وصلنا المدينه المنوره الساعه 10 بالليل يوم
18 رمضان سنه 2003 ووقتها كان الحرم بيقفل
بعد التراويح مكنش لسه 24 ساعه
زعلت قوي لاني عارفه ان من اداب زياره
المدينه اول حاجه تعملها تزور الحبيب
المهمم وصلنا الفندق وقلنا حنتسحر بدري وننزل
قبل الفجر بشويه , بس انا ما جنيش نوم عارفين اللي مستني معاد حبيبه انا كنت كده
ما جاليش نوم من انتظار الحدث ده
بالرغم من عيشتنا في السعوديه وعمراتنا
الكتير الا اني عمري ما روحت المدينه في دي كانت اول زياره ليه
بعد السحور نزلنا انا وعمي وزوجه عمي ورحنا
الحرم وزي ما انتم عارفين ان زياره الستات بمواعيد وكان اول معاد بعد الشروق
واختكم مش نايمه صليت الفجر وقعدت اقرا قران للشروق في انتظار ال rendevouz بتاعي !!
وللي ما رحش : عاده في حركات تمويه انهي باب
اللي حيفتح للزياره للسيدات , اصل بيني وبينكم الستات بيعملوا مهازل هناك فبعد ما
وقفت عند باب فتحوا ابعد واحد فجريت عليه قبل ما يقفلوه ودخلت يمكن اخر واحده وفي
الاتجاه للمسجد القديم انت حاسس انك بتقرب على هدف جميل وقلبك عمال يدق ورجليك
تخبط في بعضها المهم وصلنا للمسجد القديم وبعدين هناك بيقسموا الناس افواج فقعدت
استنى الفوج بتاعي وفجاه برضه : هجووووم المهم بقوه الدفع وصلت وفجاه السجاد
الاحمر بقى اخضر اعلانا بدخول الروضه
فرحه ما بعدها فرحه و والله الجو اتغير
والهوا معرفش جاي منين وراحه وسكينه لا حدود لها , اصلها حته من جنه ربنا ياااااه
احساس مختلف. السلام عليك يا رسول الله , السلام عليك يا خليفه رسول الله , السلام عليك يا
امير المؤمنين عمر بن الخطاب مع ان الجزء المفتوح من الروضه هو غرفه عائشه وليس
القبر (احنا بندخل من ورا مش من جهه القبر) يومها زعلت قوي اني ما دخلتش من ناحيه القبر بس
تعرفوا ربنا اصله كريم قوي بعد كده انا دخلته في الحلم وشوفته بالظبط زي التلفزيون
!!!
من الزحام صليت وانا واقفه احلى ركعتين في
حياتي !!! بعد شويه فضي مكان قدام فصليت بسجود وركوع ومن الزحمه الماليزيات فكروني
منهم فعملوا كردون حواليه عشان محدش يدوس عليه !!!
اللذيذ في الموضوع ان زمايلي في مصر كانوا
كاتبين لي ورقه فيها اسم كل واحده والدعوه اللي هيه عايزاها , ف وانا بقرا الورقه
نسيت مين دول !! مين مروه ومين مها ومين ومين ومين ....... بس دعيتلهم بجد والله
اكتر حاجه بقه وجعت قلبي يوم مشايانا من
المدينه : لازم من اداب المدينه اخر حاجه تسلم على الرسول وتستاذنه بالرحيل دي بقه
اللي بكتني من قلبي وانا باعملها
بس عارفين ربنا اللي دخلها لنا في الدنيا لا
يمكن يبخل علينا بيها في الاخره اصله كريم قوووووي
السلام عليك يا رسول الله , السلام عليك يا خليفه رسول الله , السلام عليك يا امير المؤمنين
https://www.facebook.com/#!/562451227215431/photos/a.562476710546216.1073741828.562451227215431/585870421540178/?type=1&theater
https://www.facebook.com/#!/562451227215431/photos/a.562476710546216.1073741828.562451227215431/585870421540178/?type=1&theater
طب أنا بعيط بقى :) كل سنة نخطط نروح وزى ما يكون ربنا مش كاتبهالنا
ردحذفباذن الله حتروحي السنه دي وحتدعيلي دعوه حابقي اقولك عليها بس ما تطنسينيش وقتها
حذفبجد ربنا يكتبهالنا ومايحرمناش منها دنيا واخره داليا صفوت
ردحذفيااااااااااه يا لومى .... فكرتينى بأيام جميلة .... ربنا يكتبهالنا تانى يارب
ردحذفعلى الرغم من إنى من مواليد المملكة.... إلا إننا رجعنا منها وانا صغيرة قوى ومفتكرش أى حاجة.... وبالتالى كانت زيارتى الأولى فعلياً وأنا بعمل أول عمرة فى حياتى بالتحديد فى آخر أبريل 2012 (عمرة مولد النبى)... مع بابا (الله يرحمه) وماما وأختى الصغيرة
رحلتنا بدأت بالمدينة المنورة .... مش عارفة أوصفلك إحساسى كان إيه واحنا داخلين المدينة .... الله على جمال البلد والسكينة اللى على أهله وشوارعه وجوه وحتى الحمام .... أول حاجة لفتت إنتباهى حمام الحمى فى الشوارع .... وطيبة الناس وحبهم للمصريين .... كان كل حد يقابلنا من بداية وصولنا الفندق يقول يا هلا بالمصريين :)
المهم.... سيبنا حاجاتنا فى الفندق بسرعة وجرينا على مسجد الحبيب.... أفتكر كان يوم سبت وصليت العصر هناك فى الساحة ..... أما دخول الروضة .... فبصراحة كان صعب عليا قوى لأن الدنيا كانت زحمة قوى ودخلت بقوة الدفع .... والستات هناك زى ما قولتى بيعملوا حاجات عجيبة .... اتضربت كام كوع لحد ما صرخت.... معرفتش أصلى بس سلمت على الحبيب والصحابة ودعيت والدموع ف عنيا وربنا عالم بالنوايا....
أطرف موقف حصلى هناك.... كان فى المسجد النبوى قبل ما نغادر المدينة بيومين.... كانت الفترة ما بين المغرب والعشا.... وكنت بقضيها فى المسجد فى قراءة القرآن.... يومها كان المسجد زحمة قوى فأخدت ركن كدة (اللى راح هناك يعرف الحاجز الخشب الكبيير بين مصلى السيدات والرجال) المهم فردت سجادة الصلاة الخضرة بتاعتى وقعدت أنا وأختى نقرا قرآن.... المهم لقيت واحدة بنت شكلها مصرية جت قربت علينا وقالتلى السلام عليكم... انتم مصريين... ردينا السلام وقلنا أيوة.... قامت سألت هوا انتو حتفضلوا قاعدين فى الروضة كتيييير مش حتيبوا المكان لغيركم؟؟ بإستغراب سألتها: الروضة؟؟؟ قالتلى أيوة... مش الوضة عند السجادة الخضرا :) :) .... على فكرة البنت فعلا ما كانتش بتهزر :) :)
أما أجمل موقف.... فكان فى صلاة العصر فى أحد الأيام.... المسجد مكانش زحمة قوى.... يومها وأنا بصلى ركعت ... ولما قمت لقيت حمامة مطوقة جميلة قدامى بتتمشى الهوينى فى موضع السجود.... والضوء اللى داخل من سقف المسجد مخليها أجمل وأجمل.... حسيت إنها بتصلى معايا وبتأمن على دعايا ...
أما أصعب يوم .... كان يوم مغادرة المدينة.... كان يوم الجمعة.... يومها حضرنا صلاة الجمعة فى ساحة المسجد النبوى والشيخ قعد يدعى لمصر وسوريا ويبكى .... وأنا كمان كنت ببكى وأنا بغادر المدينة.... حسيت انى سيبت حتة منى هناك ... ودعيت من كل قلبى لأهلها... وأتمنى على الله يكتبلى زيارة تانية عن قريب يارب