الاثنين، 5 مايو 2014

ام رجب

طول عمرها في العماره اللي جنبنا زوجه الحارس بتاعها بس عمرنا ما سمعنا عنها غير في يوم صحينا على صويت لما جوزها مات وصحيوا الصبح لقيوه ميت ومن هنا ظهرت على الساحه

الست الجدعه اللي بميت راجل تقوم الساعه 6 الصبح تمسح العربيات ومش اي مسح بمنتهى الضمير والحنيه مش تدلق ميه والصاج يصدي لاه بفوطه مبلوله وبعدين تنشف وتلمع ولا كانها عربيتها ومن كتر احترامها لما حاولنا نخليها تمسح عربياتنا رفضت عشان الحارس بتاعنا ما يزعلش مع انها محتاجه الفلوس.
وبعدين تقعد زنهار على باب العماره للطالع والنازل ولا يمكن تسرح ولا ترغي زي باقي ستات الحراس في العماير التانيه والساعه عشره بالليل بالدقيقه تقفل البوابه ومحدش يدخل ولا يخرج الا باذنها امال ايه في نظام
ربت ولادها اللي يمكن خمسه او سته وما شغلتش بناتها في البيوت زي باقي العماير ولا هيه كمان خدمت في البيوت
ومفيش مره تشوفها غير مبتسمه وراضيه بجلابيتها البلدي الجميله وطرحتها السوداء الشفافه اللي تحتها التربيعه الفلاحي الجميله وسنتها المكسوره اه بس بتضحك قوي

ام رجب في نظري بعث للست الفلاحه اللي في تمثال نهضه مصر الست المصريه الجدعه اللي وقفت جنب جوزها وعمرها ما ظهرت في الصوره طول ماهو موجود لكن لما الظروف حكمت عليها كانت بمليون راجل وعمرها ما مدت ايدها ولا كسرت نفس ولادها بالعكس راسها عاليه ومرفوعه قوي اكتر من ناس كتير من البهوات والهوانم

ام رجب هي زي كتير من المصريات الاصيلات اللي موجودين وحيفضلوا موجودين ويمكن ماحدش ياخد باله منهم بس همه مش بيعملوا ده لاي حد همه بيعملوا ده لولادهم

بس هيه لو تبطل تغسل العربيه ام انذار اللي بتصحيني قبل المنبه بخمس دقايق تبقى مفيش منها !!!

هناك تعليق واحد:

  1. هى دى المصريه الكادحة اللى طحنتها صراعات البشر وماحدش فكر فيها واللى زيها ربنا يديها الصحة داايا صفوت

    ردحذف