الناس المفروسه من مرور المحروسه

 

اه والله ماهو اصل مرور المحروسه ده مليان عجايب وغرايب , مثلا احنا البلد الوحيده اللي بعد الشارع ما يترصف يفضل برضه مليان حفر وكأن الحفره علامه مميزه عشان الشارع ما يتوهش

احنا برضه اللي تلاقي البلاعات قي الشارع مش على نفس الخط مع انه نظريا هما متوصلين بنفس ماسوره الصرف فلازم يكونوا ورا بعض بس الظاهر همه بيقصدوا يسلوا اللي سايق عشان ما يزهقش

حدانا في المحروسه حتلاقي اي حد يطلع في مزاجه يقفل الشارع الجانبي ويحوله لجراج من غير ظابط ولا رابط مش بس كده يعمل مدخل خصوصي وبوابه كمان

احنا اللي بدعنا المطب الصناعي بتاع الاهالي يعني مش بتاع الحكومه , واحد مثلا من باب الدعايه عايز العربيات تهدي ناحيه المحل بتاعه يعمله مطبين تلاته عشان الناس تهدي قوم ايه تشوف المحل وتنزل تشتري . واختراع اننا نخططه طيب لحسن في الضلمه الناس تلبس فيه لا لا دي كماليات ما بنفكرش فيها !!!

واحنا برضه اللي بدعنا اختراع اليو ترن بدل التقاطعات قال ايه عشان الناس ما تقفش كتير قوم نسليهم ونلففهم حوالين نفسهم بالذات في مدينه نصر معرفش ليه

اليوترن ده بقه في اليومين اللي فاتوا اتحول للفراشه ترن حاجه كده منبعجه اخترعوها معرفش ازاي عباره عن اتنين يوترن لازقين في بعض موطنها الاصلي عند جامعه الازهر وقسم مدينه نصر تلاقي فجاه الشارع بقى اتجاه واحد بيصب في الفراشه ترن وبصراحه الحته دي عايزه مزيكه الموالد لانها فعلا بقت مراجيح مولد النبي وقال ايه عاملين لوح استرشاديه هاندميد تعر بلد بالمديريات اللي حواليها قال ايه عشان الناس ما تتوهش !!!

في شوارع المحروسه حتلاقي الاسلاك الشائكه ايفري وير ولما نقرر نفتح الشارع مش نشيلها بقه  , لااااااا نخليها على جنب عشان لما نعوزها نلاقيها من باب الاحتياط

واحنا برضه اللي ماليين الشوارع متاريس وورا المتاريس دشم كاننا في حرب , ما تقفلوا الشارع وتريحونا وتريحوا نفسكم ما هو كده كده مقفول وملوش تلاته لازمه

عندنا برضه الاختراع الهعظيم المسمى عسكري المرور اللي بيبوظ المرور ماهو يا عين امه برضه من كتر الوقفه في الحر والبرد والهباب اللي بيشمه كل يوم جاله تخلف , ففجاه تلاقيها قفلت معاه زي الدومينو ويستعين باي صديق من العربيات اللي حواليه يفض الاشتباك اللي حصل !!!!

احنا اللي لازم تلاقي عد مدارس البنات دوريه راكبه قال ايه عشان المعاكسات , وهمه همه اللي بيعاكسوا البنات برضه !!! دوريه فول اوبشن !!!

احنا اللي المرور عندنا لما يحصل حادثه اخر حد يوصل وبرضه امين الشرطه عايز الاكراميه بتاعته وفوقها شويه خدمات

واحنا اللي نمره النجده ما بتردش على الموبيل, لازم تتصل من نمره ارضي طب انا لو سايقه ولا عملت اي مصيبه ولا حد طلع عليه اعمل ايه , دور على رقم ثابت اتصل منه !!!

احنا اللي الناس من زهقها من الزحمه ممكن تتصاحب على بعض لما كل واحد يبطل عربيته وينزل يمشي رجله شويه

واحنا اللي اغلى اعلانات دلوقتي بقت في الراديو وقت الزحمه

واحنا اللي الحارات في الشوارع ممسوحه من كتر ما الناس مش بتستخدمها فالمرور بيوفر البويه ماهو اصل الاوبشن مش نازل لنا

واحنا اجدع ناس تلزق في عربيه الاسعاف في الزحمه عشان تخلص منها بسرعه

البوز بيز ده بقه اختراع مصري اصيل حط بوز عربيتك الاول تبقى لك الاولويه حتى لو ماشي معاكس

 

واحنا الشعب الوحيد اللي عنده شتايم بالكلاكس والنور فعادي جدا تتشتم وما تفهمش ايه اللي اتقالك وتكمل طبيعي جدا زي حالاتي 

مش بقولكم مفروسه من مرور المحروسه !!!!