الخميس، 1 مايو 2014

العريس الصالوناتي !!!


بعد البوست اللي فات لقيت صاحباتي بيحكوا عن العجب اللي عدى عليهم فققرت اعمل البوست ده , من ناحيتي حاحكي عن اشهر الانواع اللي وردت عليه بس انتوا كمان لازم تكتبوا معايا

والله والله ما هو من باب التريقه بس من باب ان الواحد يحس ان كلنا في الهوا سوا وان دي مشكله جيل بحاله مش حاجه شخصيه , ومن الناحيه التانيه من باب النصيحه لاي واحد بيتقدم لواحده يعرف البنات ايه اللي بيقفلها ويفصلها في القعدات دي

ويا ريت لو حد يشاركنا بالروايه الذكوريه لنفس الحدث اهه برضه نفهم من كل الزوايا , مش حارغي كتير نخش في الموضوع:

اول مره جالي عريس صالوناتي كنت في تانيه كليه ولان اهلي ما تعرضوش للموقف ده قبل كده قال ايه قررورا يصورا اختي صوره الاعداديه وبالمره كمان انت تتصوري فتعملي شعرك وتظبتي حالك ودخلت عليه وقال ايه بعد الصوره ما تيجوا نروح النادي وهناك نتقابل صدفه على الباشا , بصراحه دخلت عليه والمضحك في الموضوع انه لم يعنيني الناس اللي معرفهمش اللي شفناهم فقعدت طول القعده اقرا مجله النادي  بس بعد كده قرون الاستشعار بقت تشتغل في اي حاجه مريبه واتفقنا انه ما يصحش ابقى فرجه لوحدي طب ما هو من حقي انا كمان اتفرج ولا ايه ؟ فمحصلتش غير مره واحده اللي هيه كانت تاني مره دي بقه تفاصيلها حتزعل ناس فبلاش منها

بعد كده الدغري اقصر الطرق فبقيت انزل وانا عارفه , بصراحه والواحد لسه ورور كانت بتبقى موتره جدا وبتبقى مش عارف تتصرف ازاي ولا تقول ايه بس بعد كده خلاص الواحد جتته نحست !!!  فنصيحه لاي واحد البنت بتبقى محتاسه خصوصا لو لسه صغيره فحاول تتعامل بذكاء وبلاش التطجين في الكلام

نيجي بقى لبعض الانواع اللي عدت على الواحد :

·        مدمن الشغل : ومش دي المشكله ما انا كمان كده بس المشكله انه عمل زي حنفي في سك على بناتك  اللي جالي مطبق ومش متغدي فكان بياكل الجاتوه بشراهه مفزعه والكريمه لزقت على وشه فبقيت مش عارفه ابص له لحسن اضحك, المهم عدت بس في تاني قعده نسي المعاد وفكره تاني يوم من كتر ماهو مشغول !!! طبعا ابويا اتجنن من الحركه دي وهيه بصراحه ما تصحش

·        المتشرط : اتحجبي الاول : ما ينفعش تعمل كده عشان الحجاب ده علاقه بيني وبين ربنا ولو عملتها عشانك ما تبقاش عباده وانا ببساطه مش بعبدك انا باعبد ربنا

·        المتشرط 2: ده بقى اتقدم بعد ما اتحجبت (غير اللي فوق) وقبل ما يجي : تبطل تلبس بناطيل وحنعمل فرح اسلامي وتقعد من الشغل اصل والدته داعيه اسلاميه فواحده من الاخوات كانت جايبه مكافئه ليه على الحجاب !!!  : يا اخي ما تدخلش الدخله دي مش كده امال حتعمل فيه ايه بعد كده (ايه المواطن ما تجيش وما قابلناهوش اساسا )

·         النصاب: ده بقه اللي كان حكايه بالمناسبه كان وكيل نيابه !!! ودخل دخله محققين واستجواب مش مقابله تعارف , المهم في وسط الكلام جبت سيره والد صاحبتي اللي معاه في نفس مكان الشغل واني من ضمن الاماكن اللي بنخرج فيها نادي القضاه وده ركبه العصبي وقام , بعد كده عرفت من اللي كانت جايباه انه اتقدم لواحده تانيه ونصب عليها وخد منها عربيتها اتاري الباشا خاف مني لاحسن لو عمل كده معايا يوصل الكلام ده شغله

·        ابن امه : وده كان كتير قوي : تلاقيه قاعد لازق لها , ما يتكلمش غير لما هيه تفتح المواضيع , طول القعده يتكلم على ماما وهكذا : يا ابني البنت بتبقى عايزه تستقل وتحس بحياتها فما تحسسهاش ان الست الوالده حتيجي تتحكم في كل تفاصيل حياتكم مش كده , مهم قوي تحترم والدتك بس ما تبقاش "ابن امك" !!!

·        العبيط : مثال عليه واحد ظريف قوي جاي المقابله بالليل بنظاره شمس !!! وعينيه ما فيهاش حاجه بس عشان ما تقولوش عليه سيئه النيه , اصله قعد ربع ساعه بالنظاره الشمس (غالبا كان بيعاين بعمق يعني !!! ) وبعد شويه قلع النظاره , ايه الهبل ده !!! قفلني من اول خمس دقايق

·        الغير واثق من نفسه : اول ما عرف اني معايا ماجستير وبشتغل في شركه مالتيناشونال والجو ده اتشنج وما كانش طايق نفسه , ملحوظه : كان دكتور في الجامعه يعني انا مش احسن منه في اي حاجه بالعكس  !!!

·        الخجول : وده اول ما قعد ودانه احمرت ووشه جاب ميت لون ومابقاش عارف يتكلم طب حنكمل القعده ازاي يعني , راح ولا جاش

·        اتقدم لي انا وصاحبتي في نفس ذات الوقت : شوفتوش البجاحه !!! ما كانش عارف اننا اصحاب , بتحكيلي على عريس جايلها واذ بي اكتشف انه كان عندنا من يومين , للنهارده صاحبتي ما تعرفش , احنا الاتنين فركشناله بالمناسبه . الفكره انك ما ينفعش تشوف اتنين في وقت واحد , واحده واحده مش كده ولو عرفوا وقعتك سوداء .

·        ده بقه اللي حدوته: كانت مديرتي جايباه ليه وجابته المكتب وما كنتش قايله لنا وكل شويه تبعت تنده واحده فينا كانه شو عرايس . يا ست الكل ما ينفعش تعملي كده وما يصحش اصلا تحطينا في الموقف ده , المهم ايه انا كان عندي مشكله مع حد في الشغل وقعدت اشتكي واعيط عندها فطبعا قفلته هيه بعد كده قال ايه بتقولي اهدي شويه  وما تاخديش كل حاجه على اعصابك اصل اللي كان عندي كان عايز يتقدملك بس انت بالقواق ده قفلتيه !!!! قال ايه انا السبب و طاااايب

·        فيه بقه ثاني اكسيد الكربون : شفط الاكسجين من المكان المفتوح اللي كنا فيه : وقعد يحكي عن صناعه المؤامره والبلد واللي هيه فيه كميه طاقه سلبيه غير طبيعيه , وبعدين ست البنات والعبايه ام كباسين وايه اللي وداها هناك !!!! والدبابات اللي الجيش ما داسش الناس بيها في ماسبيروا وان اي حد ممكن يسوق الدبابه !!! (كان ظابط جيش) فقلت له هات الدبابه معاك المره الجايه !!!

·        البخيل : في الكلام , المعلومات , كل حاجه وده بقه كان جايب والده يتكلم بالنيابه عنه وشفته تلات مرات بنفس الطقم ( ملحوظه كان مرتاح ماديا بس واضح انه بخيل في كل حاجه ) . يا باشا زي ما من حقك تعرف عني كل حاجه لازم كمان تساعدني اكتشف سيادتك, ووالدك ما ينفعش يتكلم بالنيابه عنك وبحبحها شويه

·        الشخص الصح في الوقت الغلط وده واحد وحيد وكان perfect match  بس ما كنش في نصيب للاسف L

·        جاي في السريع : فاكرين فيلم ماجد الكدواني: نازل اجازه وعايز يخطب في اسرع وقت دول بقه حدث ولا حرج واضح ان الجدول كان بيقى فيه عروستين تلاته في اليوم . نفس الفكره اللي اتقالت قبل كده ما ينفعش each at a time  بالراحه  

·        اقعدي من الشغل: هو انت ليه عايز تلغي حياتي قبل سيادتك , ما ينفعش شغلي جزء مهم من حياتي وجزء من الpackage  زي اهلي وشكلي وطباعي , وزي ما مينفعش اقولك غير صحابك او اهلك او شغلك سيادتك برضه لازم تحترم كل ده عندي

الفكره ايه : انك ما ينفعش تمثل عشان حتتفقس, ما ينفعش تتشرط , وما ينفعش تشوف عروسه من غير علمها , ما ينفعش تشوف كذا عروسه في وقت واحد, وما ينفعش  تغير من شغلها ونجاحها البنت الناجحه المستقله المتعلمه دي اضافه ليك وحتكون co-pilot   لسعادتك فدي ميزه مش عيب واقولك سر: بتكون زهقت قوي من انها هيه المسئوله دايما فبتبقى مستعده تتنازل عن القياده بس لو شافتك جدير بيها فلازم تكون كده وعمرها ما حتتنطط عليك  كلام في سرك دي حركات بنات وحتحطك فوق راسها بس لو كنت جدير بالمكان ده فلازم تكون

البنات مش يتدور على شقتك وعربيتك وساعتك الغاليه ولا بتدور على وظيفتك الفظيعه , البنات بتدور على واحد يملى دماغها وعينها وقلبها , البنات بتدور على اب لولادها تفتخر بيه ويبقى نفسها ولادها يكونوا زيه  ولو ربنا ما قدرش الولاد لاي سبب يكون هو كفايه , البنات بتدور على سواق لعربيه حياتها تطمن من سواقته ما تبقاش على اعصابها للعربيه تخيش في الحيطه , وتنام وهو سايق وتروح في عاشر نومه لانه سواق شاطر وواثقه فيه

افهموا بقه

مستنيه تجاربكم بس مش من باب التريقه وسامحوني لو مسحت بوست حسيت انه تريقه لاني والله ما قصدي التريقه ولا السخريه بس فعلا عايزه افهم وافهم الناس كل زوايا الموضوع متفقين؟

اه اللي عنده مشكله كومنت في البلوج انبوكس الكومنت وانا حاضيفه واكتب اسم صاحبه او صاحبته

هناك 26 تعليقًا:

  1. فكرتينى بالعريس إللى جابتهولى موظفة فى الإدارة مع أبويا الله يرحمه (المركز القومى للبحوث )... جايبه لبنت لبنت الدكتور عزام إللى كل شوية سفريات ورايح جاى على ألمانيا يبقى أكيد تحت القبة شيخ بقى والفلوس ياما هنا ياما هناك :) المهم إكتشفنا فى النادى إنه إبن أختها (ما علينا ) البيه قاعد بكلم بابا على سفرياته وألمانيا وأوروبا والعيشه وإللى عايشيناها ومبهور بأبويا أخر حاجة وطبعا بيتكلم معايا على إنى البرنسيسة بقى جمال ومال (من وجهة نطره يعنى وخالته قالتها صراحة ).... وإذ فجأة راح سائلنى السؤال المتين بقى .............
    هى الباشمهندسة مش عندها أرض بردوا ؟! (أنا فى الأصل مهندسة زراعية يعنى )
    -مين عنده إيه حضرتك ؟؟؟؟؟
    - أرض يا باشمهندسة هو الدكتور مش حياخد عزبة إستصلاح بإسمك بردوا ؟!
    - دكتور مين ؟!!!!!!!!!
    -الوالد يا باشمهندسة :D
    - لأ هو حضرتك فهمتنى غلط خالص على فكرة .. أنا ماليش فى موضوع الأرض ولاجو ده ,ده طبعا غير إنه أكيد مش مقبول إن حضرتك تسألنى فى أول قاعده عندى إيه وماعنديش إيه ؟؟؟؟ ولا إيه ؟؟
    أبويا كان يا حرام حيموت من الضحك ... ومش عارفه خالته زعلت ليه الصراحة :D
    Rasha Azzam

    ردحذف
    الردود
    1. المصيبه انه مش متخيل انه حيتفقس , وان من كتر اللي ورد على الواحد بقى بيشم ريحتهم في اول قعده !!!
      بس موتتيني من الضحك فظيعه !!

      حذف
    2. لأ خالص يا حرام ده كان مصدوم إنتى رديت عليه كده :)
      المهم إنى طول السكة وإحنا راجعين عماله أقول لبابا خسارة السيشوار والماكياج والفستان القيافه فى جتته وبابا مش عارف يسوق من الضحك :) الله يرحمه شاف بلاوى معايا أنا وأختى :)

      حذف
  2. الجزء الثانى من الإبهار بقى :
    من سنتين تلاته كده قبل ما أختى تتجوز جالها عريس المهم خرجت معاها أنا وجوزى لأن بابا طبعا كان الله يرحمه
    الميعاد فى كوستا مصدق طلعنا قعدنا البيه جه فجوزى قام يسلم عليه ويعرفه علينا ويقوله إتفضل أوووووووووووم إييييييه ؟
    البيه سحب الكرسى إللى جنبى وقاعد يكلمنى ويسبلى .. فجوزى قاله على فكرة يا دكتور دى المدام عليا طبعا ودى أختها الدكتورة ويا ريت حضرتك تغير مكان كرسيك بقى بهزار كده على أساس إنها غلطه بريئه يعنى !!! ما طلعتش بريئة خالص للأسف .
    بعد ما مشى تانى يوم تكلمنى الست إللى كانت بعتاه تقولى شوفى الواطى بيقولى أختها الكبيرة إللى عجبتنى شوفى كده ينفع ولا لأ ... تقوله يا دكتور دى متجوزة وجوزها كان معاكوا ؟! يقولها وإيه يعنى ؟! مش يمكن مش مبسوطة مع جوزها ؟!!!!!!!!!!!!!!!!!
    طبعا لحد النهاردة لا جوزى ولا أختى يعرفوا الحكاية دى :D
    Rasha Azzam

    ردحذف
  3. واضح ان البوست حيكون تاريخي يا فندم !!!! انا مش قادره ابطل ضحك !!!!! انت مشكله !!!

    ردحذف
    الردود
    1. أنا لو حاكيت بس عن عرسان أختى حنحكى للصبح :)

      حذف
    2. احكي احكي شكلنا حنعمل عايزه اتجوز الجزء التاني !!! بس المره دي قصص حقيقيه

      حذف
  4. ماشى الجزء الثالث من مغامراتى مع المحروسة الصغيرة :) أمى شافت العجب ربنا يديها الصحة
    شرف البيه وأمه فى صالون بيتنا مش بحب الحكاية دى فى أول ميعاد بس تانت مامة صاحبتها أصرت لأنهم ناس متدينه ومش بتحب تقعد فى أى مكان وعلى ضمانتها والفيلم ده
    داخل بالبدلة وبسم الله ماشاء الله طول بعرض سد الباب وهو داخل والسبحة والخاتم الفضة فى صباعه الصغير .. ماشى مش مشكلة !
    قعد هو وأمه وخدوا واجبهم وخرجوا مبسوطين وطبعا عايز يقعد تانى وهى تقول مش مستريحه مش عارفه ليه ؟! وطبعا بعد ضغوط من الكل قعدت معاه تانى .. المهم بقى القعده التانيه كانت كارثيه بكل المقاييس
    قعد يقولها طباعه بقى علشان تبقى على نور من أولها ولأن موافقتها شئ مفروغ منه طبعا لأنه البيه لقطه :
    -مابحبش حد يناقشنى فى أى حاجة بقولها ... لو حطيت كوبايه فى حته ما تتحركش من مكانها إلا بإ1نى وإلا مش حيحصل طيب
    - اااه بس دى مش عيشه حضرتك فى حاجة إسمها مناقشة ؟؟؟
    - ماعنديش الكلام ده والمفروض إنك متدينه وعارفه إنك ماتناقشيش جوزك !!!
    -صمت يا حبيبتى لأنها مش عارفه ترد
    -وعلى فكرة أنا عارف إنك بتروحى الحصرى تحفظى قرآن وبتحفظى كمان , وأنا ليا واحد صاحبى فى أمن الدولة ممكن يجيبلى الملف بتاعك لو عايزة يعنى !
    -تستمر المسكينة فى الصمت الرهيب إللى هو فاكره علامة الرضا
    المهم خرج من بيتنا وهو متخيل إنه المرة الجاية حيجيب المأذون :)) اااااااه والله زيمبئولك كده !!!!!
    Rasha Azzam

    ردحذف
    الردود
    1. بعيدا عن التريقه انا بجد نفسي افهم مين اللي حط في دماغهم الافكار لغريبه دي , ايه جو كلامي يمشي والدخله العجيبه دي
      الغريب ان اللي يدور يلاقي ابوه مش كده بس هيه مفاهيم مغلوطه معرفش جابوها منين
      الجيل دماغه ملعوب فيها (ولاد وبنات على فكره ) الا من رحم ربي ومتخيل ان الاماره والشروط هيه اللي حتخليه راجل
      محدش كلمه عن الاحتواء وان اللي يجي بالشده يجي قده ميت مره باللين والتفاهم والحنيه (بس ما يكونش طري ومايع لحسن نفسي بتغم عليه ) !!

      حذف
  5. ماهو أنا مش بتريق والله , هو البيه عنده تصور إن الدين بيقول كده فدور على واحده من الجامع علشان تسمع كلامه من غير مناقشه والجو بتاع تسجد لزوجها والكلام ده !! مين مسئول عن التصور مشايخ مش شايفين من الست غير عورة ولازم تتدارى بأى شكل أو هو شاف أبوه بيعامل أمه كده !! الله أعلم
    مش متخيلين إنه علشان المرأة تسجد لزوجها لازم هو الأول يحوطها فوق راسه زى ما الرسول عليه الصلاة والسلام كان بيعمل :)
    كان شيخ الجامع وقتها بيقولنا الواحد من دول يفضل يعط طول حياته وبعدين يجى يقف قدام الجامع وإنتوا خارجين علشان يشاور لأمه ولا لأخته وهى خارجه من الدرس على واحده منكم .... ودى حقيقة للأسف
    Rasha Azzam

    ردحذف
  6. ولو حكينا يا حبيبى نبتدى منين الحكايه انا معاكى فى الانواع دى يا شوفتها وقابلتها بشخصى يا سمعت عنها مع اصحابى ابدء من موقف كوميديانى عموما انا فاعل الخير عندى اصحاب ابويا الرجاله وخصوصا انه الله يرحمه كان مصياتنى نفسى اجوزها قبل ما اموت حتى من قبل تعبه الشديد بالرغم ان هو اللى ربانى على ان الجواز مش هو اخر المطاف ومش هو ده اللى اتمناهوهلك يلا اهو ده من جمله تربيه كل حاجة والعكس المهم اتصل عليه واحد من قرايبه انا جايب عريس دكتور وعنده صيدليتين واكبر كنها بسنة وابوه عمده ونااااس ميه ميه والمقابله فى البلد وعنده شقة فى مدينه نصر وكالعادة لازم ننزل نشوفه هناااك وحددنا ميعاااد واخدت اجازة بالخنااق وليلة ماسافرنا الناس ولا اتكلموا ولا ايوتها حاجة قولت عادى احسن لاقيت الوسيط بيتصل الواد جاتله جلطة ومات اكلينيكيا انا كداليا اتخضييييت وقولت مش دى نتيجة الاستخارة طب يعيش لامه ويومين واتوفى وبابا راح عزى فيه واذ اتفاجا بعدها بشهر اخوها اللى بيتقدملى اصغر منه ومنى قولت ايه ده العيله دى مستبيعة ولا ايه مش خايفين على الواد التانى وطبعا بعد الحااااااح من بابا وكان دور التعب يزيد عليه قبلته وحااااولت امشى فى الموضوعبس يابنتى الاستخااارة دى عظيمة جدا هم عاوزين جواز سريع علشان ماعندهمش صيادله وصيدلينين كبار فى الشرقيه ومدينه نصر لازم ييكون فى حد يشيل وكله يخلص بسرعة وطبعا خلعت من القصة (جواززززز الصيدلنياااااات )فاكرين تحت القبه شيخ وطبعاااا حاجات كتير كانت فيه وتعامله ماكنتش مقتنعة واخد بيرتبلك سيبى شغلك واتفرغى للصيدليااات مافيش طبعا مرتب وعيشى مع اهلى عشان انا هاسافر وهاشتغل بره وهم اللى هيكونوا مسئولين عنك وطبعا زياراتهم ماكنوش بيجيبوا معاهم اى حاجة ودى اول علامات البخل جنابك يعنى عللل داليا صفوت

    ردحذف
    الردود
    1. مات !!! العريس مات !!! يا لهوي !!! دي جديده , ما تحكيش الحكايه دي لجوزك بقه , اةعي يكون عارف طريق البلوج !!!!
      بس عارفه انا حدوته جواز الصيدلانيات دي !!!
      واحده اعرفها اللي بعد كده بقت حماتها في ساعه صفا قالت لها انا نزلت عشر صيدليات جبت من كل واحده بجنيه اسبرين عشان انقي العروسه للمحروس ابنها !!! شوفتي الهنا !!!

      حذف
    2. هههههههه لا اسلام كان صديقى وعارف كل القصص دى اسلام من الولاد اللى بيستغرب البنات الكويسين ليه مابيتجوزوش هو شايف ان السبب اكيد احنا وان طل واحدة بعد نجاحها فى شغلها مش هتتنازل عن شقة فخمة وعربيه وشبكة بالشئ الفلااانى استغربنى الصراااحة لما كنت احكيله على العرسان دول او عن اصحابى وده مممكن يتسرد من ضمن اراء الجانب الاخر

      حذف
    3. يا لهوى يا داليا ؟! إستخارة واحده والراجل فلسع من الدنيا ؟!!!!! إبقى خفى بقى على عرسان صفصف :)
      Rasha Azzam

      حذف
  7. وطبعا فى ناس كتييييير زى حالاتى تاقبلى واحد يجبلك امه او اخته عشان تتكلم هى وتفحصك او بدل مايجى هو يبعت امه وحماه اخوه وتلاقيكى فاكرة انا حاكيتلك مرة فاكرة الاتنين ستات الاى طبوا علينا فى الاوضة اهو لو انا ماعجبتهومش ممكن يلاقوا طلبهم فى اى واحده تانيه كانهم جايين السوبر ماركت يختاااروا براحتهم

    ردحذف
  8. بجد كلامكم مالوش حل، طيب انا معنديش امثلة كتيرة في الموضوع ده نظرا لاني مش بارتاح اني اتعرف على ناس اغراب في موضوع جوهري بالشكل ده و كمان لان في الاخر مضمون الحوار بيكون في الشكل بنسبة 90%

    بس من ضمن المغامرات اللي ربنا عفا عني و ماعشتهاش الحمدلله، ان واحدة زميلتي محترمة جدا كلمتني في مرة و جايبالي عريس (بغض النظر انه ماكانش مناسب من غير مقابلة) الا انها كانت صريحة معايا جدا. قالتلي انا عارفة انك ممكن ماتوافقيش عليه بس بصراحة اصل هو طالب مواصفاتك بالظبط، هو عايز واحدة حلوة و بيضة و مليانة!!!!!!!!!!!!!!!!!!!!!!!!!
    ده طالب فرخة حضرتك مش بني ادمة، طبعا الكلام ده كان في سري و اعتذرت بذوق و انا مش عارفة اضحك من سخرية الموقف ولا ازعل ان زميلتي مش شايفة فيا حاجة غير اني فرخة من غير ريش!!!!!!

    ردحذف
    الردود
    1. وحياتك يا انوش هم كلهم شايفينا فراااخ وبالطلب ومالكيش حق الرفض لانهم بيقولوا ان ده تناكة بس حلو قوى فرخة من غير ريش دى عسل .داليا

      حذف
    2. مش بقلكم الجيل (ولاد وبنات )دماغه طقه : اختزل المواصفات في الشكل وبس يا نهار مش فايت
      مره صاحبه اختي كان متقدم لها عريس ومكنش حليوه يعني : قلتلها عمر ما كان معاكي زميل امور في الشغل او الكليه ؟ قالت لي اه قلت لها وبعد كام شهر بتشوفيه امور قالتلي لاه بتعود عليه ولو كان بياثر فيه في الاول بعد كده خلاص قلتلها ده واحد حتشوفيه كل يوم بعد شويه مش حيفرق معاكي الشكل الاهم الروح (طبعا الا اذا كان شكله منفر فده من الاساس ملهوش لازمه )
      قصدي ان الطباع والروح والدماغ اهم بكتييييير من الشكل اللي مش اولويه اصلا
      واللي نفسه حلوه له الجنه ولا ايه؟؟

      حذف
    3. وحياتك يا أنوس نصهم شايفنا فرخة والتانى شايفنا بقرة إلا من رحم ربى
      Rasha Azzam

      حذف
  9. ومن ضمن الرجاله اللى بتجيب مامتهم معاهم واحد صاحبتى هى اللى جابتهولى بالرغم من ان هى كمان لسه ماتجوزتش بس شكرت فيه ومامته صاحبة مامتها وقررت انى مش هاقول لحد فى البيت عشان اتحرم من الزن بالموافقة لمجرد انهم شايفنى باتنك والسلام ورحت انا وصاحبتى وبعدين لقيته جايب مامته وكنا هنتقابل الصبح فى جروبى بتاع وسط البلد وكان شكله عاقل وهادى وباصص فى الارض احتراما لمامته وقاعدت مامته تتكلم وتسالنى ونحكى وهو قاعد من بنها وهو كان له ظروف خاصة البيه مطلق وعنده بنت الجميل بقى انه طلقها والبنت عندها تلات شهور والاحلى انه لسه مطلق من اربع شهور وانا كنت عارفة انه له تجربه قبل كده وقاعدت مامته تكرر انها مالهاش دعوة بولادها ومابتحبش تتدخل فى حياتهم وطبعا الواضح انه لا وبعدين استاذنت هى وصاحبتى وسابونا شويه وبعدين انفتح البير الغميق واول حاجة راااح باصص وقالى انتى نكديه ؟؟اوعى تكونى نكديه انا مش ناقص طب انتى زنانة؟اوعى تكونى زنانة انا مش ناقص بصى انا هاحكيلك عن تجربتى ناطيت انا وقولتله انا مش عايزة اسمع انا احب نتعرف شويه وبعدين اسال لو حسيت بارتيتاااح وهوبا بدا يزعق فيه لاااا انا اللى اقول احكى يبقى احكى انا الراجل وانا اللى احب ابدا واشربى الشاى اللى قدامك ده وانا بحكى لدرجة ان الناس اللى حوالينا كانوا قاعدين يبصوا علينا ويضحكوا وانا هاموت وعاوزة امشى ايه العبيط ده وقعد يهزى لقى ان مراته كانت قاااال ايه مابتتطبخش كل يوم ومابتلمعش المراياااات والزجاج كل يوم وانه كل شويه عايزة تنام وتريح وتقول اصلى تعبانه ومش قادة وسط الكلام رنيت على صاحبتى الصراحة رجعتلى بسرعة هى ومامته اللى حست طبعا انى مش مستحملة الكتكوت وروحت وانا مخنوقة جدا فى ناس مجانين كده وحكيت لبابا وفرح فيه قالى تستاهلى عشان ماحكتليش قبل ماتروحى اهو طلع اهبل قال يعنى لو كنت قلتله كان هيطلع عاقل الخلاصة ان الرجالة مش متخيل ان مراته كائن لازم يستحمله او انه يعامله بحنيه هو بيتجوز علشان يتدلع ويتبغدد على الجاريه اللى امها وابوها ربوهاله واكيد دول مش كل الرجالة بس للاسف ده تفكير كتير منهم والاسوء هى الام اللى مابتحولش تفهم ابنها وتدعم حياته بانها تصبره على مراته ولا ايه

    ردحذف
  10. الموضوع ده جامد جداً .... عايزة أشارك معاكم بتعليق بس مش عارفة ابتدى بمين وللا مين :) ... ما هو أصل محسوبتكم مر عليها 90% من عاهات مصر والدول اللى جمبها :)
    عموماً نبتدى بالأستاذ...
    حضرته كان أستاذ جامعة.... دكتوراه فى علم النفس
    والواسطة عرفته انه جاى يخطب صيدلانية وأهلها ملتزمين وطيبين
    قوم ايه.... يحدد هو المعاد اللى يناسب مشغوليات سيادته.... ويطلب يكون عندنا ف البيت لأنه مبيحبش قعدة النوادى والكافيهات وكدة
    المهم، بابا الله يرحمه وافق على المعاد وإستقبلناه... البيه جالنا البيت كدة (سلبنتس زى ما بيقولوا) محدش عرفه انه المفروض لما يروح لحد يدخل ف ايه حاجة حتى لو بوكيه ورد للعروسة.... المهم قعد مع بابا فى الصالون وبعدين ماما جهزت العصير وشيلتنى الصنية ودخلت معايا... بعد ما قدمت المشروب البيه طلب من أقعد جمب بابا وماما فى الجهة المقابلة ليه عشان يشوفنا كلنا :)
    وابتدت المحاضرة .... اتكلم عن نفسه وجدول محاضراته.... وانه معندوش مانع المدام تشتغل بس ترتب مواعيد شغلها على جدول محاضراته وتنزل من البيت بعديه وتوصل قبليه :) .... وابتدا يسألنى عن شغلى... فبابا الله يرحمه حاول يضيف تعليق قام البيه قال لبابا: لو سمحت يا عمى السؤال مش ليك.... سيبها تجاوب لوحدها.... :)
    وإستمر الإمتحان شوية مابين اسئلة موجهة ليا وساعات لبابا أو لماما وممنوع المقاطعة :)
    طبعاً هو مشى من عندنا من هنا.... وداهمتنا كلنا كريزة ضحك ... وخصوصا بابا حبيبى لأنه الله يرحمه كان مدرس وكانت أول مرة حد يعمل ليه امتحان بالشكل ده :)
    Basma Ismael

    ردحذف
    الردود
    1. ده عملكم كشف هيئه يا حلاوه
      المصيبه في العقليه اللي المفروض انه يكون مثقف كده ودماغه كبيره لكن اصلها مش بالتعليم والشهادت!!!

      حذف
  11. مرة تانية كان العريس من جهة أمنية (آه والله) واللى حصل كان كالآتى:
    واحد مستشار زميل ماما فى عملها قال انه جايب للدكتورة عريس برتبة مقدم وبيعمل فى جهة أمنية.... وشافها وعايز يخطبها.... ماما سألته سؤال برئ.... طب هو شافها فين يعنى....
    البيه الواسطة قال انه رشحنى للعريس وقال لحضرته انى بشتغل فى المصل واللقاح.... قام العريس خد معاه ظابط تانى وكام عسكرى ونزلوا على المصل واللقاح (بس بزى مدنى) وكانت المهمة كما يلى:
    العريس وزميله راحوا المصنع اللى كنت بشتغل فيه.... الأول سألوا عنى وطلعوا لحد غرفتى فى الدور التالت عشان.... عشان يسألونى هو حقن الأنفلونزا موجودة ف الصيدلية وللا لأ :) وقال إيه بيستشيرونى هو ممكن طفل صغير ياخدها.... على أساس إن مفيش دكتور ولا صيدلى فى فاكسيرا غيرى قابلهم من أول البوابة لحد مكتبى ف مبنى#2 .... مع غرابة الموقف جاوبت وأرشدتهم لمكان الصيدلية.
    خرجوا من عندى راحوا لمدير المصنع... كشفوله عن هويتهم وأنه جايين يعرفوا معلومات عن المصنع وإنتاجه وبيان بأسماء العاملين ومعلومات عامة عنهم :)
    جزء بقى من القوة توجه بملابس مدنية للموارد البشرية وقدر بطريقته يطلع على ملفى ويعرف بياناتى كلها :)
    وبكدة ... كان العريش شاف العروسة وعرف عنها كل حاجة وقرر ... إنه يخطبها
    ماما بقى إستكمالاً للموقف العجيب مقالتليش حاجة غير ان فى عريس ظابط متقدم لى (بس حكت لبابا طبعاً) ووافقوا على تحديد معاد عشان أشوف العريس .... وبعد تحديد المعاد بكام يوم .... البيه إعتذر وأجل عشان الرئيس فى شرم الشيخ.... وحددنا معاد تانى .... وطبعا اتأجل لأن مبارك طووول فى شرم الشيخ..... والمرة التالتة بقى (والتالتة تابتة) قامت عاصفة ترابية .... أنا قلت لماما ان دى نتيجة الإستخارة مصدقتنيش وأقنعت بابا بتحديد معاد للمرة الرابعة .... والمرة الرابعة :) الواسطة نام ومردش على التليفون... آه ما أنا نسيت أقولكم ان تليفون حضرته سر حربى وان الإتصال بيه كان عن طريق الواسطة.... ويومها البيه حاول يكلم الواسطة عشان يعتذر لأن عنده "مهمة" والواسطة كان نايم .... واحنا روحنا قعدنا واستنينا ..... وطبعاً روحنا واحنا بنسب ونلعن فى الجهات الأمنية على اللى عايز يعرفهم أصلاً

    ملحوظة أخيرة : الواسطة اختفى فترة وبعد حوالى ست شهور راح لماما يقولها : احنا مش حنحدد معاد بقى عشان نلن نشمل الباشا على الدكتورة.... وطبعاً مش ح أحكيلكم ماما قالتله ايه :)

    ردحذف
    الردود
    1. القصة اللى فاتت بتاعتى برضه :)
      Basma Ismael

      حذف
    2. موتيني من الضحك يا بوسيالمشكله انه ادي لنففسه حق يشوفك ويتحري عنك من قبل الهنا بسنه وبعدين ايه لازمه القلق في مكان شغلك من غير نوافقه مبدئيه وشكله ايه قدام القوه البوليسيه اللي جابها معله ولا ده العادي في الجهات الامنيه!!! حاجه عجيبه خالص
      كويس انه معملكيش فيش وتشبيه من وراكي!!!

      حذف