدينه واحوالهم السيئه , الشاي العادل كاتجاه لتحسين هذه الاوضاع ومنظمات تطوير مزارع ومزارعي الشاي , الشاي العضوي وكثير من اسرار صناعه الشاي وصناعاته المساعده

كتاب مليء بالقصص والاساطير والمواقف المضحكه المبكيه مع كثير من الفلسفه والاشعار الصينيه الخاصه بالشاي

كتاب يجب طوال قرائته شرب كثيير من الشاي لمتعه مضاعفه وهو بالفعل من امتع ما قرات

ابن ناس ، ابن اصول

تجليات الست المصريه في فرد الجبنه المستويه

في احد الجروبات الحريمي الذيذه اللي بافس فيها دماغي واحده باعته سؤال كالاتي 

"اتفه سؤال في الجروب 😂

بتفردو الجبنه النستو ازاي في التوست 

التوست بيتخرم من السكينه وانا بحاول افرد و للاسف توست و نستو ده  فطار جوزي الاساسي 

نص فلوسي راحت في التوست المخروم 😂😂😂"

اللطيف بقه في الموضوع أن كل واحده اتشمللت ودخل تحكي صولاتها وجولاتها في فرد الجبنه النستو على التوست !!! اه والله زمبؤلكم كده 

اللي تقولك بادفيها ، اللي تقولك باجمد التوست ، اللي تقولك باقصها من الجنب وادوس عليها فتبقى زي الجبنه السبريد 

ودخل بعضهن يشتم في مؤامره التوست في تغليبهم كل يوم في فرد الجبنه ، اخريات بقه في انواع الجبن الأخرى 

الحقيقه much Ado about nothing قوي جدا خالص !!!

برنسه البرنسات دخلت جابت الناهيه بقه 

" ياطولة بالكم علي التعليقات 🙄حطيله حتة الجبنه في بوقه وطبقيله التوستايه يزوقها بعدها" 

ودي الحقيقه اصابتني بكريزه ضحك فقلت اضحكم معايا

الاظرف كمان هو كميه النوتيفيكاشنز اللي استمرت بعد ما رديت على البرنسه ، حامله لي مزيد من الكومنتات المهلكه من الضحك واللي شكلها حتبقى سهره مسخره في تجليات الست المصريه في فرد الجبنه المستويه 

اااااه ياااااني على مشاكلكم ااااه 

حوار مع الحصاله

في زياره عوائليه لاختي باغلس على بنتها كالعاده فقالتلي مش حاجي قلتلها مش فاضيه ومش حافتحلك فخدتها الجلاله  انا حاجي ، قلتلها حاتربس الباب واسد الشباك ومش حادخلك 

المهم عملت نفسها مشغوله بقه وعندها باليه وباسكت ومدرسه ، ست المشغوله بقه المستغنيه وقعدت على جنب

فقلتلها خلاص بقه مش حاخدك معايا الباليه في الاوبرا ، ودي انقلبت ١٨٠ درجه وبدأت تجر ناعم وانا حاموت من الضحك ، فقلتلها انت مش فاضيه 

فبدأت ترجع في كلامها ويوم ايه والساعه كام وباليه ايه طلبا لمزيد من التفاصيل 

انا رسمت وش الجد اكتر واكتر وبدأت اقولها التذاكر غليت قوي معاكي كام في الحصاله ؟ ودي بقه عملت فييسه وقالت كتير 

قلتلها خلاص حتعزميني يبقى كده ٥٠٠ جنيه 

ردت مامتها طب مش حتاخديني فسألت كده كام يبقى قلتلها ٧٥٠ وبعدين باباها قال وانا كمان فقلت لها ١٠٠٠ كل الارقام بالانجليزي عشان دراستها 

تقوم تقولي ، قولي بالانجلش عشان افهم !!! قلتلها ما ده بالانجلش هيه الحقيقه لم تستوعب الموقف 

دخل في الموضوع اخوها الصغير وخالها ودي بقه هنجت !!!

فقلت لها مش حناخد الصغنن وكفايه احنا الخمسه كده ١٢٥٠

قالتلي سهله اهي حاديكي ١٠٠ ومعاها ٢٠ ومعاها ٥٠ يبقى ١٢٥٠ !!! والحقيقه ما رضيتش اسد نفسها وفوتها بقه عشان ما تتخضش اكتر من كده !!!

اتفقنا انها حتروح تفتح الحصاله وتبلغني عشان اححز وهيه نازله قالتلي انا تعبانه وعايزه انام ، مش النهارده ، وبعدين حطت أيدها  في وسطها وقالتلي وهيهة خارجه حتروح  بكره عليه نومه !!! اللي هو انسي !!! 

وكان حوار مسلي لاقصى درجه 

مطره

صحينا على مطره جميله النهارده 

الشوارع مغسوله ، فاضيه ، الناس سايقه بالراحه ، حتى المزيكا في الراديو كانت حقيقي مزاج عالي 

باحس أن المطره حقيقي قوه اجباريه لنضافه الشوارع ، الشجر، العربيات او حتى أخلاق الناس 

ازاي كده فجاه بقى فيه سكينه وهدوء وطاقه ايجابيه و الناس رايقه وهادئه 

سبحان الله 

في سبع سنين

في سبع سنين 

الفيلم المثير للجدل 

قررت اتفرج عليه ، حقيقي المحاور شخص لبق جدا ، ذو دراسه ازهريه ففاهم بيتكلم في ايه ومع مين وفاهم الدماغ 

عرض مجموعتين مجموعه من السلفيين، الاخوان، صناع الحياه اللي فجاه قرروا يبقوا ملحدين بقه ، او لا ادريين او ايا كانت التسميات 

ومجموعه من الناس العاديه اللي واضح انها اصلا ولاد ناس وخريجه جامعه وكانت عادي بتسمع اغاني وتعرف بنات و اللي فجاه انتقلوا لصفوف الجهاديين وراوحوا سوريا وحملوا السلاح 

بغض النظر بقه توافقهم أو تختلف معاهم القاسم المشترك في وجهه نظري 

١- كلنا مسلمين أو مسيحين ورثنا دينا ولم نختاره محدش بحث واختار وبالتالي التنازل عن الدين كان سهل جدا

٢- في مشكله حقيقيه في تناول تعليمات الدين في بلادنا دون فهم حقيقي لها وبالتالي اي ارزوقي مدعي يلم وراه اي عدد يبقى داعيه واللي ساهم في ده كمان ضحاله الدين المدرس في المدارس وبالتالي كل واحد جاب لنفسه وعياله شيخ خصوصي الله اعلم ايه خلفياته الدينيه أو السياسيه فالحكايه قلبت بظرميت الحقيقه . معظم أولئك الارزوقيه كمان اتحشروا مؤخرا في السياسه وجروا وراهم مريديهم فلما الحكايه باظت منهم ناس كتير حصل لها اللوثه اللي جت في الفيلم 

٣- الدين تحول في أغلب الأوقات لمجموعه من الطقوس ( نقاب، صلاه، الخلافه الاسلاميه.....) احنا ببساطه الدين بالنسبه لمعظمنا أوامر ونواهي خوف من عذاب أو طمع في
 الجنه ، مش بدافع حب ربنا او طاعته أو طلب رضاه من خلال شويه طقوس معظمنا بيعملها اصلا من غير روح ودماغه في الف حاجه تانيهن عمل الطقوس دي دون الاهتمام بعملها بحب وطلب رضا اود دونالاهتمام بتربيه وتهذيب النفس ومحاوله فهم مفاهيم زي الابتلاء أو القدر أو اننا في أغلب الأوقات مش حنفهم حكمه ربنا من حاجات كتير حوالينا بس لازم نسلم ونرضى ، فلما اختبروا ما استوعبوش اللي حصل وزعلوا من ربنا وعاتبوه زي ما حصل في الفيلم 

حقيقي قد تكون ابتلائاتهم كانت كبيره ويمكن صغر السن وضعف الأساس الديني قد يكون ساهم في اللي حصل ، محدش فينا يقدر يجزم لو اتحط مكانهم كان ممكن ايه يكون رد فعله 

٤- وضع الست في مصر عموما وفي الطبقات دي سيء للغايه ، واحده منهم في اخر الفيلم أسقطت علاقتها السيئه بزوجها على ربنا وقررت تسيبهم همه الاتنين !!!

٥- عدم الاختيار وفرض الحجاب من اسوأ افات المجتمع ده ومعظمهم قالوا لبسوه حتى قبل البلوغ !!! شخصيا كنت في دوله ثم مدرسه فرضت الحجاب دون اقتناع وده كان من أسباب تأخير حجابي ١٣ سنه الحقيقه ، ففهمت جدا جدا اللي قالوه وحسيت بيه جدا ،ةالغير محجبه في مصر على الاقل زمان كانت بنتبهدل والله ( العكس دلوقتي) 

٦- ده ينقلنا لفكره اننا لا نتقبل الاخر اصلا وده في حد ذاته من أكبر مشاكلنا 

٧- الثوره عملت ايه ؟ خلت الناس تحلم وفجاه نزلوا على جدور رقابتهم 

٨- رابعه والنهضه حقيقي نقطه فاصله في حياتنا كلنا واللي مكنش متزن نفسيا أو مقتنع بأفكاره حصل له لوثه أدت للصنفين اللي في الفيلم ، مش همه بس كل واحد فينا بدرجات حصله نفس الهزه  من اول اللي طنشوا كل حاجه او هجوا من البلد مرورا بكل التيارات السياسيه والأفكار وانتهاءا بكل التناولات اللي جت في الفيلم 

٩- اكتر مشهد عبثي بقه في الفيلم هو اللي راحوا سوريا وهو بيسخر اصلا من قيم الناس اللي همه في وسطهم !!! بس قال حاجه خطيره ، انا مش حاعرف ارجع ، لو كنت اخوانجي في مصر كان ليها راجعه انما هنا ملهاش وهنا النظره على وجه المحاور له كانت حقيقي لا تقدر بثمن 

اتصور أنهم في معارك نفسيه وصراعات شديده جدا حاجه كده زي السخن وراه ساقع بس لما الفوره دي تهدأ نتمنى يوصلوا للحقيقه وربنا يهدينا جميعا 

بدليل مثلا "سنه" لما قالها عايزك تقعدي مع ربنا وتكتبي له جواب ، هيه في لقطه قالت إنها لا تؤمن بيه بس لما قالها اكتبي له جواب دارت وشها في وسط جسمها وقالت له مش مستعده ، البنت التانيه قالت له حبيته وخذلني ، يعني رجعت ناقضت نفسها في الاخر 

١٠- اعتقد كلنا مش بس همه في مرحله ما حصل لنا انواع الشك دي بدرجات متفاوتة ودي بتخلي كل واحد يقيم علاقته بربنا ويعيد وزنها واتجاهها ، د. مصطفى محمود من أهم الامثله على كده ، لذلك لما جه للولد بتاع صناع الحياه قاله انا لا ادري ، انا باحيد نفسي عشان أقيم فعلا طريقي امال ازاي اعمل ده وانا مؤمن بأفكار باعيد تقييمها !!!

اعتقد دي فطره ربنا اللي موجوده عند كل الناس بما فيهم الملحدين واللي بس محتاجه بيئه ملائمه عشان بس تظهر أو ترجع تاني 

ديننا دين وسط مش محتاج الاكستريم والله 

ربنا يثبت الناس ويهديها للطريق الصحيح ايا كان 

ختم الفيلم بشاب مسيحي وصل لنفس النتيجه ، اعتقد تمهيد لجزء تاني عن نفس الأفكار عند المسيحيين

ونهاه بفات المعاد للست ، بس هل هو فعلا فات المعاد ؟ 

اتمنى لا

دماء على الاسفلت

راجعه من التجمع الخامس للبيت، محور المشير مقفول تماما 

المهم فجأه لقيت عساكر بتنظم مرور الناس بين عربيتين واحده اسعاف والتانيه ونش

باسال العسكري في ايه قالي واحد بيعدي الشارع خبطته عربيه وجريت 

طلع أنهم موقفين العربيات والعساكر حوالين الجثه المتغطيه بجرايد حمايه لحد النيابه ما تيجي 

بعد ما خرجت بابص في المرايه لقيته متغطي بجرايد ودمه سايح عالاسفلت 

سالت نفسي ايه مهم في الدنيا يخلي حد يعدي شارع بتاع ١٠ حارات على رجله 

ايه اهم من حياتك ؟ ياترى وهو خارج فكر أنه مش حيرجع ؟ 

وان أهله مستنينه عالعشاء أو معزوم بكره بره ، او كان وراه ايه الاسبوع الجاي 

عنده زوجه وعيال واحلام ؟ ولا اصلا يمكن كان بيجري عشان يقابلهم ويخرجهم 

ولا حتى بيجري على أهله ومصاريفهم 

طب كل الناس دي حتحزن عليه كام ساعه وبعدين ؟ الحياه عادي حتكمل ولا كانه جه الدنيا اصلا 

اخبار خططه في شغله ؟ بعد كام يوم حيتقدم كام واحد لشغله مكانه 

وعادي كده اتشطب اسمه من سجل الاحياء واتحول لرقم في احصاءيه عن حوادث الطرق ، رقم مجرد رقم !!!

واللي خبطه ده كمل كده عادي ؟ ماحسش باي تانيب ضمير ؟ طب حينام بالليل ازاي ولا عادي ولا اصلا استوعب أنه عمل حادثه 

فجاه كده هديت سرعه العربيه ومشيت على نص سرعه الطريق ، بس بعدها افتكرت اني ماصلتش المغرب فشديت عشان ألحقه في البيت 

ربنا يرحمه ويغفر له ويصبر اهله

عيد ميلاد رقم ٥

كل سنه وانت طيبه يابلوجي العزيزه 

ومش حاحكيلكم الحكايه للمره الخامسه بقه 

حاعيد نشر أول بوست بقه من تاني 

https://shaybelne3na3.blogspot.com/2014/01/blog-post.html?m=0

٢٥ يناير سلام على أرواح الطيبين

٢٥ يناير 

انا حقيقي كنت من الناس اللي مش فاهمه ايه كلنا خالد سعيد وايه الدعوات عالفيسبوك في وقت كان السواد الأعظم من جيلنا كله ملهي في حاله كورسات بقه ، كارير، اهداف شخصيه ، كل واحد في سوقه 

زيي زي ناس كتير كمان نزلنا الشغل اليوم ده عشان ناخده يوم تاني مع ويكاند لأنه كان يوم ثلاثاء !!!! 

اليوم مشي عادي وقال ايه الشوارع فاضيه رايح جاي بس شويه مظاهرات في التحرير !!!

وعلى بالليل الدنيا عليت شويه في القاهره والسويس 

وكمل الاسبوع عادي ، اصل المظاهرات في التحرير !!!

الحقيقه بدأت احس شويه باللي جاري على جمعه الغضب وقطع النت والتليفونات ونزول الجيش وحظر التجول 

ايه ده اللي بيجرى ؟ مشهد مختلف تماما وبدانا نتابع التلفزيونات محليه ودوليه 

حبه حبه المتحف المصري بدأ يتنهب ايه ده ، شويه وجالنا تليفونات من شركاتنا محدش ينزل ، هييييه اجازه !!! 

بس حقيقي بدأت افهم وأتابع لاول مره في البلد ، الرجاله دي عايزه ايه ( اول كام يوم كنت شايفاهم شويه عيال) بس حقيقي دول اشرف من انجبت البلد !!!

٢٥ يناير بدأت سقف مطالبها يعلى ولاول مره بدأنا نحس بالبلد واللي فيها ، بدأنا نخاف واللجان الشعبيه اتعملت ، بدأت اصحى مفزوعه على صوت صفاره شارعنا والجيران عرفت بعض لاول مره 

احلى شباب كنا بنقف نتفرج عليهم من البلكونه في عز طوبه ، سبحان الله سنتها كانت دفا وكان ربنا أراد ييسرها ليهم !!!

النقطه الفاضله كانت موقعه الجمل ، لما الضرب اشتغل نورت عندي لمبه ، شكلهم صح والا ليه كل البهدله والمقاومة دي ؟! 

وتمر ال ١٨ يوم وبعد ما كان الواحد مغيب وبيشتمهم اول كام يوم بدأ يفهم ويتابع ويفرح ويزعل وكلنا رقصنا يوم التنحي 

لا ادعي مشاركتي فيها لاني ببساطه مكنتش فاهمه حاجه ، ولو كنت حبيت اشارك كان ابويا منعني 

٢٥ يناير كانت نقطه تحول ليه ولناس كتير من حزب الكنبه لناس بتقرا وتدور وتتابع البلد وتقرا الدستور وتحاول تفهم وتشارك بعد ما كانت قرايتها تنحصر في مناهج التعليم والشغل بدأنا ندور ونقرا تاريخ وسياسه وكل حاجه ونتناقش في الأحزاب وندور كأنه امتحان قبل كل انتخابات او استفتاء

لناس مكنتش حتى بنخاول تشارك في اي حاجه لانها مش حاسه ان البلد بتاعتنا نزلنا ووقفنا طوابير استفتاءات وانتخابات واتناقشنا واتخاقنا وبعد كده صوتنا وطي وبقينا نسمع ونفهم كل وجهات النظر بغض النظر عن اي حاجه حصلت بعد كده ، مش موضوعنا عالاقل في البوست ده 

امبارح وانا معديه على ميدان التحرير حقيقي سمعت صوتهم وشفت خيامهم وقريت لهم الفاتحه لكل شاب نزل وهو عنده امل في التغيير وضحى بعمره وشبابه أو صحته وبقى مصاب انتم اشرف حاجه حصلت للبلد انتم عالاقل حاولتم وغيركم كان قاعد بينظر أو حتى بيشتم ، سلام لكم اينما كنتم